ಹರಿಜನ ಸರ್ಕಾರಿ ಅನುದಾನಿತ ಶಾಲೆಯ ವಿದ್ಯಾರ್ಥಿಗಳನ್ನು ಹೊರಗಟ್ಟಿ ಶಾಲೆಗೆ ಬೀಗ ಜಡಿಯಲು ಅಧಿಕಾರಿಗಳು ಮುಂದಾದಾಗ ಶಾಲಾ ವಿದ್ಯಾರ್ಥಿಗಳು ಕಣ್ಣೀರಿಟ್ಟು , ಕೈ ಮುಗಿದುಕೊಂಡು “ನಮ್ಮನ್ನು ಹೊರಗಟ್ಟಬೇಡಿ ಸರ್ ಪ್ಲೀಸ್” ಎಂದು ಪೊಲೀಸರಲ್ಲಿ ಬೇಡಿಕೊಂಡ ಘಟನೆ ಹುಬ್ಬಳ್ಳಿಯ ರಾಮನಗರದಲ್ಲಿ ನಡೆದಿದೆ.
ಊರಿನ ಎರಡು ಬಣಗಳ ನಡುವೆ ನಡೆದ ಜಾಗದ ತಕರಾರಿನಲ್ಲಿ ನ್ಯಾಯಾಲಯದ ತೀರ್ಪು ಒಂದು ಪ್ರತ್ಯೇಕ ಬಣದ ಪರವಾಗಿದ್ದು, ಅವರು ಪೊಲೀಸರ ಮೂಲಕ ಸರ್ಕಾರಿ ಶಾಲೆಯನ್ನು ಖಾಲಿ ಮಾಡಲು ಮುಂದಾಗಿದ್ದಾರೆ. ಈ ವೇಳೆ ಶಾಲಾ ವಿದ್ಯಾರ್ಥಿಗಳು ಶಾಲೆಯಲ್ಲಿದ್ದರು ಎನ್ನಲಾಗಿದೆ. ಖಾಲಿ ಮಾಡಲು ಬಂದ ಪೊಲೀಸ್ ಅಧಿಕಾರಿಗಳ ಮುಂದೆ ಅಳುತ್ತಾ, “ನಮಗೆ ಕಲಿಯಲು ಬಿಡಿ, ಶಾಲೆಯನ್ನು ಖಾಲಿ ಮಾಡಬೇಡಿ” ಎಂದು ಪರಿಪರಿಯಾಗಿ ವಿದ್ಯಾರ್ಥಿಗಳು ಬೇಡಿಕೊಂಡಿದ್ದಾರೆ.
ಈ ಘಟನೆ ಬಗ್ಗೆ ಮಾತಾಡಿದ ಮುಖ್ಯೋಪಾದ್ಯಾಯ ಹನುಮಂತಪ್ಪ “ ತೀರ್ಪು, ನ್ಯಾಯ ಎಲ್ಲವೂ ಯಾರ ಪರವಾಗಿಯೇ ಬಂದಿರಲಿ, ಆದರೆ ಎಪ್ರಿಲ್ ವರೆಗಾದರೂ ಮಕ್ಕಳಿಗೆ ಕಲಿಯಲು ಅವಕಾಶ ಮಾಡಿಕೊಡಿ. ಈ ಆತಂಕದಿಂದ ವಿದ್ಯಾರ್ಥಿಗಳು ಒಂದು ಗುಟುಕು ನೀರೂ ಕುಡಿಯಲಿಲ್ಲ “ ಎಂದು ಸುದ್ದಿಗಾರರೊಂದಿಗೆ ಅವರು ಹೇಳಿದ್ದಾರೆ
