ಮೆಹ್ದಿ ಹಸನ್ ಗಳಿಸಿದ ಚೊಚ್ಚಲ ಶತಕದ ಬಲದಲ್ಲಿ ಮಿಂಚಿದ ಬಾಂಗ್ಲಾದೇಶ, , ಮೀರ್ ಪುರ್ ನಲ್ಲಿ ನಡೆದ ಟೀಮ್ ಇಂಡಿಯಾ ವಿರುದ್ಧದ ಎರಡನೇ ಏಕದಿನ ಪಂದ್ಯದಲ್ಲಿ 5 ರನ್‌ಗಳ ಅಂತರದ ರೋಚಕ ಜಯ ಸಾಧಿಸಿದೆ. ಆ ಮೂಲಕ ಮೂರು ಪಂದ್ಯಗಳ ಸರಣಿಯಲ್ಲಿ ಇನ್ನೂ ಒಂದು ಪಂದ್ಯ ಬಾಕಿ ಇರುವಂತೆಯೇ ಸರಣಿ ಗೆದ್ದು ಸಂಭ್ರಮಿಸಿದೆ.
ಟಾಸ್ ಸೋತು ಮೊದಲು ಬ್ಯಾಟ್ ಮಾಡಿದ್ದ ಆತಿಥೇಯ ಬಾಂಗ್ಲಾದೇಶ 19 ಓವರ್‌ಗಳಲ್ಲಿ 69 ರನ್ ಗಳಿಸುವಷ್ಟರಲ್ಲಿ 6 ವಿಕೆಟ್ ಕಳೆದುಕೊಂಡಿತ್ತು. ಆದರೆ ಈ ವೇಳೆ ಜೊತೆಯಾದ ಕಳೆದ ಪಂದ್ಯದ ಹೀರೋ ಮೆಹ್ದಿ ಹಸನ್ ಮತ್ತು ಮಹ್ಮೂದುಲ್ಲಾ, ಜವಾಬ್ದಾರಿಯನ್ನು ಅರಿತು ಕ್ರೀಸ್ ನಲ್ಲಿ ನೆಲೆಯೂರಿದರು. 7ನೇ ವಿಕೆಟ್ ಗೆ 148 ರನ್‌ಗಳನ್ನು ಒಟ್ಟುಗೂಡಿಸಿದ ಈ ಜೋಡಿ ಭಾರತದ ಬೌಲರ್‌ಗಳ ಬೆವರಿಳಿಸಿತು.
ಇನ್ನಿಂಗ್ಸ್‌ನ ಅಂತಿಮ ಎಸೆತದಲ್ಲಿ ಒಂಟಿ ರನ್‌ಗಳಿಸುವ ಮೂಲಕ ಹಸನ್, ವೃತ್ತಿ ಜೀವನದ 66ನೇ ಪಂದ್ಯದಲ್ಲಿ ಚೊಚ್ಚಲ ಶತಕ ಪೂರೈಸಿದರು.
ಹಸನ್ ಗೆ ತಕ್ಕ ಸಾಥ್ ನೀಡಿದ ಮಹ್ಮೂದುಲ್ಲಾ 96ಎಸೆತಗಳನ್ನು ಎದುರಿಸಿ 77 ರನ್‌ಗಳಿಸಿ ನಿರ್ಗಮಿಸಿದರು.
ಮೆಹ್ದಿ ಹಸನ್ 83 ಎಸೆತಗಳಲ್ಲಿ 4 ಸಿಕ್ಸರ್ ಮತ್ತು 8 ಬೌಂಡರಿಗಳ ನೆರವಿನೊಂದಿಗೆ 100 ರನ್‌ಗಳಿಸಿ ಅಜೇಯರಾಗುಳಿದರು.
ಅಂತಿಮವಾಗಿ ಬಾಂಗ್ಲಾದೇಶ 7 ವಿಕೆಟ್ ನಷ್ಟದಲ್ಲಿ 271 ರನ್ ಗಳಿಸಿತ್ತು.
ಸವಾಲಿನ ಗುರಿ ಬೆನ್ನಟ್ಟಿದ ಭಾರತ, ನಿಗದಿತ 50 ಓವರ್‌ಗಳಲ್ಲಿ 9 ವಿಕೆಟ್ ನಷ್ಟದಲ್ಲಿ 266 ರನ್ ಗಳಿಸಲಷ್ಟೇ ಶಕ್ತವಾಯಿತು.
ಶ್ರೇಯಸ್ ಅಯ್ಯರ್ 82 ಮತ್ತು ಅಂತಿಮ ಓವರ್‌ಗಳಲ್ಲಿ ಕೈ ಬೆರಳಿನ ಗಾಯದ ನೋವಿನ ನಡುವೆಯೂ ಬಿರುಸಿನ ಬ್ಯಾಟಿಂಗ್ ನಡೆಸಿದ ನಾಯಕ ರೋಹಿತ್ ಶರ್ಮಾ 28 ಎಸೆತಗಳಲ್ಲಿ 51 ರನ್‌ಗಳಿಸಿದರೂ ಗೆಲುವಿನ ಅಂಚಿನಲ್ಲಿ ಎಡವಿತು.
