ನ್ಯೂಯಾರ್ಕ್: ವಿಮಾನಯಾನ ಜಾಹೀರಾತು ಪ್ರಚಾರವನ್ನು ಚಿತ್ರೀಕರಿಸಲು ಕೇವಲ ದಿನವೊಂದರ ಸಂಭಾವನೆಯಾದ 35 ಮಿಲಿಯನ್ ಡಾಲರ್ ಅಂದರೆ ಭಾರತೀಯ ಮೊತ್ತ ಸುಮಾರು 264 ಕೋಟಿ ರೂ. ಕೊಡುಗೆಯನ್ನು ನಟ, ನಿರ್ದೇಶಕ ಮತ್ತು ನಿರ್ಮಾಪಕ ಜಾರ್ಜ್ ಕ್ಲೂನಿ ತಿರಸ್ಕರಿಸಿದ್ದಾರೆ ಎಂದು ಹೇಳಲಾಗಿದೆ.
ವಿಮಾನಯಾನ ಸಂಸ್ಥೆಯ ಹೆಸರನ್ನು ಬಹಿರಂಗಪಡಿಸದ ಕ್ಲೂನಿ ಒಂದು ದಿನದ ಜಾಹೀರಾತಿಗೆ ಬಂದ ಭಾರೀ ಮೊತ್ತದ ಸಂಭಾವನೆಯನ್ನು ತಿರಸ್ಕರಿಸಿದ್ದೇನೆ ಎಂದು ಮಾಧ್ಯಮಕ್ಕೆ ತಿಳಿಸಿದ್ದಾರೆ.
ಈ ಬಗ್ಗೆ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಅರವತ್ತರ ಹರೆಯದ ನಾನು ರಾಜಕೀಯದಿಂದ ದೂರ ಉಳಿಯಲು ಬಯಸಿದ್ದು, ಪ್ರಸಕ್ತ ಈಗಲೂ ಬಾಸ್ಕೆಟ್ ಬಾಲ್ ಆಟವಾಡುತ್ತಿದ್ದೇನೆ ಮತ್ತು ಉತ್ತಮ ಜೀವನವನ್ನು ನಿರ್ವಹಿಸಲು ಬಯಸುತ್ತೇನೆ ಎಂದು ತಿಳಿಸಿದರು.
“ನಾನು ಆ ಜಾಹೀರಾತು ಒಂದನ್ನು ನಿರ್ವಹಿಸಿದರೆ 35 ಮಿಲಿಯನ್ ಡಾಲರ್ ಸಿಗುತ್ತಿತ್ತು. ನನ್ನ ಪತ್ನಿ ಅಮಲ್ ಳೊಂದಿಗೆ ನಾನು ಈ ಕುರಿತು ಸಮಾಲೋಚಿಸಿದೆ. ಕೊನೆಗೆ ನಾವಿಬ್ಬರು ಆ ಜಾಹೀರಾತಿನಿಂದ ಹಿಂದೆ ಸರಿಯುವುದಾಗಿ ತೀರ್ಮಾನಿಸಿದೆವು. ಆ ಜಾಹೀರಾತನ್ನು ಮಾಡಿ ನನ್ನ ನಿದ್ದೆ ಕಳೆದುಕೊಳ್ಳುವುದಕ್ಕಿಂತ 35 ಮಿಲಿಯನ್ ಡಾಲರ್ ಏನೇನೂ ಅಲ್ಲ ಎಂದು ಕ್ಲೂನಿ ತಿಳಿಸಿದ್ದಾರೆ.
ನೆಸ್ಟ್ರೆಸೊದ ಬ್ರಾಂಡ್ ಅಂಬಾಸಿಡರ್ ಆಗಲು ಆಸ್ಕರ್ ವಿಜೇತ ನಟ ಕ್ಲೂನಿಗೆ 40 ಮಿಲಿಯನ್ ಡಾಲರ್ ಪಾವತಿಸಿರುವುದು ಮತ್ತೊಂದು ಮೈಲಿಗಲ್ಲು.
ಸೆಲೆಬ್ರಿಟಿಗಳು ಜಾಹೀರಾತು ಮತ್ತು ಮಾರ್ಕೆಟಿಂಗ್ ಅಭಿಯಾನದ ಮೂಲಕ ತ್ವರಿತವಾಗಿ ಹಣವನ್ನು ಗಳಿಸುವ ಮಾರ್ಗವನ್ನು ಹುಡುಕುತ್ತಾರೆ. ಸಾಂಕ್ರಾಮಿಕ ರೋಗದ ನಂತರ ಚಲನಚಿತ್ರ, ದೂರದರ್ಶನ ಕಾರ್ಯಕ್ರಮ ಸ್ಥಗಿತಗೊಂಡ ಹಿನ್ನೆಲೆಯಲ್ಲಿ ಹೆಚ್ಚಿನ ತಾರೆಯರು ಜಾಹೀರಾತಿನ ಮೇಲೆ ಗಮನ ಹರಿಸಿರುವುದು ವಾಸ್ತವ.
