ಜೆರುಸಲೇಂ : ಕೋವಿಡ್‌ ಪ್ರಕರಣಗಳು ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ, ಯುನೈಟೆಡ್‌ ಅರಬ್‌ ಎಮಿರೇಟ್ಸ್‌ (ಯುಎಇ)ಗೆ ಪ್ರಯಾಣಿಸುವವರಿಗೆ ಇಸ್ರೇಲ್‌ ಕಠಿಣ ಎಚ್ಚರಿಕೆಯನ್ನು ನೀಡಿದೆ. ಇಸ್ರೇಲಿಗರು ಸದ್ಯಕ್ಕೆ ಪ್ರಯಾಣಿಸಬಾರದ ದೇಶಗಳಲ್ಲಿ ಯುಎಇಯನ್ನು ಕೂಡ ಸೇರಿಸಲಾಗಿದೆ ಎಂದು ಇಸ್ರೇಲ್‌ ಆರೋಗ್ಯ ಸಚಿವಾಲಯದ ಮೂಲಗಳನ್ನಾಧರಿಸಿ ವರದಿಯೊಂದು ತಿಳಿಸಿದೆ.
ಇಸ್ರೇಲಿಗರು ಪ್ರಯಾಣಿಸ ಬಾರದ ದೇಶಗಳಲ್ಲಿ ಪೆರುವನ್ನು ಕೈಬಿಡಲಾಗಿದೆ ಮತ್ತು ಯುಎಇ, ಉರುಗ್ವೆ, ಇಥಿಯೋಪಿಯಾ, ಬೊಲಿವಿಯಾ, ಮಾಲ್ಡೀವ್ಸ್‌, ನಮೀಬಿಯಾ, ನೇಪಾಳ, ಪೆರುಗ್ವೆ, ಚಿಲಿ, ಕೊಲಂಬಿಯಾ, ಕೋಸ್ಟರಿಕಾ, ತ್ಸುನಿಯಾ ಮುಂತಾದ ದೇಶಗಳನ್ನು ಈ ಪಟ್ಟಿಗೆ ಸೇರಿಸಲಾಗಿದೆ.
ಈ ದೇಶಗಳಲ್ಲಿ ಗಣನೀಯ ಪ್ರಮಾಣದಲ್ಲಿ ಕೋವಿಡ್‌ ಪ್ರಕರಣಗಳಲ್ಲಿ ಸುಧಾರಣೆ ಕಂಡುಬರದಿದ್ದಲ್ಲಿ, ಈ ದೇಶಗಳಿಗೆ ಇಸ್ರೇಲಿಗರು ಪ್ರಯಾಣಿಸುವುದನ್ನು ನಿಷೇಧಿಸಲಾಗುತ್ತದೆ ಎಂದು ಸಚಿವಾಲಯದ ಸೂಚನೆಯಲ್ಲಿ ತಿಳಿಸಲಾಗಿದೆ. ಕೋವಿಡ್‌ ಅಪಾಯವಿರುವ ದೇಶಗಳಿಗೆ ಪ್ರಯಾಣಿಸಿದವರು ಕಠಿಣ ಕೋವಿಡ್‌ ನಿಯಮಗಳನ್ನು ಪಾಲಿಸಬೇಕೆಂದು ಸೂಚಿಸಲಾಗಿದೆ.
