ಹೈದರಾಬಾದ್: ಕಾಲೇಜಿನಿಂದ ನಾಪತ್ತೆಯಾಗಿದ್ದ ವರ್ಷಿಣಿ ಎಂಬ ಬಿ.ಟೆಕ್ ವಿದ್ಯಾರ್ಥಿನಿ ಇನ್ ಸ್ಟಾಗ್ರಾಂ ನೆರವಿನಿಂದ ಮುಂಬೈ ನಲ್ಲಿ ಪತ್ತೆಯಾಗಿದ್ದಾಳೆ.
ವರ್ಷಿಣಿ ಹೈದರಾಬಾದ್ ನಗರದ ಹತ್ತಿರ ಇರುವ ಮೇಡ್ಚಲ್ ಜಿಲ್ಲೆಯ ಕೊಂಡ್ಲಕೊಯಾ ನಗರದಲ್ಲಿರುವ ಸಿಎಂಆರ್ ಟೆಕ್ನಿಕಲ್ ಕಾಲೇಜಿನಲ್ಲಿ ಬಿ.ಟೆಕ್ ವಿದ್ಯಾಭ್ಯಾಸ ಮಾಡುತ್ತಿದ್ದಳು. ಜುಲೈ 7ರಂದು ತಮ್ಮ ಸಂಬಂಧಿಯ ದ್ವಿಚಕ್ರ ವಾಹನದಲ್ಲಿ ಕಾಲೇಜಿಗೆ ತೆರಳಿದ್ದು, ಅಲ್ಲಿಂದಲೇ ನಾಪತ್ತೆಯಾಗಿದ್ದಳು.
ಮಗಳು ಮನೆಗೆ ಮರಳದಿದ್ದನ್ನು ಕಂಡು ಗಾಬರಿಗೊಂಡ ವರ್ಷಿಣಿ ತಂದೆ ಶಿವಾಜಿ, ತಕ್ಷಣ ಪೊಲೀಸ್ ಠಾಣೆಗೆ ದೂರು ನೀಡಿದ್ದಾರೆ. ಶನಿವಾರ ಬೆಳಗ್ಗೆ ವರ್ಷಿಣಿಯ ಕಿರಿಯ ಸಹೋದರಿ, ತನ್ನ ಮೊಬೈಲ್ ನ ಈಮೇಲ್ ನಲ್ಲಿ ಸಂದೇಶ ನೋಡಿದ್ದಾರೆ. ವರ್ಷಿಣಿ ಬಳಿಯಿದ್ದ ಫೋನ್ ತಂಗಿಯ ಈಮೇಲ್ ಅಡ್ರೆಸ್ನಿಂದ ರಿಜಿಸ್ಟರ್ ಆಗಿತ್ತು. ಮುಂಬೈನಲ್ಲಿ ಇನ್ಸ್ಟಾಗ್ರಾಂ ಖಾತೆಗೆ ಲಾಗಿನ್ ಆದ ಸಂದೇಶ ಅದಾಗಿತ್ತು. ಇದರ ಸುಳಿವು ಪಡೆದುಕೊಂಡು ಸ್ಥಳೀಯ ಪೊಲೀಸರು ಮುಂಬೈ ಪೊಲೀಸರನ್ನು ಸಂಪರ್ಕಿಸಿದ್ದಾರೆ.
ಇನ್ಸ್ಟಾಗ್ರಾಂ ಆಕ್ಟಿವೇಟ್ ಆಗಿರುವ ಜಾಡನ್ನು ಹಿಡಿದು ಮುಂಬೈ ಪೊಲೀಸರು ಕಾರ್ಯಾಚರಣೆಗೆ ಇಳಿದಾಗ ವರ್ಷಿಣಿ ಕಲ್ಯಾಣ್ ದುರ್ಗ ರೈಲು ನಿಲ್ದಾಣದ ಬಳಿ ಪತ್ತೆಯಾಗಿದ್ದಾಳೆ.
