ದಕ್ಷಿಣ ಅಫ್ರಿಕಾ ವಿರುದ್ಧದ ಮೊದಲ ಟಿ20 ಪಂದ್ಯ| ಭಾರತದ ಗೆಲುವಿಗೆ 107 ರನ್‌ ಗುರಿ

ತಿರುವನಂತಪುರಂ: 3ನೇ ಓವರ್‌ನಲ್ಲಿ 9 ರನ್‌ಗಳಿಸುವಷ್ಟರಲ್ಲಿ 5 ವಿಕೆಟ್‌ ಕಳೆದುಕೊಂಡು ಇನ್ನೇನು ಅಲ್ಪಮೊತ್ತಕ್ಕೆ ಇನ್ನಿಂಗ್ಸ್‌ ಮುಗಿಸುವ ಸೂಚನೆ ನೀಡಿದ್ದ ಆಫ್ರಿಕಾ, ಅಂತಿಮವಾಗಿ ನಿಗಧಿತ 20 ಓವರ್‌ ಬ್ಯಾಟಿಂಗ್‌ ಮಾಡುವಲ್ಲಿ ಯಶಸ್ವಿಯಾಗಿದ್ದು, 8 ವಿಕೆಟ್‌ ನಷ್ಟದಲ್ಲಿ 106 ರನ್‌ಗಳಿಸಿದೆ. ತಿರುವನಂತಪುರಂನ ಗ್ರೀನ್‌ ಫೀಲ್ಡ್‌ ಸ್ಟೇಡಿಯಂನಲ್ಲಿಟಾಸ್‌ ಗೆದ್ದ ರೋಹಿತ್‌ ಶರ್ಮಾ, ಪ್ರವಾಸಿ ತಂಡವನ್ನು ಬ್ಯಾಟಿಂಗ್‌ ಆಹ್ವಾನಿಸಿತ್ತು. ಭಾರತದ ಪರ ಬೌಲಿಂಗ್‌ ದಾಳಿ ಆರಂಭಿಸಿದ್ದ ದೀಪಕ್‌ ಚಹಾರ್‌ ಮತ್ತು ಅರ್ಷ್‌ದೀಪ್‌ ಸಿಂಗ್‌, ತಮಗೆ ದೊರೆಕಿದ ಅವಕಾಶವನ್ನು ಅತ್ಯುತ್ತಮವಾಗಿಯೇ ಬಳಸಿಕೊಂಡರು.

ಅರ್ಷ್‌ದೀಪ್‌ ತಾವು ಎಸೆದ ಮೊದಲ ಓವರ್‌ನಲ್ಲೇ (ಇನ್ನಿಂಗ್ಸ್‌ನ ಎರಡನೇ ಓವರ್‌) ಮೂರು ವಿಕೆಟ್‌ ಪಡೆಯುವ ಮೂಲಕ ಆರಂಭದಲ್ಲೇ ಆಫ್ರಿಕಾಗೆ ಆಘಾತವಿಕ್ಕಿದರು.  ದೀಪಕ್‌ ಚಾಹರ್‌ ಮೊದಲನೇ ಮತ್ತು ಎರಡನೇ ಓವರ್‌ನಲ್ಲಿ ತಲಾ ಒಂದು ವಿಕೆಟ್‌ ಪಡೆದರು. ಆ ಮೂಲಕ ತೆಂಬಾ ಬವುಮಾ ಪಡೆ 2.3 ಓವರ್‌ಗಳಲ್ಲಿ 9 ರನ್‌ಗಳಿಸುವಷ್ಟರಲ್ಲಿ 5 ವಿಕೆಟ್‌ ಕಳೆದುಕೊಂಡು ತೀವ್ರ ಸಂಕಷ್ಟಕ್ಕೆ ಸಿಲುಕಿತ್ತು.

- Advertisement -

ಆದರೆ ಆ ಬಳಿಕ ಏಡೆನ್‌ ಮಾರ್ಕಮ್‌ (25 ರನ್‌), ಬೌಲರ್‌ಗಳಾದ ವೇಯ್ನ್‌ ಪಾರ್ನೆಲ್‌ 24 ರನ್‌ ಹಾಗೂ ಕೇಶವ್‌ ಮಹಾರಾಜ್‌41 ರನ್‌ಗಳಿಸಿ ತಂಡವು ಮೂರಂಕಿಯ ಮೊತ್ತವನ್ನು ದಾಟುವಲ್ಲಿ ಜೊತೆಗೂಡಿದರು. ಅರ್ಷದೀಪ್‌ ಸಿಂಗ್‌ 3 ವಿಕೆಟ್‌, ದೀಪಕ್‌ ಚಹಾರ್‌ ಮತ್ತು ಹರ್ಷಲ್‌ ಪಟೇಲ್‌ ತಲಾ 2 ವಿಕೆಟ್‌ ಪಡೆದರು. ಅಕ್ಷರ್‌ ಪಟೇಲ್‌ 1 ವಿಕೆಟ್‌ ಪಡೆದರು.