ಸಿಎಎಯನ್ನು ತಿರಸ್ಕರಿಸಿದ ಕ್ರಿಶ್ಚಿಯನ್ ಪಾದ್ರಿಗಳ ಸಂಸ್ಥೆ

0
100

ಹೈದರಾಬಾದ್: ಕ್ರಿಶ್ಚಿಯನ್ ಪಾದ್ರಿಗಳ ಸಂಸ್ಥೆ ಫೆಡರೇಷನ್ ಆಫ್ ತೆಲುಗು ಚರ್ಚಸ್(ಎಫ್‌ಟಿಸಿ) ಇತ್ತೀಚೆಗೆ ಪೌರತ್ವ ತಿದ್ದುಪಡಿ ಕಾಯ್ದೆ(ಸಿಎಎ), ನಾಗರಿಕರ ರಾಷ್ಟ್ರೀಯ ನೋಂದಣಿ(ಎನ್‌ಆರ್‌ಸಿ) ಮತ್ತು ರಾಷ್ಟ್ರೀಯ ಜನಸಂಖ್ಯಾ ನೋಂದಣಿ(ಎನ್‌ಪಿಆರ್)ಯನ್ನು ಸಂಪೂರ್ಣವಾಗಿ ತಿರಸ್ಕರಿಸಿದೆ.
ಒಕ್ಕೂಟವು ತನ್ನ ವಾರ್ಷಿಕ ಸಾಮಾನ್ಯ ಸಭೆಯಲ್ಲಿ ಅಂಗೀಕರಿಸಿದ ನಿರ್ಣಯವೊಂದರಲ್ಲಿ, ಸಿಎಎ ಭಾರತೀಯ ಸಂವಿಧಾನದಲ್ಲಿ ಪ್ರತಿಪಾದಿಸಿರುವ ಸಮಾನತೆ ಮತ್ತು ಜಾತ್ಯತೀತತೆಯ ಹಕ್ಕನ್ನು ಉಲ್ಲಂಘಿಸುವುದರಿಂದ ಮುಸ್ಲಿಮರನ್ನು ಇತರ ಧರ್ಮಗಳಿಗಿಂತ ಭಿನ್ನವಾಗಿ ಪರಿಗಣಿಸುತ್ತದೆ ಎಂದು ತಿಳಿಸಿದೆ.
ಸಿಎಎ ಮೊದಲ ಬಾರಿಗೆ ಪೌರತ್ವವನ್ನು ಧರ್ಮದೊಂದಿಗೆ ಸಂಪರ್ಕಿಸುತ್ತದೆ, ಮುಸ್ಲಿಮರನ್ನು ಇತರ ಧರ್ಮಗಳಿಗಿಂತ ಭಿನ್ನವಾಗಿ ಪರಿಗಣಿಸುತ್ತದೆ, ನಮ್ಮ ಸಂವಿಧಾನದಲ್ಲಿ ಪ್ರತಿಪಾದಿಸಿರುವ ಸಮಾನತೆ ಮತ್ತು ಜಾತ್ಯಾತೀತತೆಯ ಹಕ್ಕನ್ನು ಉಲ್ಲಂಘಿಸುತ್ತದೆ ಎಂದು ಕ್ರಿಶ್ವಿಯನ್ ಪಾದ್ರಿಗಳು ಗಮನಿಸಿದ್ದಾರೆ.
‘‘ಮುಸ್ಲಿಮರನ್ನು ಹೊರತುಪಡಿಸುವ ಪೌರತ್ವ ಕಾಯ್ದೆಯ ಇತ್ತೀಚಿನ ತಿದ್ದುಪಡಿ ನಮ್ಮ ರಾಷ್ಟ್ರದ ಆತ್ಮ ಮತ್ತು ಯಾವುದೇ ತಾರತಮ್ಯ ಮತ್ತು ಭೇದವಿಲ್ಲದೆ ಆತಿಥ್ಯ, ಸಹಿಷ್ಣುತೆ ಮತ್ತು ಎಲ್ಲರ ಸ್ವೀಕಾರದ ಮೌಲ್ಯಗಳನ್ನು ಯಾವಾಗಲೂ ಪಾಲಿಸುವ ಭಾರತೀಯ ನಾಗರಿಕತೆಯ ಮನೋಭಾವಕ್ಕೆ ವಿರುದ್ಧವಾಗಿದೆ’’ ಎಂದು ಅವರು ಹೇಳಿದ್ದಾರೆ.
ಪ್ರಸ್ತುತ ಎನ್‌ಪಿಆರ್ ಮತ್ತು ಎನ್‌ಆರ್‌ಸಿ ಪ್ರಕ್ರಿಯೆಗಳು ಮುಸ್ಲಿಮರನ್ನಷ್ಟೇ ಅಲ್ಲ, ಎಲ್ಲರ ಮೇಲೂ ಪರಿಣಾಮ ಬೀರುತ್ತದೆ ಎಂದು ಅವರು ಹೇಳಿದ್ದಾರೆ. ಅವರು ಮಾಡಿರುವ ಬದಲಾವಣೆಗಳು ಅವರ ಜನ್ಮ ಮತ್ತು ಹೆತ್ತವರ ದಾಖಲೆಗಳನ್ನು ತೋರಿಸಲಾಗದವರಿಗೆ ಅಪಾಯಕಾರಿ. ಅಸ್ಸಾಂನಲ್ಲಿ ಈಗಾಗಲೇ ನಡೆದಂತೆ, ಬಡವರು, ಭೂಹೀನರು, ಮಹಿಳೆಯರು, ಅಲ್ಪಸಂಖ್ಯಾತರು, ದಲಿತರು, ಆದಿವಾಸಿಗಳು, ಅನಕ್ಷರಸ್ಥರು ಮತ್ತು ಅಲೆಮಾರಿ ಹಾಗೂ ವಲಸೆ ಸಮುದಾಯಗಳು ತಾವು ಯಾವ ಧರ್ಮಕ್ಕೆ ಸೇರಿದವರಾಗಿರಬಹುದು ಎಂಬುದರ ಮೇಲೆ ಹೆಚ್ಚು ಪರಿಣಾಮ ಬೀರುತ್ತದೆ.
ಅವರಲ್ಲಿ ಹೆಚ್ಚಿನವರಿಗೆ ‘‘ಅನುಮಾನಾಸ್ಪದ ನಾಗರಿಕರು’’ ಎಂಬ ಲೇಬಲ್ ಹಾಕಲಾಗಿದೆ ಮತ್ತು ಅವರು ತಮ್ಮ ಪೌರತ್ವ ಕಳೆದುಕೊಳ್ಳುವುದರ ಜೊತೆಗೆ ಮೂಲಭೂತ ಹಕ್ಕುಗಳಾದ ಮತದಾನ, ಆಸ್ತಿಯ ಹಕ್ಕು ಹಾಗೂ ಮೀಸಲಾತಿಯಂತಹ ಸಾಂವಿಧಾನಿಕ ಸವಲತ್ತುಗಳನ್ನು ಕಳೆದುಕೊಳ್ಳುತ್ತಾರೆ ಎಂದು ಸಭೆಯು ತಿಳಿಸಿದೆ. ಈ ಪ್ರಕ್ರಿಯೆಯು ಹಿಂದೂ ಮೇಲ್ಜಾತಿಗಳ ಪ್ರಾಬಲ್ಯಕ್ಕೆ ಕಾರಣವಾಗುತ್ತದೆ, ಹಿಂದೂ ರಾಷ್ಟ್ರ ಸ್ಥಾಪನೆಗೆ ದಾರಿ ಮಾಡಿಕೊಡುತ್ತದೆ ಮತ್ತು ಸ್ವತಂತ್ರ ಹೋರಾಟದಿಂದ ಹುಟ್ಟಿದ ಅಂಬೇಡ್ಕರ್ ಸಂವಿಧಾನವನ್ನು ದುರ್ಬಲಗೊಳಿಸುತ್ತದೆ ಎಂದು ಅದು ಎಚ್ಚರಿಸಿದೆ.