ರಾಂಚಿ: T-20 ಕ್ರಿಕೆಟ್’ನಲ್ಲಿ ಅತೀಹೆಚ್ಚು ರನ್’ಗಳಿಸಿದ ಬ್ಯಾಟರ್ ಎಂಬ ದಾಖಲೆ ನ್ಯೂಜಿಲೆಂಡ್ ತಂಡದ ಆರಂಭಿಕ, ಅನುಭವಿ ಮಾರ್ಟಿನ್ ಗಪ್ಟಿಲ್ ಪಾಲಾಗಿದೆ.
ರಾಂಚಿಯ JSCA ಅಂತರರಾಷ್ಟ್ರೀಯ ಕ್ರೀಡಾಂಗಣದಲ್ಲಿ ಶುಕ್ರವಾರ ನಡೆದ ಪಂದ್ಯದಲ್ಲಿ ನ್ಯೂಜಿಲೆಂಡ್ ಭಾರತದ ಗೆಲುವಿಗೆ 154 ರನ್’ಗಳ ಗುರಿ ನೀಡಿತ್ತು. ಕಿವೀಸ್ ಆರಂಭಿಕ ಬ್ಯಾಟರ್ ಮಾರ್ಟಿನ್ ಗಪ್ಟಿಲ್ ಕೇವಲ 15 ಎಸೆತಗಳಲ್ಲಿ 31 ರನ್’ಗಳಿಸಿದ್ದರು . ಈ ನಡುವೆ ಗಪ್ಟಿಲ್ 14 ರನ್ ಗಳಿಸಿದ್ದ ವೇಳೆ T-20 ಕ್ರಿಕೆಟ್’ನಲ್ಲಿ ಅತೀ ಹೆಚ್ಚು ರನ್’ಗಳಿಸಿದ ಬ್ಯಾಟರ್ ಎಂಬ ದಾಖಲೆಯನ್ನು ತನ್ನದಾಗಿಸಿಕೊಂಡಿದ್ದಾರೆ.
ರಾಂಚಿಯಲ್ಲಿ 111ನೇ T-20 ಪಂದ್ಯವನ್ನಾಡಿದ 35 ವರ್ಷದ ಗಪ್ಟಿಲ್ ತಮ್ಮ ರನ್ ಗಳಿಕೆಯನ್ನು 3,248ಕ್ಕೆ ಏರಿಸಿದ್ದಾರೆ. ಆ ಮೂಲಕ ಟೀಮ್ ಇಂಡಿಯಾದ T-20 ತಂಡದ ಮಾಜಿ ನಾಯಕ ವಿರಾಟ್ ಕೊಹ್ಲಿ ದಾಖಲೆಯನ್ನು ಹಿಂದಿಕ್ಕಿದ್ದಾರೆ. ಪಂದ್ಯಕ್ಕೂ ಮುನ್ನಾ ಗಪ್ಟಿಲ್, ಕೊಹ್ಲಿಗಿಂತ ಕೇವಲ 10 ರನ್’ಗಳ ಅಂತರದಲ್ಲಿ ಹಿಂದಿದ್ದರು. ಎರಡನೇ ಪಂದ್ಯದಲ್ಲಿ ಭುವನೇಶ್ವರ್ ಕುಮಾರ್ ಎಸೆದ ಮೊದಲ ಓವರ್’ನಲ್ಲೇ 14 ರನ್ ಬಾರಿಸಿದ ಗಪ್ಟಿಲ್ T-20 ಕ್ರಿಕೆಟ್’ನಲ್ಲಿ ತಮ್ಮ ಪ್ರಭುತ್ವ ಸ್ಥಾಪಿಸಿದರು.
87 T-20 ಪಂದ್ಯಗಳನ್ನಾಡಿರುವ ವಿರಾಟ್ ಕೊಹ್ಲಿ ಒಟ್ಟು 3,217 ರನ್’ಗಳಿಸಿದ್ದಾರೆ. ಮೂರನೇ ಸ್ಥಾನದಲ್ಲಿರುವ ಟೀಮ್ ಇಂಡಿಯಾದ T-20 ತಂಡದ ನಾಯಕ ರೋಹಿತ್ ಶರ್ಮಾ, 3,141 ರನ್’ಗಳಿಸಿದ್ದಾರೆ.
ನ್ಯೂಜಿಲೆಂಡ್ ವಿರುದ್ಧದ ಮೂರು T-20 ಪಂದ್ಯಗಳ ಸರಣಿಯ ಎರಡನೇ ಪಂದ್ಯದಲ್ಲಿ ಭಾರತ 7 ವಿಕೆಟ್’ಗಳ ಅಂತರದಲ್ಲಿ ಭರ್ಜರಿ ಜಯ ದಾಖಲಿಸಿತ್ತು. ಆ ಮೂಲಕ ಇನ್ನೂ ಒಂದು ಪಂದ್ಯ ಬಾಕಿ ಇರುವಂತೆಯೇ ಸರಣಿಯನ್ನು ತನ್ನದಾಗಿಸಿಕೊಂಡಿದೆ. ಈ ಗೆಲುವಿನ ಮೂಲಕ ಭಾರತ ತಾಯ್ನೆಲದಲ್ಲಿ ಸತತ 5ನೇ ಬಾರಿಗೆ T-20 ಸರಣಿ ಗೆದ್ದ ಸಾಧನೆಯನ್ನೂ ಮಾಡಿದೆ.
