‘ಆಸ್ಕರ್​’ಗಾಗಿ ಸಿನಿಮಾ ಟೈಟಲ್ ಬದಲಿಸಿದ ‘ಲಾಪತಾ ಲೇಡೀಸ್’ ಟೀಂ

ಆಮಿರ್ ಖಾನ್ ನಿರ್ಮಾಣದ ಹಾಗೂ ಅವರ ಮಾಜಿ ಪತ್ನಿ ಕಿರಣ್ ರಾವ್ ನಿರ್ದೇಶನದ ‘ಲಾಪತಾ ಲೇಡಿಸ್’ ಸಿನಿಮಾ ಈ ವರ್ಷದ ಆರಂಭದಲ್ಲಿ ರಿಲೀಸ್ ಆಗಿ ಮೆಚ್ಚುಗೆ ಪಡೆಯಿತು.

ಈ ಸಿನಿಮಾ ‘ಆಸ್ಕರ್ 2025’ ರೇಸ್​ನಲ್ಲಿ ಇದೆ. ಈ ಸಿನಿಮಾ ಭಾರತದಿಂದ ಅಧಿಕೃತವಾಗಿ ಆಯ್ಕೆ ಆಗಿದೆ. ಈಗ ಆಸ್ಕರ್ ರೇಸ್​ನಲ್ಲಿ ಇರುವ ಕಾರಣಕ್ಕೆ ಸಿನಿಮಾದ ಟೈಟಲ್ ಬದಲಿಸಲು ತಂಡ ಮುಂದಾಗಿದೆ. ಆಸ್ಕರ್ ಮಟ್ಟದಲ್ಲಿ ಸಿನಿಮಾ ಕ್ಯಾಂಪೇನ್ ಮಾಡಲು ಈ ಚಿತ್ರಕ್ಕೆ ‘ಲಾಸ್ಟ್​ ಲೇಡಿಸ್’ ಎಂದು ಹೆಸರನ್ನು ಇಡಲಾಗಿದೆ.

ಆಮಿರ್ ಖಾನ್ ಅವರ ನಿರ್ಮಾಣ ಸಂಸ್ಥೆಯಿಂದ ಈ ಬಗ್ಗೆ ಘೋಷಣೆ ಆಗಿದೆ. ‘ಲಾಸ್ಟ್ ಲೇಡಿಸ್’ ಎಂದು ಟೈಟಲ್ ಬದಲಿಸಿರುವುದಾಗಿ ಮಾಹಿತಿ ನೀಡಿದ್ದಾರೆ. ‘ಕಾಯುವಿಕೆ ಪೂರ್ಣಗೊಂಡಿದೆ. ಲಾಸ್ಟ್ ಲೇಡಿಸ್ ಚಿತ್ರದ ಅಧಿಕೃತ ಪೋಸ್ಟರ್. ಫೂಲ್ ಹಾಗೂ ಜಯಾಳ ಪ್ರಯಾಣದ ಬಗ್ಗೆ ಈ ಸಿನಿಮಾ ಹೇಳುತ್ತದೆ’ ಎಂದು ಆಮಿರ್ ಖಾನ್ ಪ್ರೊಡಕ್ಷನ್ಸ್ ಕಡೆಯಿಂದ ಘೋಷಣೆ ಆಗಿದೆ.

ಕಿರಣ್ ರಾವ್ ನಿರ್ದೇಶನ ಮಾಡಿರೋದು ಕೆಲವೇ ಕೆಲವು ಸಿನಿಮಾಗಳು. ಆ ಪೈಕಿ ‘ಲಾಸ್ಟ್ ಲೇಡಿಸ್’ ಸಾಕಷ್ಟು ಗಮನ ಸೆಳೆದಿದೆ. ಈ ಚಿತ್ರ ಥಿಯೇಟರ್​ನಲ್ಲಿ ಮೆಚ್ಚುಗೆ ಪಡೆಯಿತು. ಒಟಿಟಿಗೆ ಬಂದ ಬಳಿಕ ಈ ಚಿತ್ರವನ್ನು ಹೆಚ್ಚಿನ ಸಂಖ್ಯೆಯಲ್ಲಿ ವೀಕ್ಷಿಸಿದರು.