ಡಬ್ಲಿನ್‌ : ಇಸ್ರೇಲಿ ಪಡೆಗಳು ಫೆಲೆಸ್ತೀನಿಯನ್ನರ ಭೂಮಿಯನ್ನು ಅಕ್ರಮವಾಗಿ ಆಕ್ರಮಿಸಿರುವುದರ ವಿರುದ್ಧ ಐರ್ಲ್ಯಾಂಡ್‌ ಸಂಸತ್ತು ವಿಶೇಷ ಗೊತ್ತುವಳಿ ಜಾರಿಗೊಳಿಸಿದೆ. ಪ್ರತಿಪಕ್ಷ ಸಿನ್‌ ಫೆನ್‌ ಪಾರ್ಟಿ ಬುಧವಾರ ಐರ್ಲಾಂಡ್‌ ಸಂಸತ್ತಿನಲ್ಲಿ ಗೊತ್ತುವಳಿ ಮಂಡಿಸಿತ್ತು. ಆಡಳಿತ ಹಾಗೂ ಪ್ರತಿಪಕ್ಷದ ಬೆಂಬಲಿಗರಿಂದ ಬೆಂಬಲ ದೊರಕಿದ ಹಿನ್ನೆಲೆಯಲ್ಲಿ, ಗೊತ್ತುವಳಿ ಮಂಜೂರಾಯಿತು.

ವಿಷಯಕ್ಕೆ ಸಂಬಂಧಿಸಿ ಇಸ್ರೇಲ್‌ ವಿರುದ್ಧ ಗೊತ್ತುವಳಿ ಮಂಡಿಸಿದ ಯುರೋಪಿನ ಮೊದಲ ದೇಶ ಐರ್ಲ್ಯಾಂಡ್‌ ಎಂದು ಗುರುತಿಸಲ್ಪಟ್ಟಿದೆ. ಈ ಗೊತ್ತುವಳಿ ಐರ್ಲ್ಯಾಂಡ್‌ ನಾದ್ಯಂತದ ಜನರ ಆಳವಾದ ಭಾವನೆಯ ಸ್ಪಷ್ಟ ಗುರುತಾಗಿದೆ ಎಂದು ಐರಿಷ್‌ ವಿದೇಶಾಂಗ ಸಚಿವ ಸಿಮೊನ್‌ ಕಾವೆನಿ ಹೇಳಿದ್ದಾರೆ.

ಇದು ನಾನು ಅಥವಾ ಈ ಸಂಸತ್ತಿನ ನಿಲುವು ಎಂದು ಸರಳವಾಗಿ ಹೇಳುವಂತಿಲ್ಲ. ಯುರೋಪಿಯನ್‌ ಒಕ್ಕೂಟದಲ್ಲಿ ಈ ರೀತಿ ಮಾಡಿದವರು ನಾವು ಮೊದಲಿಗರು. ಇದು ಇಸ್ರೇಲ್‌ ನ ಚಟುವಟಿಕೆಗಳು ಮತ್ತು ಅದರ ಪರಿಣಾಮಗಳ ಬಗ್ಗೆ ನಾವು ಹೊಂದಿರುವ ಅತ್ಯಂತ ಕಳವಳದ ಪ್ರತಿಬಿಂಬಿಸುತ್ತದೆ.