ನವದೆಹಲಿ: 1942 ರಲ್ಲಿ ಪ್ರಾರಂಭಿಸಲಾದ ‘ಮಾಡು ಇಲ್ಲವೆ ಮಡಿ’ ಆಂದೋಲನವು ಪ್ರಸ್ತುತ ಸರ್ವಾಧಿಕಾರಿ ಸರ್ಕಾರದ ವಿರುದ್ಧ ಮತ್ತೊಮ್ಮೆ ಮಾಡಬೇಕಾದ ಅಗತ್ಯವಿದೆ ಎಂದು ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ಸೋಮವಾರ ಹೇಳಿದ್ದಾರೆ.
ಕ್ವಿಟ್ ಇಂಡಿಯಾ ಚಳುವಳಿಯ 80 ನೇ ವಾರ್ಷಿಕೋತ್ಸವದ ಭಾಗವಾಗಿ ಫೇಸ್ಬುಕ್ ಪೋಸ್ಟ್ ಮಾಡಿದ ರಾಹುಲ್ ಗಾಂಧಿ, ಆಗಸ್ಟ್ 9, 1942 ರಂದು ಬಾಂಬೆಯಿಂದ ಪ್ರಾರಂಭವಾದ ಆಂದೋಲನವು ಬ್ರಿಟಿಷರಿಗೆ ನಿದ್ರೆಯಿಲ್ಲದ ರಾತ್ರಿಗಳನ್ನು ನೀಡಿತ್ತು. ಇಂದು, ಸರ್ವಾಧಿಕಾರಿ ಸರ್ಕಾರದ ವಿರುದ್ಧ ಮತ್ತು ದೇಶವನ್ನು ರಕ್ಷಿಸಲು ಮತ್ತೊಂದು ‘ಮಾಡು ಇಲ್ಲವೆ ಮಡಿ’ ಆಂದೋಲನದ ಅಗತ್ಯವಿದೆ, ಈಗ ಅನ್ಯಾಯದ ವಿರುದ್ಧ ಧ್ವನಿ ಎತ್ತುವ ಸಮಯ ಬಂದಿದೆ. ಸರ್ವಾಧಿಕಾರ, ಹಣದುಬ್ಬರ ಮತ್ತು ನಿರುದ್ಯೋಗವು ಭಾರತವನ್ನು ತೊರೆಯಬೇಕು ಎಂದು ಹೇಳಿದ್ದಾರೆ.
ಅಂದು ಕ್ವಿಟ್ ಇಂಡಿಯಾ ಚಳುವಳಿಯಲ್ಲಿ ತಮ್ಮ ಜೀವನದ ಬಗ್ಗೆ ಕಾಳಜಿ ವಹಿಸದೆ, ದೇಶದ ಲಕ್ಷಾಂತರ ಜನರು ಈ ಆಂದೋಲನದ ಭಾಗವಾಗಿದ್ದರು, ಇದರಲ್ಲಿ ಸುಮಾರು 940 ಜನರು ಹುತಾತ್ಮರಾದರು ಮತ್ತು ಸಾವಿರಾರು ಜನರನ್ನು ಬಂಧಿಸಲಾಯಿತು. ದೇಶದ ಸ್ವಾತಂತ್ರ್ಯಕ್ಕಾಗಿ ತಮ್ಮ ಪ್ರಾಣವನ್ನು ತ್ಯಾಗ ಮಾಡಿದ ಸ್ವಾತಂತ್ರ್ಯ ಹೋರಾಟಗಾರರಿಗೆ ನಾನು ಗೌರವ ನಮನ ಸಲ್ಲಿಸುತ್ತೇನೆ ಎಂದು ರಾಹುಲ್ ಗಾಂಧಿ ಹೇಳಿದರು.
