ಬೆಂಗಳೂರು: ಬೆಂಗಳೂರಿನಿಂದ ಕನ್ಯಾಕುಮಾರಿಗೆ ಸೈಕಲ್ ನಲ್ಲೇ ಬರೀ 36 ಗಂಟೆಗಳಲ್ಲಿ ಏಕಾಂಗಿಯಾಗಿ ಪ್ರಯಾಣ ಮಾಡುವ ಮೂಲಕ ಯೋಧರೊಬ್ಬರು ಇಂಡಿಯಾ ಬುಕ್ ಆಫ್ ರೆಕಾರ್ಡ್ಸ್ ನಲ್ಲಿ ದಾಖಲೆ ನಿರ್ಮಿಸಿದ್ದಾರೆ.
ಬೆಂಗಳೂರಿನ 515 ಆರ್ಮಿ ಬೇಸ್ ನ ಕ್ರಾಫ್ಟ್ಸ್ ಮ್ಯಾನ್ ರಾಹುಲ್ ಕುಮಾರ್ ಜುಲೈ 8-9ರ ಒಟ್ಟು 36 ಗಂಟೆಗಳಲ್ಲಿ 650 ಕಿ.ಮೀ. ದೂರವನ್ನು ಕ್ರಮಿಸಿ ಈ ಸಾಧನೆ ಮಾಡಿದ್ದಾರೆ. ಈ ಮೂಲಕ ಇವರು ಪುರುಷರ ವಿಭಾಗದಲ್ಲಿ ಅತಿವೇಗದ ಏಕಾಂಗಿ ಸೈಕಲ್ ಸವಾರಿ ಎಂಬ ದಾಖಲೆಯನ್ನು ಇಂಡಿಯನ್ ಬುಕ್ ಆಫ್ ರೆಕಾರ್ಡ್‌ ನಲ್ಲಿ ಬರೆದಿದ್ದಾರೆ.
ಫಿಟ್‌ ನೆಸ್ ಎ ವೇ ಆಫ್ ಲೈಫ್’ ಎಂಬುದರ ಅಂಗವಾಗಿ ಈ ಕಾರ್ಯಕ್ರಮ ಹಮ್ಮಿಕೊಳ್ಳಲಾಗಿತ್ತು. ಬ್ರಿಗೇಡಿಯರ್ ಎಂಆರ್‌ ಕೆ ರಾಜೇಶ್‌ ಪಣಿಕರ್, ಬ್ರಿಗೇಡಿಯರ್ ಅಲೋಕ್ ಜೈನ್ ಅವರು ಜು. 8ರ ಬೆಳಗ್ಗೆ 6ಕ್ಕೆ ಬೆಂಗಳೂರಿನ 515 ಆರ್ಮಿ ಬೇಸ್ ವರ್ಕ್‌ಶಾಪ್‌ನಲ್ಲಿ ಪ್ರಯಾಣಕ್ಕೆ ಹಸಿರು ನಿಶಾನೆ ತೋರಿದರು. ರಾಹುಲ್ ಜು.9ರಂದು ತಮಿಳುನಾಡಿನ ಕನ್ಯಾಕುಮಾರಿಯನ್ನು ತಲುಪಿದ್ದರು.
ಹೊಸೂರು, ಸೇಲಂ, ಮಧುರೈ ಮೂಲಕ ಈ ಪ್ರಯಾಣ ಸಾಗಿದ್ದು, ಪ್ರಯಾಣದುದ್ದಕ್ಕೂ ಮಳೆಯಾಗುತ್ತಿದ್ದರೂ ಇವರು ಗುರಿಯನ್ನು ತಲುಪುವಲ್ಲಿ ಯಶಸ್ವಿಯಾಗಿದ್ದಾರೆ. ಇದನ್ನು ಇಂಡಿಯನ್ ಬುಕ್ ಆಫ್ ರೆಕಾರ್ಡ್ಸ್ ಆನ್‌ ಲೈನ್‌ನಲ್ಲೇ ನಿಗಾ ವಹಿಸಿತ್ತು.
