ಗುಲಾಂ ನಬಿ ಆಝಾದ್ ರಿಂದ ‘ಡೆಮಾಕ್ರೆಟಿಕ್ ಆಜಾದ್ ಫೋರ್ಸ್’ ಎಂಬ ಹೊಸ ಪಕ್ಷ ಆರಂಭ

ನವದೆಹಲಿ: ಇತ್ತೀಚೆಗೆ ಕಾಂಗ್ರೆಸ್ ಪಕ್ಷ ತೊರೆದಿದ್ದ ಹಿರಿಯ ನಾಯಕ ಗುಲಾಂ ನಬಿ ಆಝಾದ್ ಅವರು ಜಮ್ಮು ಮತ್ತು ಕಾಶ್ಮೀರದಲ್ಲಿ ಡೆಮಾಕ್ರೆಟಿಕ್ ಆಜಾದ್ ಫೋರ್ಸ್ ಎಂಬ ಹೊಸ ಪಕ್ಷವನ್ನು ಇಂದು ಶ್ರೀನಗರದಲ್ಲಿ ಆರಂಭಿಸಿರುವುದಾಗಿ ಪ್ರಕಟಿಸಿದರು.

ಯಾವುದೇ ವಶೀಲಿಬಾಜಿಯಿಂದ ಮುಕ್ತವಾದ ಜಾತ್ಯತೀತ, ಪ್ರಜಾಸತ್ತಾತ್ಮಕ, ಸ್ವತಂತ್ರ ಪಕ್ಷ ನಮ್ಮದು ಎಂದು ಈ ಸಂದರ್ಭದಲ್ಲಿ ಗುಲಾಂ ನಬಿ ಆಝಾದ್ ತಿಳಿಸಿದರು.

ಜಮ್ಮು ಮತ್ತು ಕಾಶ್ಮೀರದ ಮಾಜಿ ಮುಖ್ಯಮಂತ್ರಿಯಾದ ಗುಲಾಂ ನಬಿ ಆಝಾದ್ ಅವರು ಕೇಂದ್ರ ಸಚಿವರೂ ಆಗಿದ್ದವರು. ಕಾಂಗ್ರೆಸ್ ಬಿಟ್ಟು ತಿಂಗಳಾಗುವುದರೊಳಗೆ ಸೆಪ್ಟೆಂಬರ್ 26, 2022ರಂದು ತನ್ನ ಹೊಸ ಪಕ್ಷವನ್ನು ಆರಂಭಿಸಿದ್ದಾರೆ.

ಆಗಸ್ಟ್ 26ರಂದು ಅವರು ಕಾಂಗ್ರೆಸ್ ಪಕ್ಷಕ್ಕೆ ರಾಜೀನಾಮೆ ನೀಡಿ ಹೊರ ಬಂದಿದ್ದರು. ಇಂದಿಗೆ ಒಂದು ತಿಂಗಳು; ಇಂದೇ ಹೊಸ ಪಕ್ಷವನ್ನು ತಮ್ಮ ಬೆಂಬಲಿಗರೊಡನೆ ಸೇರಿ ಆರಂಭಿಸಿದ್ದಾರೆ. ರಾಜಕೀಯದಲ್ಲಿ ಯಾರೂ ಶತ್ರುಗಳಲ್ಲ; ಮಿತ್ರರೂ ಅಲ್ಲ. ಜನರ ಒಳಿತಿಗಾಗಿ ದುಡಿಯಲು ಇದೊಂದು ದಾರಿ ಎಂದೂ ಅವರು ತಿಳಿಸಿದರು.