ಹೃದಯಾಘಾತಕ್ಕೊಳಗಾಗಿದ್ದ ನಾಲ್ವರು ವೃದ್ಧರಿಗೆ ಯಶಸ್ವಿ ರೋಬೋಟಿಕ್‌ ಶಸ್ತ್ರಚಿಕಿತ್ಸೆ

ಬೆಂಗಳೂರು: ಇತ್ತೀಚೆಗಷ್ಟೇ ವೈದ್ಯಕೀಯ ಲೋಕಕ್ಕೆ ಪರಿಚಯವಾದ ರೋಬೋಟ್‌ ಅಸಿಸ್ಟೆಡ್‌ ಕರೋನರಿ ಆರ್ಟರಿ ಬೈಪಾಸ್‌ ಸರ್ಜರಿ (ಸಿಎಬಿಜಿ)ಯ ಮೂಲಕ ಹೃದಯಾಘಾತಕ್ಕೆ ಒಳಗಾಗಿದ್ದ ನಾಲ್ವರು ರೋಗಿಗಳಿಗೆ ಫೊರ್ಟಿಸ್‌ ಆಸ್ಪತ್ರೆ ವೈದ್ಯರು ಯಶಸ್ವಿಯಾಗಿ ಶಸ್ತ್ರ ಚಿಕಿತ್ಸೆ ನಡೆಸಿದ್ದು, ಈ ನೂತನ ತಂತ್ರಜ್ಞಾನ ಹೆಚ್ಚು ಉಪಯುಕ್ತವಾಗಿದೆ ಎಂದು ಫೊರ್ಟಿಸ್‌ ಆಸ್ಪತ್ರೆ ಹೃದಯ ತಜ್ಞ ಡಾ. ವಿವೇಕ್‌ ಜವಳಿ ಹೇಳಿದ್ದಾರೆ.

40 ವರ್ಷ ಮೇಲ್ಪಟ್ಟ ನಾಲ್ವರು ರೋಗಿಗಳು ವಿವಿಧ ಕಾರಣಗಳಿಂದ ಹೃದಯಾಘಾತಕ್ಕೆ ಒಳಗಾಗಿ ಆಸ್ಪತ್ರೆಗೆ ದಾಖಲಾಗಿದ್ದರು. ಅವರಿಗೆ ಮೊದಲು ಆಂಜಿಯೋಗ್ರಾಮ್‌ ಗೆ ಒಳಗಾಗುವಂತೆ ಸಲಹೆ ನೀಡಲಾಗಿತ್ತು. ಈ ವೇಳೆ ಏಕನಾಳದ ಪರಿಧಮನಿಯ ಕಾಯಿಲೆ ಇರುವುದು ತಿಳಿದು ಬಂದಿತು. ಹೀಗಾಗಿ ಅವರಿಗೆ ಈ ನೂತನ ತಂತ್ರಜ್ಞಾನವಾದ ರೋಬೋಟಿಕ್ ಚಿಕಿತ್ಸೆ ನೀಡಲಾಯಿತು. ಈ ರೋಬೋಟಿಕ್‌ ಚಿಕಿತ್ಸೆಯೂ ಅತ್ಯಂತ ಸುರಕ್ಷಿತ ಹಾಗೂ ಉಪಯುಕ್ತವಾಗಿದೆ. ಎದೆ ಭಾಗದಲ್ಲಿ ಸಣ್ಣ ಛೇದವನ್ನು ನಿರ್ಮಿಸುವ ಮೂಲಕ ರೋಬೋಟಿಕ್‌ ಮೂಲಕ ಶಸ್ತ್ರಚಿಕಿತ್ಸೆ ನೆರವೇರಿಸಲಾಗುತ್ತದೆ. ಈ ಕಾರ್ಯವಿಧಾನದ ಮೂಲಕ ನಡೆಸುವ ಶಸ್ತ್ರಚಿಕಿತ್ಸೆಯಿಂದ ರಕ್ತಹಾನಿ ಹಾಗೂ ನೋವು ಕಡಿಮೆಯಾಗಲಿದೆ. ಜೊತೆಗೆ ರೋಗಿಯೂ ಕೇವಲ ಒಂದು ದಿನದಲ್ಲೇ ಮನೆಗೆ ತೆರಳಬಹುದು ಎಂದು ವಿವರಿಸಿದರು. ಈ ಮೂವರು ರೋಗಿಗಳು ತಮ್ಮ ರೊಬೋಟಿಕ್‌ ಚಿಕಿತ್ಸೆಯ ಬಳಿಕ ಶೀಘ್ರವೇ ಚೇತರಿಸಿಕೊಳ್ಳುವ ಜೊತೆಗೆ, ಶೇ.100ರಷ್ಟು ಶೇತರಿಕೆ ಕಾಣುತ್ತಿರುವುದು ವಿಶೇಷ ಎಂದು ಅವರು ತಿಳಿಸಿದರು.