ಶೇಖ್ ಹಸೀನಾ ಸಲಹೆಗಾರ, ಮಾಜಿ ಕಾನೂನು ಸಚಿವರ ಬಂಧನ

ಢಾಕಾ: ಬಾಂಗ್ಲಾ ದೇಶದ ಮಾಜಿ ಪ್ರಧಾನಿ ಶೇಖ್ ಹಸೀನಾ ಸಲಹೆಗಾರ ಮತ್ತು ಬಾಂಗ್ಲಾ ಮಾಜಿ ಕಾನೂನು ಸಚಿವರನ್ನು ಢಾಕಾದಲ್ಲಿ ಬಂಧಿಸಲಾಗಿದೆ. ಹಸೀನಾ ವಿರುದ್ಧ ಅಲ್ಲಿನ ಕೋರ್ಟ್ ಉನ್ನತ ಅಧಿಕಾರಿಗಳ ಹತ್ಯೆಗೆ ಸಂಬಂಧಿಸಿದ ಪ್ರಕರಣದಲ್ಲಿ ತನಿಖೆಗೆ ಆದೇಶಿಸಿದ ಬೆನ್ನಲ್ಲೆ ಈ ಬೆಳವಣಿಗೆ ನಡೆದಿದೆ.

ಜುಲೈ 19 ರಂದು ಗುಂಡು ಹಾರಿಸಿ ಕೊಲ್ಲಲ್ಪಟ್ಟ ಕಿರಾಣಿ ಅಂಗಡಿಯ ಮಾಲೀಕನ ಹತ್ಯೆಯ ತನಿಖೆಯನ್ನು ಬಾಂಗ್ಲಾದೇಶದ ನ್ಯಾಯಾಲಯವು ಪ್ರಾರಂಭಿಸಿದ ಕೆಲವೇ ಗಂಟೆಗಳ ನಂತರ ಹಸೀನಾ ಸಲಹೆಗಾರ ಅನೀಸುಲ್ ಹಕ್ ಮತ್ತು ಹಸೀನಾ ಅವರ ಸಲಹೆಗಾರ ಸಲ್ಮಾನ್ ಆರ್ ರೆಹಮಾನ್ ಇಬ್ಬರನ್ನು ಬಂಧಿಸಲಾಯಿತು.

ಪ್ರಕರಣದಲ್ಲಿ ಹಸೀನಾ ಮತ್ತು ಅವರ ಸರ್ಕಾರದ ಮಾಜಿ ಗೃಹ ಸಚಿವ ಮತ್ತು ಅವಾಮಿ ಲೀಗ್ ಪಕ್ಷದ ಪ್ರಧಾನ ಕಾರ್ಯದರ್ಶಿ ಸೇರಿದಂತೆ ಆರು ಉನ್ನತ ಅಧಿಕಾರಿಗಳ ಹೆಸರುಗಳಿವೆ.

ಮಾಜಿ ಕಾನೂನು ಸಚಿವ ಅನಿಸುಲ್ ಹಕ್, ಹಸೀನಾ ಅವರ ಸಲಹೆಗಾರ ಸಲ್ಮಾನ್ ಆರ್ ರೆಹಮಾನ್ ಢಾಕಾದ ಸದರ್ಘಾಟ್ ನಿಂದ ಜಲಮಾರ್ಗದ ಮೂಲಕ ದೇಶಬಿಟ್ಟು ತೆರಳಲು ಯತ್ನಿಸುತ್ತಿದ್ದಾಗ ಬಂಧನಕ್ಕೊಳಗಾಗಿದ್ದಾರೆ.

ನ್ಯೂ ಮಾರ್ಕೆಟ್ ಪೊಲೀಸ್ ಠಾಣೆಯಲ್ಲಿ ದಾಖಲಾಗಿದ್ದ 2 ಹತ್ಯೆ ಪ್ರಕರಣದ ಸಂಬಂಧ ಇಬ್ಬರನ್ನೂ ಬಂಧಿಸಲಾಗಿದೆ. ಜುಲೈ 16 ರಂದು ಹಸೀನಾ ನೇತೃತ್ವದ ಸರ್ಕಾರದ ವಿರುದ್ಧ ವಿದ್ಯಾರ್ಥಿ ದಂಗೆಯ ಸಂದರ್ಭದಲ್ಲಿ ಢಾಕಾ ಕಾಲೇಜಿನ ಮುಂದೆ ನಡೆದ ಘರ್ಷಣೆಯಲ್ಲಿ ಇಬ್ಬರು ಸಾವನ್ನಪ್ಪಿದ್ದರು. ವರದಿಯಲ್ಲಿ ಉಲ್ಲೇಖಿಸಲಾದ ಪೊಲೀಸ್ ಮೂಲಗಳ ಪ್ರಕಾರ, ಸಲ್ಮಾನ್ ಮತ್ತು ಅನಿಸುಲ್ ಈ ಕೊಲೆಗಳಿಗೆ ಪ್ರಚೋದಕರು ಎಂದು ಹೆಸರಿಸಲಾಗಿದೆ.

ದೇಶದ ಪ್ರಮುಖ ಉದ್ಯಮಿಗಳಲ್ಲಿ ಒಬ್ಬರಾದ ಸಲ್ಮಾನ್ ಎಫ್ ರೆಹಮಾನ್ ಅವರು ಶೇಖ್ ಹಸೀನಾ ಅವರ ಸಲಹೆಗಾರರಾಗುವ ಮೊದಲು 12 ನೇ ರಾಷ್ಟ್ರೀಯ ಚುನಾವಣೆಯಲ್ಲಿ ಢಾಕಾ-1 (ದೋಹರ್-ನವಾಬ್‌ಗಂಜ್) ಕ್ಷೇತ್ರದಿಂದ ಸಂಸದರಾಗಿ ಆಯ್ಕೆಯಾಗಿದ್ದರು.

2014 ರಲ್ಲಿ ಅವಾಮಿ ಲೀಗ್‌ನ ಅಡಿಯಲ್ಲಿ ಅನಿಸುಲ್ ಹಕ್ ಮೊದಲ ಬಾರಿಗೆ ಬ್ರಾಹ್ಮಣಬಾರಿಯಾ -4 (ಕಸ್ಬಾ) ಕ್ಷೇತ್ರದಿಂದ ಸಂಸದರಾಗಿ ಚುನಾಯಿತರಾಗಿದ್ದರು. ವಿದ್ಯಾರ್ಥಿಗಳ ನೇತೃತ್ವದಲ್ಲಿ ರಾಷ್ಟ್ರವ್ಯಾಪಿ ಪ್ರತಿಭಟನೆಗಳು ಹಸೀನಾ ನೇತೃತ್ವದ ಸರ್ಕಾರವನ್ನು ಉರುಳಿಸುವವರೆಗೂ ಅವರು ಕಾನೂನು ಸಚಿವಾಲಯದ ಮುಖ್ಯಸ್ಥರಾಗಿದ್ದರು.