ಲತೇಹರ್ (ಜಾರ್ಖಂಡ್): ಜಾರ್ಖಂಡ್ ನ ಲತೇಹರ್ ಎಂಬಲ್ಲಿ ಮುಸ್ಲಿಮ್ ಜಾನುವಾರು ವ್ಯಾಪಾರಿಗಳನ್ನು ಗುಂಪು ಹತ್ಯೆ ನಡೆಸಿದ ಬಳಿಕ ಮರವೊಂದಕ್ಕೆ ನೇತುಹಾಕಿದ ಘಟನೆಗೆ ಸಂಬಂಧಿಸಿದಂತೆ ಬಂಧಿತ ಸಂಘಪರಿವಾರದ ಕಾರ್ಯಕರ್ತರಿಗೆ ಹೈಕೋರ್ಟ್ ಜಾಮೀನು ಮಂಜೂರು ಮಾಡಿದೆ.

2018 ರಲ್ಲಿ ಆರೋಪಿಗಳಿಗೆ ಜಿಲ್ಲಾ ನ್ಯಾಯಾಲಯ ನೀಡಿದ್ದ ಜೀವಾವಧಿ ಶಿಕ್ಷೆಯನ್ನು ಜಾರ್ಖಂಡ್ ಹೈಕೋರ್ಟ್ ಅಮಾನತುಗೊಳಿಸಿ ಈ ಆದೇಶ ನೀಡಿದೆ.

ಜಾರ್ಖಂಡ್ ನ ಲತೇಹರ್ ನಲ್ಲಿ 12 ವರ್ಷದ ವಿದ್ಯಾರ್ಥಿ ಇಂತಿಯಾಝ್ ಖಾನ್ ಮತ್ತು 32 ವರ್ಷದ ಜಾನುವಾರು ವ್ಯಾಪಾರಿ ಮಝ್ಲೂಮ್ ಅನ್ಸಾರಿ ಎಂಬವರನ್ನು ಮಾರ್ಚ್ 2016 ರಲ್ಲಿ ಅಪಹರಿಸಿದ ಬಳಿಕ ಹೊಡೆದು ಕೊಂದು ಮರಕ್ಕೆ ನೇತು ಹಾಕಲಾಗಿತ್ತು.

ಹೈಕೋರ್ಟ್ ಆದೇಶದ ಕುರಿತು ಮಾಧ್ಯಮಗಳಿಗೆ ಪ್ರತಿಕ್ರಿಯಿಸಿದ ಸಂತ್ರಸ್ತ ಪರ ವಕೀಲರಾದ ನದೀಮ್ ಖಾನ್, ಜಾಮೀನು ಆದೇಶವನ್ನು ಪ್ರಶ್ನಿಸಿ ಸುಪ್ರೀಮ್ ಕೋರ್ಟ್ ಮೊರೆ ಹೋಗುವುದಾಗಿ ತಿಳಿಸಿದ್ದಾರೆ.

ಜಾರ್ಖಂಡ್ ಅಸೆಂಬ್ಲಿಯಲ್ಲಿ ಗುಂಪುಹತ್ಯೆ ವಿರೋಧಿ ಮಸೂದೆಯನ್ನು ಮಂಡಿಸಿದ 4 ತಿಂಗಳ ನಂತರ ಹೈಕೋರ್ಟ್‌ ನಿಂದ ಈ ತೀರ್ಪು ಹೊರಬಿದ್ದಿದೆ.