ಹಾಲಿವುಡ್ ತಾರೆ ಮತ್ತು ‘ವಂಡರ್ ವುಮನ್ 1994’ (ಅದ್ಭುತ ಮಹಿಳೆ 1994) ಖ್ಯಾತಿಯ ಗಾಲ್ ಗ್ಯಾಡೊಟ್, ಸಿ.ಎ.ಎ- ಎನ್.ಆರ್.ಸಿ ವಿರೋಧಿ ಹೋರಾಟಗಾರ್ತಿ ಬಿಲ್ಕಿಸ್ ದಾದಿಯನ್ನು ತನ್ನ ವೈಯಕ್ತಿಕ ಅದ್ಭುತ ಮಹಿಳೆಯರಲ್ಲಿ ಒಬ್ಬರು ಎಂಬುದಾಗಿ ಕರೆದಿದ್ದಾರೆ. ತನ್ನ ಮೇಲೆ ಪ್ರಭಾವ ಬೀರಿದ ಜೀವನದ ಹಲವು ಕ್ಷೇತ್ರಗಳ ಮಹಿಳೆಯರನ್ನು ಗ್ಯಾಡೊಟ್ ಗುರುವಾರದಂದು ಆರಿಸಿದ್ದಾರೆ.
“ನನ್ನ ವೈಯಕ್ತಿಕ ಅದ್ಭುತ ಮಹಿಳೆಯರಿಗೆ ಪ್ರೀತಿಯೊಂದಿಗೆ ನಾನು 2020ನೆ ವರ್ಷಕ್ಕೆ ವಿದಾಯ ಹೇಳುತ್ತಿದ್ದೇನೆ; ಅವರಲ್ಲಿ ಕೆಲವರು ನನಗೆ ಬಹಳ ಹತ್ತಿರದವರು – ನನ್ನ ಕುಟುಂಬಿಕರು, ನನ್ನ ಸ್ನೇಹಿತರು – ಕೆಲವರು ನಾನು ಬಹಿರಂಗಪಡಿಸಲು ಬಯಸುವ ಸ್ಫೂರ್ತಿದಾಯಕ ಮಹಿಳೆಯರು ಮತ್ತು ಕೆಲವರು ನಾನು ಭವಿಷ್ಯದಲ್ಲಿ ಭೇಟಿಯಾಗ ಬಯಸುವ ಅಸಾಧಾರಣಾ ಮಹಿಳೆಯರಾಗಿದ್ದಾರೆ” ಎಂದು ಅವರು ಬರೆದಿದ್ದಾರೆ.
ಗ್ಯಾಡೊಟ್ ರ ಕುಟುಂಬ, ಸ್ನೇಹಿತರು, ಯುವ ಹುಡುಗಿಯರು ಮತ್ತು ಇತರ ಮಹಿಳಾ ವ್ಯಕ್ತಿಗಳನ್ನೊಳಗೊಂಡ ಕೆಲವೇ ಮಹಿಳೆಯರ ಪಟ್ಟಿಯಲ್ಲಿ ಬಿಲ್ಕೀಸ್ ದಾದಿ ಸ್ಥಾನ ಪಡೆದಿದ್ದಾರೆ.
ಬಿಲ್ಕೀಸ್ ದಾದಿಯ ಚಿತ್ರವನ್ನು ಇನ್ ಸ್ಟಾಗ್ರಂನಲ್ಲಿ ಹಂಚಿಕೊಂಡ ಗ್ಯಾಡೊಟ್, “ಭಾರತದಲ್ಲಿ ಮಹಿಳೆಯರ ಸಮಾನತೆಗಾಗಿ ಹೋರಾಡುತ್ತಿರುವ 82ರ ಹರೆಯದ ಈ ಹೋರಾಟಗಾರ್ತಿ ನೀವು ನಂಬಿಕೆಯಿಟ್ಟಿರುವುದಕ್ಕಾಗಿ ಹೋರಾಡಲು ಎಂದಿಗೂ ತಡವಾಗಿಲ್ಲ ಎಂದು ನನಗೆ ತೋರಿಸಿಕೊಟ್ಟಿದ್ದಾರೆ” ಎಂದು ಬರೆದಿದ್ದಾರೆ.
82ರ ಹರೆಯದ ಬಿಲ್ಕೀಸ್ ದಾದಿಯೆಂದೇ ಖ್ಯಾತರಾದ ಬಿಲ್ಕೀಸ್ ಬಾನು ಸಿ.ಎ.ಎ- ಎನ್.ಆರ್.ಸಿ ವಿರುದ್ಧ ಸುಮಾರು ಮೂರು ತಿಂಗಳುಗಳ ಕಾಲ ಶಾಹೀನ್ ಬಾಗ್ ನಲ್ಲಿ ಟೆಂಟ್ ನಡಿ ಹೋರಾಟ ಮಾಡಿದ್ದರು.
