ದಮ್ಮಾಮ್: ಪೂರ್ವ ಸೌದಿಯಲ್ಲಿ ಕೇರಳದ ಯುವಕನನ್ನು ಬರ್ಬರ ಹತ್ಯೆ ಮಾಡಲಾಗಿದೆ. ಕೊಲೆಯಾದ ಯುವಕನನ್ನು ಕೇರಳದ ಕೊಲ್ಲಂ ಇತ್ತಿಕ್ಕರಾ ಮೂಲದ ಸನಲ್(35) ಎಂದು ಗುರುತಿಸಲಾಗಿದೆ. ಸೌದಿ ಅರೇಬಿಯಾದ ಪ್ರಮುಖ ಕಂಪೆನಿಯೊಂದರಲ್ಲಿ ಹಾಲು ವಿತರಣಾ ವ್ಯಾನ್ ನಲ್ಲಿ ಕೆಲಸ ಮಾಡುತ್ತಿದ್ದ ಮಲಯಾಳಿ ಸೇಲ್ಸ್ ಮ್ಯಾನ್ ಅನ್ನು ಘಾನಾ ಮೂಲದ ಆತನ ಸಹಾಯಕನೇ ಇರಿದು ಹತ್ಯೆಗೈದಿದ್ದಾನೆ.

ಅಲ್-ಅಹ್ಸಾದ ಜಬಲ್ ಶಹಬಾ ಬಳಿ ಇಂದು(ಬುಧವಾರ) ಮಧ್ಯಾಹ್ನ ಈ ಘಟನೆ ಸಂಭವಿಸಿದೆ. ಕೆಲಸದ ನಡುವೆ ಉಂಟಾದ ಜಗಳ ಕೊಲೆಯಲ್ಲಿ ಅಂತ್ಯಗೊಂಡಿದೆ ಎಂದು ವರದಿಯಾಗಿದೆ. ಸನಲ್ ಆರು ವರ್ಷಗಳಿಂದ ವಿದೇಶದಲ್ಲಿ ದುಡಿಯುತ್ತಿದ್ದರು. ಕೊಲೆ ನಡೆಸಿದ ಘಾನಾ ಮೂಲದವನು ಕೂಡ ಗಂಟಲು ಸೀಳಿಕೊಂಡು ಗಂಭೀರ ಸ್ಥಿತಿಯಲ್ಲಿದ್ದಾನೆ ಎನ್ನಲಾಗಿದೆ.

ಒರಟು ಸ್ವಭಾವದವನಾದ ಘಾನಾ ನಿವಾಸಿಯನ್ನು ಕೆಲಸಕ್ಕೆ ಜೊತೆಯಲ್ಲಿ ಯಾರೂ ಸೇರಿಸುತ್ತಿರಲಿಲ್ಲ. ಆದರೆ ಕೊಲ್ಲಲ್ಪಟ್ಟ ಸನಲ್ ಅವನನ್ನು ಸಹಾಯಕನಾಗಿ ಇರಿಸಿದ್ದನು ಎಂದು ತಿಳಿದುಬಂದಿದೆ. ಸನಲ್ ತಾಯಿ ಮತ್ತು ಓರ್ವ ಸಹೋದರಿಯನ್ನು ಅಗಲಿದ್ದಾರೆ.