ಭೋಪಾಲ್: ಪ್ರಚೋದನಕಾರಿ ಭಾಷಣಗಳ ಮೂಲಕ ಸುದ್ದಿಯಾಗುವ ಸಾಧ್ವಿ ರಿಥಂಬರ ನಡೆಸುವ ಆಶ್ರಮದಲ್ಲಿ ನಾಲ್ವರು ಬಾಲಕಿಯರು ಸಾವನ್ನಪ್ಪಿರುವ ಬಗ್ಗೆ ವರದಿಯಾಗಿದೆ. ಕೋಠಿ ಗ್ರಾಮದ ಸಾಧ್ವಿ ರಿಥಂಬರದ ಪೀತಾಂಬರೇಶ್ವರ ಆಶ್ರಮದ ಬಳಿ ಇರುವ ಕಾಲುವೆಯೊಂದರಲ್ಲಿ ಆಶ್ರಮದ ನಾಲ್ವರು ಬಾಲಕಿಯರು ಮುಳುಗಿ ಸಾವನ್ನಪ್ಪಿದ್ದಾರೆ ಎಂದು ತಿಳಿದು ಬಂದಿದೆ.
ಮಧ್ಯಪ್ರದೇಶದ ಖಾಂಡ್ವಾ ಜಿಲ್ಲೆಯ ಕಾಲುವೆಯಲ್ಲಿ ಸಾಧ್ವಿ ರಿಥಂಬರ ನಡೆಸುತ್ತಿದ್ದ ಆಶ್ರಮ ಶಾಲೆಯಲ್ಲಿ ಓದುತ್ತಿದ್ದ ನಾಲ್ವರು ಬಾಲಕಿಯರು ಮುಳುಗಿ ಸಾವನ್ನಪ್ಪಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ. ಮೃತ ಬಾಲಕಿಯರನ್ನು ವೈಶಾಲಿ, ಪ್ರತಿಜ್ಞಾ, ದಿವ್ಯಾಂಶಿ ಮತ್ತು ಅಂಜನಾ ಎಂದು ಗುರುತಿಸಲಾಗಿದೆ.
ಸಾವನ್ನಪ್ಪಿರುವ ಎಲ್ಲಾ ಬಾಲಕಿಯರು 5 ನೇ ತರಗತಿಯ ವಿದ್ಯಾರ್ಥಿಗಳಾಗಿದ್ದು, ಸ್ನಾನಕ್ಕಾಗಿ ಕಾಲುವೆಗೆ ಹೋಗಿದ್ದರು ಎನ್ನಲಾಗಿದೆ. ಇದೇ ವೇಳೆ ಓರ್ವ ಬಾಲಕಿ ಕಾಲುವೆಗೆ ಬಿದ್ದಿದ್ದನ್ನು ಕಂಡ ಇತರರು ರಕ್ಷಿಸಲು ಮುಂದಾಗಿದ್ದಾರೆ, ಆದರೆ ದುರದೃಷ್ಟವಶಾತ್ ನಾಲ್ವರೂ ತಮ್ಮ ಪ್ರಾಣ ಕಳೆದುಕೊಂಡಿದ್ದಾರೆ ಎಂದು ಪೊಲೀಸ್ ಅಧಿಕಾರಿ ಬಲರಾಮ್ ಸಿಂಗ್ ಹೇಳಿದ್ದಾರೆ.
ಇತ್ತೀಚೆಗಷ್ಟೆ ಸಾಧ್ವಿ ರಿಥಂಬರ ಭಾಷಣವೊಂದರಲ್ಲಿ ಹಿಂದೂಗಳು ನಾಲ್ಕು ಮಕ್ಕಳನ್ನು ಹೆತ್ತು ಅದರಲ್ಲಿ ಎರಡು ಮಕ್ಕಳನ್ನು RSS ಗೆ ನೀಡಿ ಎಂದು ಪ್ರಚೋದಿಸಿದ್ದಳು.
