ಜೆರುಸಲೆಮ್: ಇಸ್ರೇಲ್ ವಾಯುಪಡೆ ಭಾನುವಾರ ಮುಂಜಾನೆ ಗಾಝಾದ ಎರಡು ಸ್ಥಳಗಳ ಮೇಲೆ ದಾಳಿ ನಡೆಸಿದೆ ಎಂದು ಫೆಲೆಸ್ತೀನ್ ಸೈನ್ಯ ತಿಳಿಸಿದೆ. ಗಾಝಾದ ಗಡಿಯಲ್ಲಿ ಹಮಾಸ್- ಇಸ್ರೇಲ್ ಗಳ ಮಧ್ಯೆ ಉಂಟಾದ ಉದ್ವಿಗ್ನತೆ ಹಿನ್ನೆಲೆಯಲ್ಲಿ ಇಸ್ರೇಲ್ ಪಡೆ ಫೆಲೆಸ್ತೀನ್ ನ ಮೇಲೆ ವೈಮಾನಿಕ ದಾಳಿ ನಡೆಸಿ ಭೀಕರತೆ ಮೆರೆದಿದೆ ಎಂದು ಹೇಳಲಾಗುತ್ತಿದೆ.
ಹಮಾಸ್ ಬಂಡುಕೋರರ ಶಸ್ತ್ರಾಸ್ತ್ರ ತಯಾರಿಕ ಘಟಕ ಮತ್ತು ತರಬೇತಿ ಕೇಂದ್ರವನ್ನು ಗುರಿಯಾಗಿಸಿ ಹಮಾಸ್ ನ ಮಿಲಿಟರಿ ಕಂಪೌಂಡ್ ಮತ್ತು ಜಬಾಲಿಯಾ ಪ್ರವೇಶದ್ವಾರವನ್ನು ಹೊಡೆದುರುಳಿಸಿಲು ಈ ದಾಳಿ ನಡೆಸಲಾಗಿದೆಯೆಂದು ಇಸ್ರೇಲ್ ಸೇನೆ ತಿಳಿಸಿದೆ.
ಹಮಾಸ್ ಬಂಡುಕೋರರು ನಿನ್ನೆ ಇಸ್ರೇಲ್ ನ ವಿರುದ್ಧ ಬೆಂಕಿಯ ಬಲೂನ್ ಗಳನ್ನು ಹಾರಿಸಿ ದಾಳಿ ನಡೆಸಿದ ಕೃತ್ಯಕ್ಕೆ ಪ್ರತಿಕಾರವಾಗಿ ಈ ದಾಳಿ ನಡೆಸಲಾಗಿದೆಯೆಂದು ತನ್ನ ನಡೆಯನ್ನು ಇಸ್ರೇಲ್ ಸಮರ್ಥಿಸಿದೆ. ಇಸ್ರೇಲ್ ಆರೋಪವನ್ನು ನಿರಾಕರಿಸಿರುವ ಹಮಾಸ್ ಬಂಡುಕೋರರ ಪಡೆ ನಮ್ಮ ಕಡೆಯಿಂದ ಯಾವುದೇ ದಾಳಿ ನಡೆದಿಲ್ಲವೆಂದು ತಿಳಿಸಿದೆ.
ಶನಿವಾರ ಸಂಜೆ ಫೆಲೆಸ್ತೀನ್ ಸುತ್ತಮುತ್ತಲಿನ ಎಶ್ಕೋಲ್ ಪ್ರದೇಶದಲ್ಲಿ ಕಾಡ್ಗಿಚ್ಚು ನಡೆದಿದ್ದವು ಎಂದು ಇಸ್ರೇಲ್ ಅಗ್ನಿಶಾಮಕ ದಳದಳು ತಿಳಿಸಿವೆ. ಈ ಹಿನ್ನೆಲೆಯಲ್ಲಿ ಪ್ರತಿಭಟನೆ ಭುಗಿಲೆದ್ದು ಹಿಂಸಾತ್ಮಕ ರೂಪತಾಳಿದೆಯೆಂದು ಪ್ರತ್ಯಕ್ಷದರ್ಶಿಗಳು ತಿಳಿಸಿದ್ದಾರೆ. ಇದರ ಮಧ್ಯೆ ಇಸ್ರೇಲ್ ಸೇನೆ ಅಶ್ರುವಾಯು ಮತ್ತು ಗ್ರೆನೇಡ್ ಗಳನ್ನು ಉಪಯೋಗಿಸಿ ಫೆಲೆಸ್ತೀನ್ ಜನತೆಯ ದಾಳಿ ನಡೆಸಿ ಭೀಕರತೆ ಮೆರೆದಿದೆ . ಫೆಲೆಸ್ತೀನ್ ಜನತೆ ಗಾಝಾ ಮತ್ತು ಇಸ್ರೇಲ್ ಗಡಿಯಲ್ಲಿ ಟೈರ್ ಗಳನ್ನು ಸುಟ್ಟು ಹಾಕಿದ್ದರು ಮಾಧ್ಯಮಗಳು ವರದಿ ಮಾಡಿದ್ದವು.
ಇಸ್ರೇಲ್- ಫೆಲೆಸ್ತೀನ್ ನಡುವೆ ಉಂಟಾದ ಘರ್ಷಣೆಯಲ್ಲಿ 11 ಫೆಲೆಸ್ತೀನಿಯರು ಗಾಯಗೊಂಡಿದ್ದಾರೆಂದು ಗಾಝಾ ಆರೋಗ್ಯ ಸಚಿವಾಲಯ ತಿಳಿಸಿದೆ. ಮಾತ್ರವಲ್ಲದೆ ಉಭಯ ಗಡಿಯಲ್ಲಿ ಇನ್ನೂ ಉದ್ವಿಗ್ನತೆ ಮುಂದುವರಿದಿದೆಯೆಂದು ಹೇಳಲಾಗುತ್ತಿದೆ.
