ನವದೆಹಲಿ: 2017 ರಲ್ಲಿ ಭಾರತ ಮತ್ತು ಚೀನೀ ಪಡೆಗಳು ಮುಖಾಮುಖಿಯಾದ ಡೋಕ್ಲಾಮ್ ಪ್ರಸ್ಥಭೂಮಿ ( ಎತ್ತರದ ಸಮತಲದ ಭೂಮಿ)ಯ ಪೂರ್ವಕ್ಕೆ 9 ಕಿಮೀ ದೂರದಲ್ಲಿ ನಿರ್ಮಿಸಲಾದ ಚೀನಾದ ಹಳ್ಳಿಯ ಪ್ರತಿ ಮನೆಯ ಬಾಗಿಲಲ್ಲಿ ಕಾರುಗಳನ್ನು ನಿಲ್ಲಿಸಲಾಗಿರುವ ಉಪಗ್ರಹ ಚಿತ್ರಗಳನ್ನು ಖಾಸಗೀ ವಾಹಿನಿ  NDTV ಬಿಡುಗಡೆಗೊಳಿಸಿದೆ.

ಈ ವಿವಾದಿತ ಭೂಪ್ರದೇಶವು ಭೂತಾನ್ ವ್ಯಾಪ್ತಿಗೆ ಬರುತ್ತಿದ್ದು, ಭೂತಾನ್ ಈ ಪ್ರದೇಶವನ್ನು ಪಾಂಗ್ಡಾ ಎಂದು ಕರೆಯುತ್ತಿದೆ  ಎಂದು ndtv 2021ರಲ್ಲಿ ವರದಿ ಮಾಡಿತ್ತು. ಅಮೋ ಚು ನದಿಯ ದಡದಲ್ಲಿರುವ ಈ ಪ್ರದೇಶವು ಚೀನಾ ಆಕ್ರಮಣಕ್ಕೊಳಗಾದ ಪ್ರದೇಶವಾಗಿದೆ.

ಚೀನಾವು ಅಮೊ ಚು ನದಿಯ ತೀರದಲ್ಲಿ ಈ ರೀತಿಯ ನಿರ್ಮಾಣ ಮಾಡುವುದರಿಂದ  ಡೋಕ್ಲಾಂ ಪ್ರಸ್ಥಭೂಮಿಯ ಭಾರತದ ಆಯಕಟ್ಟಿನ ಪ್ರದೇಶಗಳಿಗೆ ಚೀನಾ ಸೇನೆಗೆ ಪ್ರವೇಶಿಸಲು ಸಹಕಾರಿಯಾಗಲಿದೆ. ಅಲ್ಲದೇ ಭಾರತದ ಸೂಕ್ಷ್ಮವಾದ ಸಿಲಿಗುರಿ ಕಾರಿಡಾರ್‌ಗೆ ನೇರವಾದ ಸಂಪರ್ಕ ರೇಖೆಯನ್ನು ಕಲ್ಪಿಸುತ್ತಿದ್ದು, ಇದು ಈಶಾನ್ಯ ರಾಜ್ಯಗಳ ಮೂಲಕ ದೇಶದ ಇತರ ಭಾಗಗಳಿಗೆ ಸಂಪರ್ಕಿಸಲು ಸಹಕಾರಿಯಾಗಲಿದೆ.

2017ರಲ್ಲಿ ಭಾರತೀಯ ಸೈನಿಕರು ಡೋಕ್ಲಾಮ್‌ನಲ್ಲಿರುವ ಜಂಪೇರಿ ಎಂಬ ಈ ಪರ್ವತಕ್ಕೆ ಚೀನಾದವರನ್ನು ಬರದಂತೆ ದೈಹಿಕವಾಗಿ ತಡೆದಿದ್ದರು. ಆದರೆ ಇದೀಗ ಪರ್ಯಾಯ ವ್ಯವಸ್ಥೆ ಮೂಲಕ ಚೀನಾ ಸೇನೆ ಅದೇ ಪರ್ವತವನ್ನು ಸಮೀಪಿಸಿ ಭಾರತೀಯ ಸೇನೆಯ ಬೈಪಾಸ್‌ಗೆ ಪ್ರಯತ್ನಿಸುತ್ತಿದೆ ಎಂಬ ಆತಂಕ ಎದುರಾಗಿದೆ.