ಚೆನ್ನೈ : ಮುಂದಿನ ಕೆಲವೇ ತಿಂಗಳುಗಳಲ್ಲಿ ತಮಿಳುನಾಡು, ಪಶ್ಚಿಮ ಬಂಗಾಳಗಳಲ್ಲಿ ವಿಧಾನಸಭಾ ಚುನಾವಣೆ ನಡೆಯಲಿದೆ. ಈ ಬಾರಿ ಬಜೆಟ್ ನಲ್ಲಿ ಈ ರಾಜ್ಯಗಳಿಗೆ ಭರ್ಜರಿ ಕೊಡುಗೆ ನೀಡಿದ ಬಳಿಕ, ಇದೀಗ ಪ್ರಧಾನಿ ನರೇಂದ್ರ ಮೋದಿಯವರು ನಾಳೆ(ಭಾನುವಾರ) ತಮಿಳುನಾಡು ಪ್ರವಾಸ ಕೈಗೊಳ್ಳುತ್ತಿದ್ದಾರೆ. ಆದರೆ, ಇಂದೇ(ಶನಿವಾರ) ಟ್ವಿಟರ್ ನಲ್ಲಿ #GoBackModi ಟ್ರೆಂಡಿಂಗ್ ಆಗಿದ್ದು, ಬಿಜೆಪಿಗರಿಗೆ ಭಾರೀ ಮುಜುಗರವನ್ನುಂಟು ಮಾಡಿದೆ.
ಟ್ವಿಟರ್ ನಲ್ಲಿ ಇದೀಗ #GoBackModi ಟಾಪ್ ಟ್ರೆಂಡಿಂಗ್ ನಲ್ಲಿದೆ. ತಮಿಳು ನಟಿ ಓವಿಯಾ ಕೂಡ ಈ ಹ್ಯಾಶ್ ಟ್ಯಾಗ್ ಟ್ವೀಟ್ ಮಾಡಿದ್ದಾರೆ. ಹೋರಾಟಗಾರ್ತಿ ಮೀನಾ ಕಂದಸ್ವಾಮಿ ಅವರು, “ಮೋದಿ ವಾಪಾಸ್ ಹೋಗು ಎನ್ನುವುದರಲ್ಲಿ ನಾವು ಒಂದು ದಿನ ಮುಂದಿದ್ದೇವೆ ಎಂದು ಗೊತ್ತಿರಲಿಲ್ಲ” ಎಂದು ಟ್ವೀಟ್ ಮಾಡಿದ್ದಾರೆ.
“ಗೋ ಬ್ಯಾಕ್” ಘೋಷಣೆ ಸ್ವಾತಂತ್ರ್ಯ ಹೋರಾಟದ ವೇಳೆ ಗಾಂಧೀಜಿಯವರು ಬ್ರಿಟಿಷರ ವಿರುದ್ಧ ಬಳಸುತ್ತಿದ್ದರು. “ಗೋ ಬ್ಯಾಕ್ ಸೈಮನ್ ಕಮೀಶನ್” ಗಾಂಧೀಜಿಯವರ ಹೋರಾಟಗಳಲ್ಲಿ ಪ್ರಮುಖ ಹೋರಾಟ ಆಗಿದೆ. ಈಗ ಸೋಶಿಯಲ್ ಮೀಡಿಯಾ ಕಾಲ, ಈಗ ದೇಶದ ಜನನಾಯಕರನ್ನೇ ‘ಗೋ ಬ್ಯಾಕ್’ ಎನ್ನುವ ಮಟ್ಟಿಗೆ ಜನರು ಬಂದಿರುವುದು ವಿಪರ್ಯಾಸ.
