ಪುತ್ತೂರು: ಬೆಳ್ಳಾರೆಯಲ್ಲಿ ಬಿಜೆಪಿ ಮುಖಂಡ ಪ್ರವೀಣ್ ಹತ್ಯೆಯ ಹಿಂದಿನ ಷಡ್ಯಂತ್ರವನ್ನು ಬಹಿರಂಗಗೊಳಿಸಬೇಕೆಂದು ದ.ಕ ಜಿಲ್ಲಾ ಮುಸ್ಲಿಂ ಯುವಜನ ಪರಿಷತ್ ಅಧ್ಯಕ್ಷ ಅಶ್ರಫ್ ಕಲ್ಲೇಗ ಪ್ರಕಟಣೆಯಲ್ಲಿ ಆಗ್ರಹಿಸಿದ್ದಾರೆ.
ಅದೇ ರೀತಿ ಈ ಪ್ರಕರಣದ ದಿಕ್ಕು ತಪ್ಪುವ ಲಕ್ಷಣಗಳು ಕಾಣುತ್ತಿದ್ದು, ರಾಜ್ಯ ಸರ್ಕಾರ ತೀವ್ರ ಒತ್ತಡಕ್ಕೆ ಒಳಗಾಗಿದೆ.ಅಮಾಯಕರು ಬಲಿ ಪಶುಗಳಾಗದಂತೆ ಜಾಗ್ರತೆ ವಹಿಸಬೇಕೆಂದು ಅವರು ಎಚ್ಚರಿಕೆ ನೀಡಿದ್ದಾರೆ.
ಅದೇ ರೀತಿ ಈ ಒಂದು ಪ್ರಕರಣವನ್ನು ಕಳಂಜ ಮಸೂದ್ ಹತ್ಯೆಗೆ ಪ್ರತೀಕಾರ ಎಂಬ ಆಯಾಮದ ಮೂಲಕ ಮಾತ್ರವಲ್ಲದೆ, ಮೃತ ಪ್ರವೀಣ್ ನ ತಂದೆ ಮಾಧ್ಯಮಗಳಿಗೆ ನೀಡಿದ ಹೇಳಿಕೆಯ ಆಧಾರದಂತೆ ಪ್ರವೀಣ್ ನಿಗೆ ಆತನ ಅಂಗಡಿಯ ಅಕ್ಕಪಕ್ಕದ ನಾಲ್ವರು ಶತ್ರುಗಳಿದ್ದು, ಅವರ ಮೇಲೆಯೂ ಸಂಶಯವಿದೆ. ಮಗನ ಅಂತಿಮ ದರ್ಶನಕ್ಕೆ ಆ ನಾಲ್ವರು ಬಂದಿಲ್ಲ ಎಂಬ ಹೇಳಿಕೆಯನ್ನೂ ಪೋಲಿಸ್ ಇಲಾಖೆ ಗಂಭೀರವಾಗಿ ಪರಿಗಣಿಸಿ, ಈ ಆಯಾಮದಲ್ಲೂ ತನಿಖೆ ನಡೆಸಿ ಪ್ರಕರಣದ ನೈಜ ಆರೋಪಿಗಳನ್ನು ಬಂಧಿಸಿ ಯಾವುದೇ ಕಾರಣಕ್ಕೂ ಅಮಾಯಕರು ಬಲಪಶುವಾಗದಂತೆ ಎಚ್ಚರಿಕೆ ವಹಿಸಬೇಕೆಂದು ಆಗ್ರಹಿಸಿದ್ದಾರೆ.
ಅದೇ ರೀತಿ ನಿನ್ನೆ ಶವ ಮೆರವಣಿಗೆ ಸಂದರ್ಭದಲ್ಲಿ ಮಸೀದಿಗೆ ಮತ್ತು ಅಂಗಡಿಗಳಿಗೆ ಕಲ್ಲೆಸೆದ ಹಾಗೂ ನಿಂತಿಕಲ್ ನಲ್ಲಿ ಮುಸ್ಲಿಂ ಯುವಕನಿಗೆ ಹಲ್ಲೆ ನಡೆಸಿ ಇನ್ನೊಬ್ಬ ಯುವಕನ ಬೈಕ್ ನ ಧ್ವಂಸಗೊಳಿಸಿದ ಸಂಘಪರಿವಾರದ ದುಷ್ಕರ್ಮಿಗಳ ಮೇಲೂ ಕಠಿಣ ಕಾನೂನು ಕ್ರಮ ಕೈಗೊಳ್ಳಬೇಕು. ಪರಿಹಾರ ಘೋಷಣೆಯಲ್ಲಿ ತಾರತಮ್ಯ ಧೋರಣೆ ತಾಳದೆ ಭಜರಂಗದಳದ ಗೂಂಡಾಗಳಿಂದ ಹತ್ಯೆಗೊಳಗಾದ ಮಸೂದ್ ಕುಟುಂಬಕ್ಕೂ ಸಮಾನ ರೀತಿಯ ಪರಿಹಾರ ನೀಡಬೇಕೆಂದು ಅವರು ಪ್ರಕಟಣೆಯಲ್ಲಿ ಆಗ್ರಹಿಸಿದ್ದಾರೆ.
