ದಾವಣಗೆರೆ: ನಗರ ಪಾಲಿಕೆಯ ಮೇಯರ್, ಉಪ ಮೇಯರ್ ಸೇರಿ 50 ಸದಸ್ಯರ ಬ್ಯಾಂಕ್ ಖಾತೆಗಳಿಗೆ ತಲಾ 6 ಲಕ್ಷದಿಂದ 16 ಲಕ್ಷದವರೆಗೆ ಹಣ ಜಮಾವಣೆ ಆಗಿ, ಮತ್ತೆ ಬ್ಯಾಂಕ್ ಗೆ ವಾಪಸ್ಸಾದ ಘಟನೆ  ಬೆಳಕಿಗೆ ಬಂದಿದೆ.

ನಗರ ಪಾಲಿಕೆ ಮೇಯರ್, ಉಪ ಮೇಯರ್ ಹಾಗೂ ಆಡಳಿತ- ವಿಪಕ್ಷ ಸದಸ್ಯರು, ನಾಮ ನಿರ್ದೇಶಿತ ಸದಸ್ಯರು ಸೇರಿ ಒಟ್ಟು 50 ಜನರ ಖಾತೆಗಳಿಗೆ 3 ಕೋಟಿಗೂ ಅಧಿಕ ಹಣ ಜಮೆ ಆಗಿದ್ದು, ಬ್ಯಾಂಕ್ ನ ಸಿಬ್ಬಂದಿ ಹಣ ಜಮಾ ಮಾಡುವ ವೇಳೆ ಎರಡು ಸೊನ್ನೆ ಹೆಚ್ಚು ಸೇರಿಕೊಂಡಿದ್ದರಿಂದ  ಅವಾಂತರವಾಗಿದೆ ಎಂದು ತಿಳಿದುಬಂದಿದೆ.

ಇದರಿಂದಾಗಿ ಮೇಯರ್ ಗೆ 16 ಸಾವಿರ, ಉಪ ಮೇಯರ್ ಗೆ 10 ಸಾವಿರ, ಸದಸ್ಯರಿಗೆ ತಲಾ 6 ಸಾವಿರ ರೂ ಗಳಂತೆ ನೀಡಬೇಕಾಗಿದ್ದ ಗೌರವಧನ ಸಾವಿರದ ಬದಲು ಲಕ್ಷ ಲೆಕ್ಕದಲ್ಲಿ ಜಮಾವಣೆಯಾಗಿದೆ.ಈ ಕುರಿತು  ಎಚ್ಚೆತ್ತ ಬ್ಯಾಂಕಿ ಸಿಬ್ಬಂದಿಗಳು ಸದಸ್ಯರ ಖಾತೆಯಲ್ಲಿದ್ದ ಹಣ ಬ್ಲಾಕ್ ಮಾಡಿದ್ದಾರೆ. ನಗರ ಪಾಲಿಕೆಗೆ ಮಾಹಿತಿಯನ್ನು ನೀಡಿ ಸದಸ್ಯರಿಗೆ ಕರೆ ಮಾಡಿ, ಹಣವನ್ನು ವಾಪಸ್ ಪಡೆದಿದ್ದಾರೆ.