ಕಾಶ್ಮೀರ: ಕಳೆದ ಒಂದು ತಿಂಗಳಿನಿಂದ ಜೈಲಿನಲ್ಲಿರುವ ಖ್ಯಾತ ಕಾಶ್ಮೀರಿ ಪತ್ರಕರ್ತ ಫಹಾದ್ ಶಾ ವಿರುದ್ದ ಸತತ ಎರಡನೇ ಬಾರಿಗೆ ಕರಾಳ UAPA ಕಾಯ್ದೆ ಅಡಿಯಲ್ಲಿ ಪ್ರಕರಣ ದಾಖಲಿಸಲಾಗಿದೆ ಎಂದು ಆರೋಪಿ ಪರ ವಕೀಲರಾದ ಉಮೈರ್ ರೋಂಗಾ ಶುಕ್ರವಾರ ತಿಳಿಸಿದ್ದಾರೆ.
ಶ್ರೀನಗರದಲ್ಲಿ ಕಾರ್ಯಾಚರಿಸುವ ‘ಕಾಶ್ಮೀರ ವಾಲ’ ವೆಬ್ ಪೋರ್ಟಲ್ ಎಂಬ ಸುದ್ದಿ ಸಂಸ್ಥೆಯ ಪ್ರಧಾನ ಸಂಪಾದಕರಾದ ಫಹಾದ್ ಶಾ ಅವರನ್ನು ಮೇ 2020 ರಲ್ಲಿ ವರದಿ ಮಾಡಿದ ಪ್ರಕರಣಕ್ಕೆ ಸಂಬಂಧಿಸಿದಂತೆ ಬಂಧಿಸಿ 5 ದಿನಗಳ ಪೊಲೀಸ್ ಕಸ್ಟಡಿಗೆ ಒಪ್ಪಿಸಲಾಗಿದೆ ಎಂದು ರೋಂಗಾ ತಿಳಿಸಿದ್ದಾರೆ.
ಘಟನೆಗೆ ಸಂಬಂಧಿಸಿದಂತೆ ಟ್ವೀಟ್ ಮೂಲಕ ಪ್ರತಿಕ್ರಿಯಿಸಿದ ವಕೀಲರಾದ ಉಮೈರ್ ರೋಂಗಾ, ‘ ಶ್ರೀನಗರ ಪ್ರಕರಣಕ್ಕೆ ಸಂಬಂಧಿಸಿದಂತೆ ಪತ್ರಕರ್ತ ಫಹಾದ್ ಶಾ ಅವರನ್ನು ಬಂಧಿಸಿ 5 ದಿನಗಳ ಪೊಲೀಸ್ ಕಸ್ಟಡಿಗೆ ಒಪ್ಪಿಸಲಾಗಿದೆ. ಇದು ಅವರು ವಿರುದ್ಧ ನಡೆದ 3ನೇ ಬಂಧನವಾಗಿದೆ. ಪ್ರಸಕ್ತ ಈ ಪ್ರಕರಣದಲ್ಲಿ ಮತ್ತೆ ಕರಾಳ UAPA ಕಾಯ್ದೆ ಅಡಿಯಲ್ಲಿ ಬಂಧಿಸಲಾಗಿದ್ದು, ಕಳೆದ 37 ದಿನಗಳಲ್ಲಿ UAPA ಕಾಯ್ದೆ ಅಡಿಯಲ್ಲಿ ಇವರ ವಿರುದ್ಧದ 2ನೇ ಬಂಧನವಾಗಿದೆ ಎಂದು ತಿಳಿಸಿದ್ದಾರೆ.
ಕಾಶ್ಮೀರದ ಪ್ರಮುಖ ಯುವ ಪತ್ರಕರ್ತರಲ್ಲಿ ಒಬ್ಬರಾದ ಫಹಾದ್ ಅವರನ್ನು ಪ್ರತ್ಯೇಕ ಪ್ರಕರಣಕ್ಕೆ ಸಂಬಂಧಿಸಿದಂತೆ ಫೆಬ್ರವರಿ 4 ಬಂಧಿಸಲಾಗಿದ್ದು, ಜಾಮೀನು ಪಡೆದು ಬಿಡುಗಡೆಗೊಂಡ ಕೆಲವೇ ಗಂಟೆಗಳಲ್ಲಿ ಮಾರ್ಚ್ 5 ರಂದು ಶ್ರೀನಗರ ಪ್ರಕರಣದಲ್ಲಿ ಮತ್ತೆ ಬಂಧಿಸಲಾಗಿತ್ತು.
ಜುಲೈ 9, 2020 ರಂದು ಕಾಶ್ಮೀರ ವಾಲ ಸಂಪಾದಕರಾದ ಫಹಾದ್ ವಿರುದ್ಧ ಗಲಭೆ, ಕೊಲೆಯತ್ನ, ಪ್ರಚೋದನಾಕಾರಿ ಕರಪತ್ರ ಮುದ್ರಣ ಮತ್ತು ಹಂಚಿಕೆ ಆರೋಪದಲ್ಲಿ ಪೊಲೀಸರು ಪ್ರಕರಣ ದಾಖಲಿಸಿದ್ದರು. ಈ ಪ್ರಕರಣದಲ್ಲಿ ಫೆಬ್ರವರಿ 4 ರಂದು ಅವರನ್ನು UAPA ಕಾಯ್ದೆ ಅಡಿಯಲ್ಲಿ ಬಂಧಿಸಲಾಗಿತ್ತು.
ಈ ಪ್ರಕರಣದಲ್ಲಿ ಫೆಬ್ರವರಿ 27 ರಂದು ಜಾಮೀನು ಪಡೆದು ಹೊರಬಂದ ಫಹಾದ್ ಅವರನ್ನು ಇನ್ನೊಂದು ಪ್ರಕರಣದ ಹಿನ್ನೆಲೆಯಲ್ಲಿ ಮಾರ್ಚ್ 5 ರಂದು ಶೋಪಿಯಾನ್ ಪೊಲೀಸರು ಮತ್ತೆ ಬಂಧಿಸಿ ಜೈಲಿಗಟ್ಟಿದರು. ಈ ಪ್ರಕರಣದಲ್ಲಿ ಶೋಪಿಯಾನ್ ನ್ಯಾಯಾಲಯವು ಮಾರ್ಚ್ 6 ರಂದು ಜಾಮೀನು ನೀಡಲಾಗಿತ್ತು.
ಈ ಮಧ್ಯೆ ಮೇ 2020 ರಲ್ಲಿ ಸಶಸ್ತ್ರ ಪಡೆಗಳು ಮತ್ತು ಆಪಾದಿತ ಉಗ್ರರ ನಡುವಿನ ಗುಂಡಿನ ಕಾಳಗದ ಕುರಿತು ಕಾಶ್ಮೀರ ವಾಲಾ ವರದಿ ಪ್ರಕಟಿಸಿದಕ್ಕೆ ಸಂಬಂಧಿಸಿದಂತೆ ಶ್ರೀನಗರ ಪೊಲೀಸರು ಶಾ ಅವರನ್ನು UAPA ಕಾಯ್ದೆ ಅಡಿಯಲ್ಲಿ ಮತ್ತೆ ಬಂಧಿಸಿದ್ದಾರೆ.
