ಹರಿದ್ವಾರ : ದೇಶದಲ್ಲಿ ಕೋವಿಡ್ ಪ್ರಕರಣಗಳ ಸಂಖ್ಯೆ ಏರಿಕೆಯಾಗುತ್ತಿದ್ದರೂ ಹಠಕ್ಕೆ ಬಿದ್ದಂತೆ ಉತ್ತರಾಖಂಡದಲ್ಲಿ ಕುಂಭಮೇಳ ನಡೆಸಿ ಲಕ್ಷಾಂತರ ಭಕ್ತರು ಕಿಕ್ಕಿರಿದು ಸೇರಿದ್ದರು. ಇದೀಗ ಅದರ ಪರಿಣಾಮ ಕಂಡು ಬಂದಿದೆ. ಉತ್ತರಾ ಖಂಡದಲ್ಲಿ ಕೋವಿಡ್ ಪ್ರಕರಣಗಳು ಎಪ್ರಿಲ್ ತಿಂಗಳ ಮೊದಲ ದಿನದಿಂದ 24 ರ ವರೆಗೆ 1800% ಏರಿಕೆ ಕಂಡಿದೆ ಎಂದು ತಿಳಿದು ಬಂದಿದೆ.
ಕುಂಭ ಮೇಳಕ್ಕಿಂತ ಮೊದಲು ಅಂದರೆ ಮಾರ್ಚ್ 31 ರ ವರೆಗೆ ಉತ್ತರಾಖಂಡದಲ್ಲಿ ಸಕ್ರಿಯ ಪ್ರಕರಣಗಳ ಸಂಖ್ಯೆ 1,863 ಇತ್ತು ಆದರೆ ಆ ಬಳಿಕ ಅದು 33, 330 ಅಂದರೆ 1800% ಏರಿಕೆಯಾಗಿದೆ. ಕುಂಭಮೇಳದಲ್ಲಿ 40 ಲಕ್ಷಕ್ಕೂ ಅಧಿಕ ಭಕ್ತರು ಸೇರಿದ್ದರು ಎನ್ನಲಾಗಿದೆ. ಸರಕಾರ ಅಧಿಕೃತ ಅಂಕಿಅಂಶಗಳ ಪ್ರಕಾರ 35 ಲಕ್ಷ ಜನ ಸೇರಿದ್ದರು.
ರಾಜ್ಯದ ಸಚಿವ ಸುಬೋಧ್ ಯುನಿಯಾಲ್ ಅವರು, “ನಾವು ನಮ್ಮಿಂದಾಗುವ ಪ್ರಯತ್ನ ಮಾಡುತ್ತಿದ್ದೇವೆ. ಆದರೆ ರಾಜ್ಯಕ್ಕೆ ಬರುತ್ತಿರುವ ಪ್ರವಾಸಿಗರಿಂದಾಗಿ ಈ ಪರಿಸ್ಥಿತಿ ಬಂದು ತಲುಪಿದೆ” ಎಂದು ಹೇಳಿಕೆ ನೀಡಿದ್ದಾರೆ. ನಿನ್ನೆ ಕೂಡಾ ಸಾವಿರಾರು ಮಂದಿ ಶಾಹಿ ಸ್ನಾನದಲ್ಲಿ ಭಾಗವಹಿಸಿದ್ದರು.
