ಹೆಣ ಬಿದ್ದರೆ ಸಾಕು ಬಿಜೆಪಿಯವರು ರಣಹದ್ದುಗಳಂತೆ ರಾಜಕೀಯ ಮಾಡಲು ಮುಂದಾಗುತ್ತಾರೆ: ರಾಮಲಿಂಗಾ ರೆಡ್ಡಿ

►ಕೈಲಾಗದ ಬಿಜೆಪಿಯವರಿಗೆ ಅಪಪ್ರಚಾರವೇ ಕೊನೆ ಅಸ್ತ್ರ

ಬೆಂಗಳೂರು: ‘ಕೈಲಾಗದ ಬಿಜೆಪಿ ಸರ್ಕಾರಕ್ಕೆ ಕಾಂಗ್ರೆಸ್ ವಿರುದ್ಧ ಅಪಪ್ರಚಾರ ಮಾಡುವುದೇ ಕೊನೆ ಅಸ್ತ್ರ ‘ ಎಂದು ಕೆಪಿಸಿಸಿ ಕಾರ್ಯಾಧ್ಯಕ್ಷ ರಾಮಲಿಂಗಾ ರೆಡ್ಡಿ, ಸರ್ಕಾರದ ವಿರುದ್ಧ ವಾಗ್ದಾಳಿ ನಡೆಸಿದರು.

ಕೆಪಿಸಿಸಿ ಕಚೇರಿಯಲ್ಲಿ ಶುಕ್ರವಾರ ಮಾಧ್ಯಮಗಳಿಗೆ ಪ್ರತಿಕ್ರಿಯೆ ನೀಡಿದ ರಾಮಲಿಂಗಾ ರೆಡ್ಡಿ, ‘ 2013ರಿಂದ 2018ರ ವರೆಗೂ ಕಾಂಗ್ರೆಸ್ ಸರ್ಕಾರ ಅಧಿಕಾರದಲ್ಲಿತ್ತು. 23 ಹಿಂದೂ ಯುವಕರ ಕೊಲೆ ಆಗಿದೆ ಎಂದು ರಾಜ್ಯದ ಮೂಲೆ ಮೂಲೆಯಲ್ಲಿ ಅಪಪ್ರಚಾರ ಮಾಡಿಕೊಂಡು ಓಡಾಡಿದರು. ಹೆಣ ಬಿದ್ದರೆ ಸಾಕು ರಣಹದ್ದುಗಳಂತೆ ರಾಜಕೀಯ ಮಾಡಲು ಮುಂದಾಗುತ್ತಿದ್ದರು ಎಂದು ಕುಟುಕಿದರು.

ನಾನು ಗೃಹ ಸಚಿವನಾಗಿದ್ದಾಗ ಸಿಬಿಐ ವರದಿ ತರಿಸಿಕೊಂಡೆ. ಆಗ 4-5 ಮಂದಿ ರಾಜಕೀಯ ಕಾರಣಕ್ಕೆ ಹತ್ತೆಯಾದರೆ ಉಳಿದ ಹತ್ಯೆಗಳು ಹಳೇ ದ್ವೇಷ, ಆಸ್ತಿ ಜಗಳ, ಅಪಘಾತದಿಂದ ಸತ್ತಿದ್ದಾರೆ. ಆ ಬಗ್ಗೆ ‘ನಗ್ನ ಸತ್ಯ’ ಎಂಬ ಪುಸ್ತಕ ಬಿಡುಗಡೆ ಮಾಡಿದ್ದೆ. ಅದರಲ್ಲಿ ಪ್ರತಿ ಪ್ರಕರಣದ ಎಫ್ ಐಆರ್, ಚಾರ್ಜ್ ಶೀಟ್, ಹತ್ಯೆ ಕಾರಣ ಎಲ್ಲವನ್ನೂ ಪ್ರಕಟಿಸಿದ್ದೆ. ಈ ಪುಸ್ತಕವನ್ನು ಮುಖ್ಯಮಂತ್ರಿಗಳಿಗೂ ಕಳುಹಿಸಿ ಕೊಡುತ್ತೇನೆ. ಇದರಲ್ಲಿ ಸತ್ತವರು ಆರ್ ಎಸ್ ಎಸ್, ವಿಶ್ವ ಹಿಂದೂ ಪರಿಷತ್ ಹಾಗೂ ಬಿಜೆಪಿ ಪಕ್ಷದವರ ಇದ್ದರು. ಇನ್ನು ಇದೇ ಅವಧಿಯಲ್ಲಿ ಇಷ್ಟೇ ಪ್ರಮಾಣದಲ್ಲಿ ಎಸ್ ಡಿ ಪಿ ಐ, ಪಿ ಫ್ಎಐ ಸದಸ್ಯರ ಹತ್ಯೆಯಾಗಿದೆ. ಅದಕ್ಕೆ ಕಾರಣ ಯಾರು? ಎಂದು ರಾಮಲಿಂಗಾ ರೆಡ್ಡಿ ಪ್ರಶ್ನಿಸಿದರು.

ದಕ್ಷಿಣ ಕನ್ನಡದಲ್ಲಿ ಈ ರೀತಿ ಕೊಲೆ ಯಾಕೆ ಆಗುತ್ತಿದೆ ಎಂದು ಪರಿಶೀಲನಾ ಸಭೆ ಮಾಡಿದ್ದೆ. ಎರಡೂ ಕಡೆ ಕೊಲೆಗಳು ವ್ಯವಸ್ಥಿತವಾಗಿ ನಡೆಯುತ್ತಿದ್ದವು. ಕೊಲೆಯಲ್ಲಿ ಭಾಗಿಯಾದವರು ಶರಣಾಗುತ್ತಿದ್ದರು. ನಂತರ ವಕೀಲರಿಂದ ಜಾಮೀನು ನೀಡಿ ಬಿಡುಗಡೆ ಆಗುತ್ತಿದ್ದರು. ಜೈಲಿನಲ್ಲಿ ಉತ್ತಮ ಸೌಲಭ್ಯ ಪಡೆಯುತ್ತಿದ್ದರು. ಕೊಲೆ ಮಾಡಿದವರು ಮಾತ್ರ ಚಾರ್ಜ್ ಶೀಟ್ ಆಗುತ್ತಿತ್ತು. ಪಿತೂರಿ ಮಾಡಿದವರ ಹೆಸರು ಸೇರುತ್ತಿರಲಿಲ್ಲ. ನಂತರ 2017-18ರಲ್ಲಿ ಪಿತೂರಿ ಮಾಡಿದವರನ್ನು ಪ್ರಕರಣದಲ್ಲಿ ಸೇರಿಸಲು ಆರಂಭಿಸಿದ ನಂತರ ಕೊಲೆಗಳು ನಿಂತಿತ್ತು ಎಂದು ರಾಮಲಿಂಗಾ ರೆಡ್ಡಿ ವಿವರಿಸಿದರು.

ಈಗ ಮತ್ತೆ ಕೊಲೆ ಆರಂಭವಾಗಿದೆ. ಕಳೆದ ಮೂರು ವರ್ಷಗಳಿಂದ ಇವರೇ ಆಡಳಿತ ಮಾಡುತ್ತಿದ್ದು, ಕೊಲೆಗಳು ನಡೆಯುತ್ತಿವೆ. ನಮ್ಮ ಸರ್ಕಾರ ಕೊಲೆಗಡುಕರು ಕೇಸ್ ವಾಪಸ್ ಪಡೆದಿದೆ ಎಂದು ಬಿಜೆಪಿಯವರು ಹೇಳುತ್ತಿದ್ದಾರೆ. ಆದರೆ ನಮ್ಮ ಸರ್ಕಾರದಲ್ಲಿ ರೈತರು, ಪ್ರಗತಿಪರ ಹೋರಾಟಗಾರರ ಪ್ರಕರಣವನ್ನು ಮಾತ್ರ ಹಿಂಪಡೆದಿದ್ದೇವೆ. ಕೋಮುಹತ್ಯೆ  ಭಾಗಿಯಾದವರ ಪ್ರಕರಣ ಹಿಂಪಡೆದಿಲ್ಲ. ಇವರ ಸರ್ಕಾರ ಬಂದ ನಂತರ ಎಷ್ಟು ಪ್ರಕರಣ ಹಿಂಪಡೆದಿದ್ದಾರೆ. ಆಸ್ತಿಪಾಸ್ತಿ ನಷ್ಟ, ಕೊಲೆ ಪ್ರಯತ್ನ, ಪೊಲೀಸರ ಮೇಲೆ ಹಲ್ಲೆ ಮಾಡಿದವರ ಪ್ರಕರಣ ಹಿಂಪಡೆದಿದೆ. ನಮ್ಮ ಸರ್ಕಾರ ಹೋಗಿ 4 ವರ್ಷವಾದರೂ ಇವರು ಯಾಕೆ ಸುಮ್ಮನೆ ಇದ್ದಾರೆ? ಸುಮ್ಮನೆ ಬಾಯಿಗೆ ಬಂದ ಹಾಗೆ ಮಾತನಾಡುತ್ತಾರೆ. ಇವರಿಗೆ ಆಡಳಿತ ಮಾಡಲಾಗದೆ ಮಾತನಾಡುತ್ತಾರೆ ಎಂದು ರಾಮಲಿಂಗಾರೆಡ್ಡಿ ಹೇಳಿದರು.

ಪ್ರವೀಣ್ ಸತ್ತ ನಂತರ ಮತ್ತೊಂದು ಹತ್ಯೆ ನಡೆದಿದೆ. ಈ ಬಗ್ಗೆ ಯಾಕೆ ಮಾತನಾಡುತ್ತಿಲ್ಲ. ಅವರು ಯಾವುದೇ ತನಿಖೆ ಮಾಡಲಿ. ಶಿವಾಜಿನಗರದ ರುದ್ರೇಶ್ ಪ್ರಕರಣ ಕೂಡ ಎನ್ ಐಎ ಗೆ ನೀಡಿದ್ದರು. ಆ ಪ್ರಕರಣ ಏನಾಯ್ತು? ಉಡುಪಿಯಲ್ಲಿ ಪರೇಶ್ ಮೇಸ್ತ ಪ್ರಕರಣ ಏನಾಯ್ತು. ಇಂತಹ ಪ್ರಕರಣಗಳನ್ನು ತ್ವರಿತ ನ್ಯಾಯಾಲಯಕ್ಕೆ ಕಳುಹಿಸಿ, ಸಾಕ್ಷ್ಯಾಧಾರ ಕಲೆಹಾಕಿ, ತಪ್ಪಿತಸ್ಥರಿಗೆ ಶಿಕ್ಷೆಯಾಗಲಿ. ಇಂತಹ ಪ್ರಕರಣಗಳಲ್ಲಿ ಶಿಕ್ಷೆ ಪ್ರಮಾಣ ಕಡಿಮೆ ಇದೆ. ಇದೇ ಕಾರಣಕ್ಕೆ ಇಂತಹ ಪ್ರಕರಣ ಹೆಚ್ಚಾಗಿದೆ ಎಂದು ರಾಮಲಿಂಗಾ ರೆಡ್ಡಿ ಹೇಳಿದರು.

ಕೇವಲ ಒಬ್ಬರ ಪ್ರಕರಣ ಮಾತ್ರವಲ್ಲ, ಎಲ್ಲಾ ಕೊಲೆಯ ತನಿಖೆಯೂ ಆಗಬೇಕು. ಕಾನೂನು ಸುವ್ಯವಸ್ಥೆ ಕಾಪಾಡುವವರು ಪಕ್ಷಾತೀತವಾಗಿರಬೇಕು. ಆರೂವರೆ ಕೋಟಿ ಜನರಿಗೆ ಕಾನೂನು ಸುವ್ಯವಸ್ಥೆ ಕಾಪಾಡಲಿಲ್ಲ ಎಂದರೆ ನೆಮ್ಮದಿಯಾಗಿ ಬದುಕಲು ಸಾಧ್ಯವಿಲ್ಲ.

ದಕ್ಷಿಣ ಕನ್ನಡದಲ್ಲಿ  ಇತ್ತೀಚಗೆ ನಡೆದ ಮೂರು ಹತ್ಯೆಗಳ ಬಗ್ಗೆ ಸರಿಯಾದ ತನಿಖೆ ಮಾಡಿ ಆರೋಪಿಗಳಿಗೆ ಶಕ್ಷೆಯಾಗಬೇಕು. ಶಾಂತಿ ಕಡದುತ್ತಿರುವುದು ಕಾಂಗ್ರೆಸ್ ಹಾಗೂ ಜೆಡಿಎಸ್ ಅಲ್ಲ. ಬಿಜೆಪಿಯ ಪರಿವಾರ ಹಾಗೂ ಎಸ್ ಡಿ ಪಿಐ, ಪಿಎಫ್ ಐ. ಈ ಎಲ್ಲಾ ಕೊಲೆಗಳಿಗೆ ಇವರೇ ಕಾರಣ ಎಂದು ಹೇಳಿದರು.

‘ ಬಿಬಿಎಂಪಿ ಚುನಾವಣೆಗೆ ಸಂಬಂಧಿಸಿದಂತೆ ಕೇಳಿದ ಪ್ರಶ್ನೆಗೆ ಉತ್ತರಿಸಿದ ಅವರು, ‘ ಬೆಂಗಳೂರಿಗೆ ಸಂಬಂಧಿಸಿದಂತೆ ಬೆಳಗ್ಗೆಯಿಂದ ಉಸ್ತುವಾರಿ ಪ್ರಧಾನ ಕಾರ್ಯದರ್ಶಿಗಳು, ಪರಾಜಿತ ಅಭ್ಯರ್ಥಿಗಳು, ಬ್ಲಾಕ್ ಅಧ್ಯಕ್ಷರ ಸಭೆ ನಡೆಸಲಾಗುತ್ತಿದೆ. ಆದಷ್ಟು ಬೇಗ ಚುನಾವಣೆ ನಡೆಯಲಿದ್ದು, ಪಕ್ಷ ಎಲ್ಲ ತಯಾರಿ ಮಾಡುತ್ತಿದೆ. ವಾರ್ಡ್ ಮರುವಿಂಗಡಣೆಯನ್ನು ಹೇಗೆ ಬಿಜೆಪಿಯವರೇ ಮಾಡಿದರೋ ಅದೇ ರೀತಿ ಮೀಸಲಾತಿ ಪಟ್ಟಿಯನ್ನು ಅವರೇ ಮಾಡುತ್ತಿದ್ದಾರೆ. ಅಧಿಕಾರಿಗಳು ಇದರಲ್ಲಿ ಏನು ಮಾಡುತ್ತಿಲ್ಲ. ಕಾಂಗ್ರೆಸ್ ಸೋಲಿಸಲು ಏನು ಮಾಡಬೇಕು ಎಂದು ಎಲ್ಲವನ್ನೂ ಅವರೇ ಮಾಡುತ್ತಿದ್ದಾರೆ ‘ ಎಂದು ತಿಳಿಸಿದರು.