ಗುಹಾತಿ: ಕ್ಲಿನಿಕ್‌ನಲ್ಲಿ ವೈದ್ಯನಿಗೆ ಹಲ್ಲೆಗೈದ ತನ್ನ ಮಗಳ ವೀಡಿಯೋ ವೈರಲ್ ಆದ ಬಳಿಕ ಇದೀಗ ಮಿಝೋರಾಂ ಮುಖ್ಯಮಂತ್ರಿ ಝೊರಾಮ್‌ತಂಗ ಸಾರ್ವಜನಿಕ ಕ್ಷಮಯಾಚನೆ ನಡೆಸಿದ್ದಾರೆ.
ಮುಖ್ಯಮಂತ್ರಿಯ ಮಗಳು ಮಿಲಾರಿ ಚಾಂಗ್ಟೆ ಇತ್ತೀಚೆಗೆ ರಾಜ್ಯರಾಜಧಾನಿ ಐಝ್ವಾಲ್‌ನಲ್ಲಿ ಚರ್ಮರೋಗತಜ್ಞರನ್ನು ಭೇಟಿಯಾಗಲು ಬಂದಿದ್ದರು. ಆದರೆ ಅಪಾಯಿಂಟ್‌ಮೆಂಟ್ ಇಲ್ಲದ ಹಿನ್ನೆಲೆಯಲ್ಲಿ ವೈದ್ಯರು ಸಮಾಲೋಚನೆ ನಡೆಸಲು ನಿರಾಕರಿಸಿದ್ದರು. ಈ ವೇಳೆ ಆಕ್ರೋಶಗೊಂಡ ಮಿಲಾರಿ ಚಾಂಗ್ಟೆ, ಬಾಗಿಲು ತಳ್ಳಿ ಒಳನುಗ್ಗಿ ವೈದ್ಯರ ಮುಖಕ್ಕೆ ಗುದ್ದಿದ್ದಳು.
ಬಳಿಕ ಈ ಘಟನೆಯ ವೀಡಿಯೋ ವೈರಲ್ ಆಗಿದ್ದು, ಮುಖ್ಯಮಂತ್ರಿ ಮತ್ತು ಕುಟುಂಬ ಸಾಮಾಜಿಕ ಜಾಲತಾಣದಲ್ಲಿ ತೀವ್ರ ಟೀಕೆಯನ್ನು ಎದುರಿಸಿತ್ತು. ಇಂಡಿಯನ್ ಮೆಡಿಕಲ್ ಅಸೋಸಿಯೇಶನ್ (IMA)ನ ಮಿಝೋರಾಂ ಘಟಕ ಕೂಡಾ ಘಟನೆಯನ್ನು ಖಂಡಿಸಿದ್ದು, ನಿನ್ನೆ ವೈದ್ಯರೆಲ್ಲಾ ಕಪ್ಪು ಪಟ್ಟಿ ಧರಿಸಿ ಕರ್ತವ್ಯಕ್ಕೆ ಹಾಜರಾಗಿದ್ದರು.
ಈ ಎಲ್ಲಾ ಬೆಳವಣಿಗೆಯ ಬಳಿಕ ಮಿಝೊರಾಂ ಮುಖ್ಯಮಂತ್ರಿ ಝೊರಾಮ್‌ತಂಗ ತನ್ನ ಅಧಿಕೃತ ಇನ್‌ಸ್ಟಗ್ರಾಂ ಖಾತೆಯಲ್ಲಿ ಕ್ಷಮೆಯಾಚಿಸಿದ್ದು, ಮಗಳ ವರ್ತನೆಯನ್ನು ಯಾವುದೇ ಕಾರಣಕ್ಕೂ ಸಮರ್ಥಿಸಿಕೊಳ್ಳುವುದಿಲ್ಲ ಎಂದಿದ್ದಾರೆ.
