ಕೋಝಿಕ್ಕೋಡ್: ಕೌಟುಂಬಿಕ ಕಲಹದಿಂದ ಬೇಸತ್ತ ತಾಯಿಯೊಬ್ಬರು ತನ್ನ ಅವಳಿ ಮಕ್ಕಳನ್ನು ಬಾವಿಗೆ ತಳ್ಳಿ ಬಳಿಕ ತಾನೂ ಬಾವಿಗೆ ಹಾರಿ ಆತ್ಮಹತ್ಯೆಗೆ ಯತ್ನಿಸಿದ ಘಟನೆ ಕೇರಳದ ಕೋಝಿಕ್ಕೋಡಿನ ನಾದಾಪುರಂ ಎಂಬಲ್ಲಿ ನಡೆದಿದೆ. ಘಟನೆಯಲ್ಲಿ 3 ವರ್ಷ ಪ್ರಾಯದ ಇಬ್ಬರು ಅವಳಿ ಮಕ್ಕಳಾದ ಫಾತಿಮಾ ನೌಶಾ ಹಾಗೂ ಮಹಮ್ಮದ್ ರಿಝ್ವಾನ್ ಸಾವನ್ನಪ್ಪಿದ್ದಾರೆ. ತಾಯಿಯನ್ನು ರಕ್ಷಿಸಲಾಗಿದೆ. ನಾದಾಪುರಂನ ಪೇರೋಡ್ ನಿವಾಸಿ ಸುಬೀನಾ (31) ತನ್ನ ಅವಳಿ ಮಕ್ಕಳೊಂದಿಗೆ ಭಾನುವಾರ ರಾತ್ರಿ ಬಾವಿಗೆ ಹಾರಿದ್ದರು. ದುರದೃಷ್ಟವಶಾತ್ ಮಕ್ಕಳಿಬ್ಬರು ಉಸಿರುಗಟ್ಟಿ ಮೃತಪಟ್ಟಿದ್ದಾರೆ.
ತನ್ನ ಇಬ್ಬರು ಮಕ್ಕಳನ್ನು ಬಾವಿಗೆ ಎಸೆದ ಬಳಿಕ ಸುಬೀನಾ, ಕುಟುಂಬದವರಿಗೆ ದೂರವಾಣಿ ಕರೆ ಮಾಡಿ ತನ್ನ ಕೃತ್ಯದ ಬಗ್ಗೆ ತಿಳಿಸಿದ್ದಳು. ಬಳಿಕ ತಾನೂ ಬಾವಿಗೆ ಹಾರಿದ್ದಳು. ಆಕೆಯ ಕುಟುಂಬಸ್ಥರು ಕೂಡಲೇ ಸ್ಥಳೀಯರಿಗೆ ವಿಷಯ ಮುಟ್ಟಿಸಿದ ಕಾರಣ ರಕ್ಷಣಾ ಕಾರ್ಯಾಚರಣೆ ನಡೆಸಲಾಗಿತ್ತು. ಈ ವೇಳೆ ಸುಬೀನಾ, ಬಾವಿಯಲ್ಲಿದ್ದ ಮೋಟಾರ್ ಪಂಪ್’ ಅನ್ನು ಹಿಡಿದು ಜೀವ ಉಳಿಸಿಕೊಂಡಿದ್ದಾಳೆ.
ಮಂಜಾಪುರಂ ನಿವಾಸಿ ರಫೀಕ್’ರನ್ನು ಸುಬೀನಾ ವಿವಾಹವಾಗಿದ್ದರು. ಸುಬೀನಾಳ ವಿರುದ್ಧ ಕೊಲೆ ಪ್ರಕರಣ ದಾಖಲಿಸಲಾಗಿದ್ದು, ಆಸ್ಪತ್ರೆಯಲ್ಲಿದ್ದ ಆಕೆಯನ್ನು ನಾದಾಪುರಂ ಪೊಲೀಸರು ವಶಕ್ಕೆ ಪಡೆದು ವಿಚಾರಣೆ ನಡೆಸುತ್ತಿದ್ದಾರೆ.
