ಸ್ಪೇನ್: BWF ವಿಶ್ವ ಚಾಂಪಿಯನ್’ಶಿಪ್‌ನ ಪುರುಷರ ಸಿಂಗಲ್ಸ್ ವಿಭಾಗದಲ್ಲಿ ಫೈನಲ್ ಪ್ರವೇಶಿಸಿ ಇತಿಹಾಸ ನಿರ್ಮಿಸಿದ್ದ ಕಿದಂಬಿ ಶ್ರೀಕಾಂತ್, ವಿಶ್ವ ಚಾಂಪಿಯನ್ ಆಗುವ ಕನಸು ಭಗ್ನಗೊಂಡಿದೆ. ಭಾನುವಾರ ನಡೆದ ಫೈನಲ್ ಹಣಾಹಣಿಯಲ್ಲಿ ಸಿಂಗಾಪುರದ ಕೀನ್ ಯೆವ್ ಲೋಹ್ 21-14, 21-20 ನೇರ ಸೆಟ್’ಗಳ ಅಂತರದಲ್ಲಿ ಶ್ರೀಕಾಂತ್’ರನ್ನು ಮಣಿಸುವ ಮೂಲಕ ಪ್ರಶಸ್ತಿ ಗೆದ್ದು ಸಂಭ್ರಮಿಸಿದರು. ಫೈನಲ್ ಫೈಟ್’ನಲ್ಲಿ ಸೋತರೂ, ಕಿದಂಬಿ ಶ್ರೀಕಾಂತ್ ಬೆಳ್ಳಿ ಪದಕ ಗೆದ್ದು ವಿನೂತನ ದಾಖಲೆ ನಿರ್ಮಿಸಿದ್ದಾರೆ.
12ನೇ ಶ್ರೇಯಾಂಕದ ಭಾರತದ ಸ್ಟಾರ್ ಆಟಗಾರ ಶ್ರೀಕಾಂತ್, ಪಂದ್ಯನ್ನು ಉತ್ತಮವಾಗಿಯೇ ಆರಂಭಿಸಿದ್ದರು. ಮೊದಲ ಗೇಮ್’ನಲ್ಲಿ ಶ್ರೀಕಾಂತ್ 11-7ರಲ್ಲಿ ಮುನ್ನಡೆ ಸಾಧಿಸಿದ್ದರು. ಆದರೆ ಬಳಿಕ ಕಮ್’ಬ್ಯಾಕ್ ಮಾಡಿದ ಸಿಂಗಾಪುರದ ಶಟ್ಲರ್, 17-13 ಅಂತರದಲ್ಲಿ ಮುನ್ನಡೆ ಪಡೆದರು. ಬಳಿಕ ಆಕ್ರಮಣಕಾರಿ ಆಟವಾಡಿದ ಕೀನ್ ಯೆವ್ ಕೇವಲ 16 ನಿಮಿಷಗಳಲ್ಲಿ 21-15 ಅಂತರದಲ್ಲಿ ಮೊದಲ ಗೇಮ್ ಅನ್ನು ತಮ್ಮದಾಗಿಸಿಕೊಂಡರು.
ಎರಡನೇ ಗೇಮ್‌ನಲ್ಲಿ ಆರಂಭದಿಂದಲೂ ಉಭಯ ಆಟಗಾರರಿಂದಲೂ ಸಮಬಲದ ಹೋರಾಟ ಕಂಡುಬಂತು. 9-9 ರಲ್ಲಿ ಸಮಬಲ ಸಾಧಿಸಿದ ಬಳಿಕ ಲೋಹ್ ಸತತ ಎರಡು ಪಾಯಿಂಟ್‌’ಗಳಿಸಿ 11-9 ಮುನ್ನಡೆ ಸಾಧಿಸಿದರು. ಬಳಿಕ ಹಿನ್ನಡೆಯಲ್ಲಿದ್ದ ಶ್ರೀಕಾಂತ್ ದಿಟ್ಟ ತಿರುಗೇಟು ನೀಡಿ 14-14ರಲ್ಲಿ ಸಮಬಲ ಸಾಧಿಸಿದರು. ಆದರೆ ಅಂತಿಮವಾಗಿ 21-20 ಅಂತರದಲ್ಲಿ ಸಿಂಗಾಪುರದ ಕೀನ್ ಯೆವ್ ಲೋಹ್ ಸೆಟ್’ಗೆಲ್ಲುವ ಮೂಲಕ ಚಾಂಪಿಯನ್ ಪಟ್ಟಕ್ಕೇರಿದರು.
ವಿಶ್ವ ಬ್ಯಾಡ್ಮಿಂಟನ್ ಚಾಂಪಿಯನ್’ಶಿಪ್’ನ ಪುರುಷರ ವಿಭಾಗದಲ್ಲಿ ಈ ಹಿಂದೆ ಭಾರತದ ಪ್ರಕಾಶ್ ಪಡುಕೋಣೆ, ಬಿ. ಸಾಯಿ ಪ್ರಣೀತ್ ಕಂಚಿನ ಪದಕ ಗೆದ್ದ ಸಾಧನೆ ಮಾಡಿದ್ದರೂ ಸಹ ಫೈನಲ್ ಪ್ರವೇಶಿಸಲು ವಿಫಲರಾಗಿದ್ದರು.
