ಟ್ಯಾಂಕರ್ ಅಪಘಾತದಲ್ಲಿ ಐವರ ಸಾವು: ಮೃತ ಚಾಲಕನ ವಿರುದ್ಧ ಪ್ರಕರಣ

ಥಾಣೆ: ಹಾಲಿನ ಟ್ಯಾಂಕರ್ ಕಮರಿಗೆ ಬಿದ್ದು ಐವರು ಮೃತಪಟ್ಟಿರುವ ಘಟನೆ ಮಹಾರಾಷ್ಟ್ರದ ಕಾಸರ ಘಾಟ್ ವಿಭಾಗದಲ್ಲಿ ನಡೆದಿದೆ.

ಘಟನೆ ಸಂಬಂಧ ಮೃತ ಚಾಲಕನ ವಿರುದ್ಧ ಪ್ರಕರಣ ದಾಖಲಿಸಲಾಗಿದೆ ಎಂದು ಥಾಣೆ ಗ್ರಾಮಾಂತರ ಪೊಲೀಸ್ ಅಧಿಕಾರಿಯೊಬ್ಬರು ಸೋಮವಾರ ತಿಳಿಸಿದ್ದಾರೆ.

ವೇಗವಾಗಿ ಬಂದ ಟ್ಯಾಂಕರ್ ಕಬ್ಬಿಣದ ತಡೆಗೋಡೆಗೆ ಡಿಕ್ಕಿ ಹೊಡೆದು ಬಳಿಕ 200 ಅಡಿ ಆಳದ ಕಮರಿಗೆ ಬಿದ್ದಿದೆ. ಘಟನೆಯಲ್ಲಿ ಐವರು ಸಾವಿಗೀಡಾಗಿದ್ದಾರೆ ಎಂದು ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

ಟ್ಯಾಂಕರ್ ಚಾಲಕನ ವಿರುದ್ಧ ಭಾರತೀಯ ನ್ಯಾಯ ಸಂಹಿತೆ ಮತ್ತು ಮೋಟಾರು ವಾಹನ ಕಾಯ್ದೆಯಡಿ ಎಫ್ಐಆರ್ ದಾಖಲಿಸಲಾಗಿದೆ ಎಂದು ಶಹಾಪುರ ಎಸ್ಡಿಪಿಒ ಮಿಲಿಂದ ಶಿಂಧೆ ತಿಳಿಸಿದ್ದಾರೆ.

ಇವರೆಲ್ಲರೂ (ಮೃತರು ಹಾಗೂ ಗಾಯಗೊಂಡ ನಾಲ್ವರು) ಮುಂಬೈ ತಲುಪಲು ಟ್ಯಾಂಕರ್ ನಲ್ಲಿ ಲಿಫ್ಟ್ ಪಡೆದಿದ್ದರು. 5 ವರ್ಷದ ಬಾಲಕ ಸೇರಿದಂತೆ ನಾಲ್ವರು ಗಾಯಾಳುಗಳನ್ನು ಗೋಟಿಯ ಆಸ್ಪತ್ರೆಗೆ ದಾಖಲಿಸಲಾಗಿದೆ ಎಂದು ಅವರು ಮಾಹಿತಿ ನೀಡಿದ್ದಾರೆ.