ಹೊಸದಿಲ್ಲಿ: ‘ಪಿಎಂ-ಪೋಷಣ್’ ಎನ್ನುವ ಮರುನಾಮಕರಣದೊಂದಿಗೆ ಜಾರಿಗೊಳ್ಳುತ್ತಿರುವ ಮಧ್ಯಾಹ್ನದ ಬಿಸಿಯೂಟ ಯೋಜನೆಯು ಕರ್ನಾಟಕ ಸೇರಿದಂತೆ ದಕ್ಷಿಣ ಭಾರತದಲ್ಲಿ ‘ಪದ ಅಪಭ್ರಂಶ’ ದಿಂದ ಚರ್ಚೆಗೆ ಒಳಗಾಗಿದೆ.
ವಿಶೇಷ ಸಂದರ್ಭಗಳಲ್ಲಿ ಶಾಲಾ ಮಕ್ಕಳಿಗೆ ಬಿಸಿಯೂಟದ ಜತೆಗೆ ಹಣ್ಣು ಹಂಪಲು, ಸಹಿ ತಿನಿಸು ನೀಡುವ ‘ತಿಥಿ ಭೋಜನ’ ಹೆಸರಿನ ಉಪ ಯೋಜನೆ ಆರಂಭಿಸಲಾಗಿದ್ದು , ಇದು ಕನ್ನಡದಲ್ಲಿ ಭಿನ್ನ ಅರ್ಥಕ್ಕೆ ಎಡೆಮಾಡಿಕೊಟ್ಟಿದೆ.
ಹಿಂದಿಯಲ್ಲಿ ‘ತಿಥಿ’ ಎಂದರೆ ದಿನಾಂಕ ಅಥವಾ ದಿನ ಎನ್ನುವ ಅರ್ಥ ಇದೆ. ವಿಶೇಷ ದಿನ ಎನ್ನುವ ಪರಿಕಲ್ಪನೆ ಇಟ್ಟುಕೊಂಡು ಕೇಂದ್ರ ಸರಕಾರ ‘ತಿಥಿ ಭೋಜನ’ ಪರಿಚಯಿಸಿದೆ . ಆದರೆ ದಕ್ಷಿಣ ಭಾರತದಲ್ಲಿ ಯಾರಾದರೂ ಸತ್ತ ಬಳಿಕ ನೆಂಟರಿಷ್ಟರಿಗೆ ನೀಡುವ ವಿಶೇಷ ಊಟಕ್ಕೆ ‘ತಿಥಿ ಊಟ’ ಎನ್ನುವ ವಾಡಿಕೆ ಇದೆ. ಇದನ್ನೇ ಅಪಹಾಸ್ಯ ಮಾಡಿ ಕೇಂದ್ರದ ಯೋಜನೆ ವಿರುದ್ಧ ಕೆಲವರು ಟೀಕಾಸ್ತ್ರ ಪ್ರಯೋಗಿಸಿದ್ದಾರೆ.
“ಟಿಕ ಉತ್ಸವದ ನಂತರ ಈಗ ತಿಥಿ ಭೋಜನ ಪ್ರಾರಂಭವಾಗಿದೆ. ದೇಶದ ವೈವಿಧ್ಯತೆಯನ್ನು ಮರೆತು ನೀವು ಒಂದು ಭಾಷೆಯನ್ನು ಮುಂದೆ ತಂದಾಗ ಇದು ಸಂಭವಿಸುತ್ತದೆ” ಎಂದು ಹೇಳಿದ್ದಾರೆ.
