ಪ್ಯಾರಿಸ್: ಜಿನೇವಾದಿಂದ ಪ್ಯಾರಿಸ್‌ಗೆ ಹಾರುತ್ತಿದ್ದ ಏರ್‌ ಫ್ರಾನ್ಸ್ ವಿಮಾನದಲ್ಲಿ ಪೈಲಟ್ ಮತ್ತು ಸಹ ಪೈಲಟ್ ಪರಸ್ಪರ ಹೊಡೆದಾಡಿದ ಘಟನೆ ತಡವಾಗಿ ಬೆಳಕಿಗೆ ಬಂದಿದೆ.
ಜೂನ್‌ನಲ್ಲಿ ಈ ಘಟನೆ ನಡೆದಿದ್ದು, ಆಂತರಿಕ ತನಿಖೆ ನಡೆಸಿ, ಇತ್ತೀಚೆಗೆ ಈ ಇಬ್ಬರು ಪೈಲಟ್‌ಗಳನ್ನು ಅಮಾನತುಗೊಳಿಸಿ ಫ್ರೆಂಚ್ ವಿಮಾನಯಾನ ಪ್ರಾಧಿಕಾರ ಆದೇಶಿಸಿದ ಬೆನ್ನಲ್ಲೇ ಘಟನೆ ಬೆಳಕಿಗೆ ಬಂದಿದೆ.
- Advertisement -
ವಿಮಾನ ಟೇಕಾಫ್ ಆದ ಕೆಲವೇ ಸಮಯದ ಬಳಿಕ ಪೈಲಟ್ ಮತ್ತು ಸಹ ಪೈಲಟ್ ಯಾವುದೋ ವಿಚಾರಕ್ಕೆ ಕಾಕ್‌ಪೀಟ್‌ನಲ್ಲೇ ಹೊಡೆದಾಡಿಕೊಂಡಿದ್ದಾರೆ. ಪರಸ್ಪರ ಕಾಲರ್ ಹಿಡಿದು ಎಳೆದಾಡಿದ್ದಲ್ಲದೇ, ಮುಖಕ್ಕೆ ಗುದ್ದಿ ಕಾದಾಡಿದ್ದಾರೆ. ಈ ನಡುವೆ ಕಾಕ್‌ಪೀಟ್‌ನಿಂದ ಗದ್ದಲ ಕೇಳಿ ಕ್ಯಾಬಿನ್ ಸಿಬ್ಬಂದಿ ಬಂದಿದ್ದು, ಇಬ್ಬರ ಜಗಳ ಬಿಡಿಸಿದ್ದಾರೆ. ಬಳಿಕ ವಿಮಾನ ಕೆಳಗಿಳಿಯುವ ವರೆಗೂ ಆ ಸಿಬ್ಬಂದಿ ಡೆಕ್‌ನಲ್ಲೇ ಉಳಿದಿದ್ದರು.
ಹೊಡೆದಾಟ ವಿಮಾನದಲ್ಲಿದ್ದ ಪ್ರಯಾಣಿಕರ ಮೇಲೆ ಬಾಧಿಸದಿದ್ದ ಹಿನ್ನೆಲೆಯಲ್ಲಿ ಅವರ ವಿರುದ್ಧ ತಡವಾಗಿ ಕ್ರಮ ಕೈಗೊಳ್ಳಲಾಗಿದೆ ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.
