ಮಂಗಳೂರು: ನಗರದ ವಿಮಾನ ನಿಲ್ದಾಣದಲ್ಲಿ ಅನುಮಾನಾಸ್ಪದ ವರ್ತನೆ ತೋರಿದ ಯುವಕ ಹಾಗೂ ಯುವತಿಯನ್ನು ಬಜ್ಪೆ ಪೊಲೀಸರು ವಶಕ್ಕೆ ಪಡೆದು ವಿಚಾರಣೆ ಕೈಗೊಂಡಿದ್ದಾರೆ.
ಉತ್ತರ ಪ್ರದೇಶ ಮೂಲದ ಯುವಕ ದೀಪಯಾನ್ ಮಾಂಜಿ ಹಾಗೂ ಸಿಮ್ರಾನ್ ಟಾಮ್ ನನ್ನು ಪೊಲೀಸರು ವಶಕ್ಕೆ ಪಡೆದಿದ್ದಾರೆ. ಬೆಂಗಳೂರು ಹೊರಟಿದ್ದ ಯುವತಿ ಏರ್ ಪೋರ್ಟ್ ನಲ್ಲಿರುವಾಗಲೇ ಯುವಕನಿಗೆ ಮೆಸೇಜ್ ಮಾಡಿದ್ದು, ಈ ಬಗ್ಗೆ ಪೊಲೀಸರು ತೀವ್ರ ವಿಚಾರಣೆ ಆರಂಭಿಸಿದ್ದಾರೆ.
ಇಂಡಿಗೋ ವಿಮಾನ ನಿನ್ನೆ ಬೆಳಗ್ಗೆ 11ಗಂಟೆಗೆ ಮುಂಬೈಗೆ ಹೊರಟಿದ್ದು, ವಿಮಾನದಲ್ಲಿದ್ದ ಯುವಕನಿಗೆ ‘ಯು ಆರ್ ಎ ಬಾಂಬರ್’ ಎಂದು ಯುವತಿಯೋರ್ವಳು ಮೆಸೇಜ್ ಮಾಡಿದ್ದಾಳೆ. ಈ ವೇಳೆ ಪಕ್ಕದ ಸೀಟಿನಲ್ಲಿದ್ದ ಮಹಿಳೆಯು ಮೆಸೇಜ್ ನೋಡಿ ವಿಮಾನ ಸಿಬಂದಿಗೆ ಮಾಹಿತಿ ನೀಡಿದ್ದು, ಕೂಡಲೇ ಭದ್ರತಾ ಸಿಬಂದಿ ಟೇಕಾಫ್ ಗೆ ರೆಡಿಯಾಗಿದ್ದ ವಿಮಾನ ನಿಲ್ಲಿಸಿ ಪ್ರಯಾಣಿಕರನ್ನು ಕೆಳಗೆ ಇಳಿಸಿ ತಪಾಸಣೆ ನಡೆಸಿದ್ದಾರೆ.
ಭದ್ರತಾ ತಪಾಸಣೆ ಬಳಿಕ ಸಂಜೆ ಐದು ಗಂಟೆಗೆ ಇಂಡಿಗೋ ವಿಮಾನ ಮುಂಬೈಗೆ ತೆರಳಿದೆ.
ಘಟನೆ ಸಂಬಂಧ ಇಂಡಿಗೋ ವಿಮಾನ ಸಿಬ್ಬಂದಿಯ ದೂರಿನಂತೆ ಬಜ್ಪೆ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
