ದುಬೈ: ಏಷ್ಯಾ ಕಪ್‌ ಟಿ20 ಟೂರ್ನಿಯ ಫೈನಲ್‌ ಪಂದ್ಯದಲ್ಲಿ ಶ್ರೀಲಂಕಾ 170 ರನ್‌ಗಳಿಸಿದ್ದು, ಪಾಕಿಸ್ತಾನ ಗೆಲುವಿಗೆ ಸವಾಲಿನ ಗುರಿಯನ್ನು ಮುಂದಿಟ್ಟಿದೆ.
ಟಾಸ್‌ ಸೋತು ಮೊದಲು ಬ್ಯಾಟಿಂಗ್‌ ನಡೆಸಿದ ಲಂಕಾ, ಭನುಕ ರಾಜಪಕ್ಷೆ ಗಳಿಸಿದ ಅರ್ಧಶತಕದ ನೆರವಿನಿಂದ 6 ವಿಕೆಟ್‌ ನಷ್ಟದಲ್ಲಿ 170 ರನ್‌ಗಳಿಸಿದೆ. ಕೊನೆಯ ಓವರ್‌ಗಳಲ್ಲಿ ಬಿರುಸಿನ ಬ್ಯಾಟಿಂಗ್‌ ನಡೆಸಿದ ವನಿಂದು ಹಸರಂಗ 21 ಎಸೆತಗಳಲ್ಲಿ 1 ಸಿಕ್ಸರ್‌ ಮತ್ತು 5 ಬೌಂಡರಿಗಳ ನೆರವಿನಿಂದ 36 ರನ್‌ಗಳಿಸಿ ಕೀಪರ್‌ಗೆ ಕ್ಯಾಚಿತ್ತು ನಿರ್ಗಮಿಸಿದರು.
2 ರನ್‌ಗಳಿಸುವಷ್ಟರಲ್ಲೇ ಲಂಕಾದ ಮೊದಲ ವಿಕೆಟ್ಚ ಪತನವಾಗಿತ್ತು. ಆರಂಭಿಕ ಕುಸಲ್‌ ಮೆಂಡಿಸ್‌, ಖಾತೆ ತೆರೆಯುವ ಮುನ್ನವೇ ನಸೀಮ್‌ ಶಾ ಎಸೆತದಲ್ಲಿ ಕ್ಲೀನ್‌ ಬೌಲ್ಡ್‌ ಆಗಿ ಪೆವಿಲಿಯನ್‌ಗೆ ಮರಳಿದ್ದರು. 3ನೇ ಕ್ರಮಾಂಕದಲ್ಲಿ ಬಂದ ಧನಂಜಯ ಡಿಸಿಲ್ವಾ 28 ರನ್‌ಗಳಿಸಿದರು.
ಎದುರಾಳಿಯನ್ನು ಸಾಮಾನ್ಯ ಮೊತ್ತಕ್ಕೆ ಕಟ್ಟಿಹಾಕಬಹುದು ಎಂಬ ಯೋಜನೆಯಲ್ಲಿದ್ದ ಪಾಕಿಸ್ತಾನಕ್ಕೆ, ಮಧ್ಯಮ ಕ್ರಮಾಂಕದಲ್ಲಿ ಭನುಕ ರಾಜಪಕ್ಷೆ ಸವಾಲಾಗಿ ನಿಂತರು. 34 ಎಸೆತಗಳನ್ನು ಎದುರಿಸಿದ ರಾಜಪಕ್ಷೆ, ಮೂರುಭರ್ಜರಿ ಸಿಕ್ಸರ್‌ ಮತ್ತು 6 ಬೌಂಡರಿಗಳ ನೆರವಿನಿಂದ 71 ರನ್‌ಗಳಿಸಿ ಅಜೇಯರಾಗುಳಿದರು.
ಪಾಕಿಸ್ತಾನದ ಪರ ಬೌಲಿಂಗ್‌ನಲ್ಲಿಹಾರಿಸ್‌ ರೌಫ್‌ 3 ವಿಕೆಟ್‌ ಪಡೆದರೆ, ನಸೀಮ್‌ ಶಾ, ಶಾಧಾಬ್‌ ಖಾನ್‌ ಹಾಗೂ ಇಫ್ತಿಖಾರ್‌ ಅಹ್ಮದದ್‌ ತಲಾ ಒಂದು ವಿಕೆಟ್‌ ಪಡೆದರು.
