ಪುಣೆ : ಬಂಗಾಳದಿಂದ ತರಿಸಲಾದ ವಿಶೇಷ ಮರಳನ್ನು ಬಿಸಿ ಮಾಡಿದರೆ ಚಿನ್ನವಾಗುತ್ತದೆ ಎಂದ ಪರಿಚಿತನ ಮಾತನ್ನು ನಂಬಿ 4 ಕೆ.ಜಿ. ಮರಳು ಖರೀದಿಸಿದ ಆಭರಣ ವ್ಯಾಪಾರಿಯೊಬ್ಬರು ಸುಮಾರು 50 ಲಕ್ಷ ರೂ. ಕಳೆದುಕೊಂಡ ಘಟನೆ ನಡೆದಿದೆ. ಪುಣೆ ಮೂಲದ ಉದ್ಯಮಿ ವಂಚನೆ ಹೋಗಿರುವ ವ್ಯಕ್ತಿ.

ಆರೋಪಿ ವ್ಯಕ್ತಿಯು ತಮ್ಮ ಅಂಗಡಿಗೆ ವರ್ಷದ ಹಿಂದೆ ಬಂದಿದ್ದ, ಬಳಿಕ ಪರಿಚಯ ಮಾಡಿಕೊಂಡು ಆತ್ಮೀಯನಾಗಿದ್ದ. ಉದ್ಯಮಿಯ ಕುಟುಂಬಕ್ಕೂ ಪರಿಚಿತನಾಗಿದ್ದ ಆತ, ಡೈರಿ ಉತ್ಪನ್ನಗಳನ್ನು ಪೂರೈಸುತ್ತಿದ್ದ.

ತಾನು ಬಂಗಾಳದಿಂದ ಖರೀದಿಸಿದ 4 ಕೆ.ಜಿ. ಮರಳು ತುಂಬಿದ ಚೀಲವನ್ನು ನೀಡಿ, ಇದನ್ನು ಬಿಸಿ ಮಾಡಿದರೆ ಚಿನ್ನವಾಗುತ್ತದೆ ಎಂದು ಆತ ಉದ್ಯಮಿಯನ್ನು ನಂಬಿಸಿದ್ದ. ಉದ್ಯಮಿಯು ಆತನ ಮಾತು ನಂಬಿ, 30 ಲಕ್ಷ ರೂ. ನಗದು ಮತ್ತು 20 ಲಕ್ಷ ರೂ. ಆಭರಣ ನೀಡಿದ್ದರು.

ಮರಳನ್ನು ಬಿಸಿ ಮಾಡಿದಾಗ, ತಾನು ಮೋಸ ಹೋಗಿರುವುದು ಖಚಿತಗೊಂಡ ಹಿನ್ನೆಲೆಯಲ್ಲಿ ಉದ್ಯಮಿ ಪುಣೆ ಹಡಪ್ ಸರ್ ಪುರ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ.