ಆಫ್ರಿಕನ್‌ ರಾಷ್ಟ್ರ ಮೊರಕ್ಕೊ, ಇದೇ ಮೊದಲ ಬಾರಿಗೆ ಫಿಫಾ ವಿಶ್ವಕಪ್‌ ಟೂರ್ನಿಯ ಕ್ವಾರ್ಟರ್‌ ಫೈನಲ್‌ ಪ್ರವೇಶಿಸಿ ಇತಿಹಾಸ ನಿರ್ಮಿಸಿದೆ.
ಎಜುಕೇಶನ್‌ ಸಿಟಿ ಸ್ಟೇಡಿಯಂನಲ್ಲಿ ನಡೆದ ಜಿದ್ದಾಜಿದ್ದಿನ ಪಂದ್ಯದಲ್ಲಿ ಮೊರಕ್ಕೊ, ಪೆನಾಲ್ಟಿ ಶೂಟೌಟ್‌ನಲ್ಲಿ ಬಲಿಷ್ಠ ಸ್ಪೇನ್‌ ತಂಡವನ್ನು ಮಣಿಸಿತು.
ಪಂದ್ಯದ ಪೂರ್ಣಾವಧಿಯಲ್ಲಿ ಉಭಯ ತಂಡಗಳು ಗೋಲು ಗಳಿಸಲು ವಿಫಲರಾದ ಕಾರಣ, ಹೆಚ್ಚುವರಿ ಅವಧಿಗೆ ಪಂದ್ಯ ಮುಂದೂಡಲ್ಪಟ್ಟಿತ್ತು. ಆದರೆ ಈ ವೇಳೆಯೂ ಉಭಯ ತಂಡಗಳ ಆಟಗಾರರು ಗೋಲು ಬಲೆಯ ಗುರಿಯನ್ನು ತಲುಪಲು ವಿಫಲರಾದರು.
ಬಳಿಕ ನೀಡಲಾದ ನಿರ್ಣಾಯಕ ಪೆನಾಲ್ಟಿ ಶೂಟೌಟ್‌ನಲ್ಲಿ ಮೊರಕ್ಕೊ ಗೋಲ್‌ ಕೀಪರ್‌ ಯಾಸಿನ್ ಬೌನೌ, ಸ್ಪೇನ್‌ನ ತಾರಾ ಆಟಗಾರರಿಗೆ ತಡೆಗೋಡೆಯಾದರು. ಸ್ಪೇನ್‌ನ ಮೂರೂ ಪ್ರಯತ್ನಗಳನ್ನು ತಡೆಯುವಲ್ಲಿ ಬೌನೌ ಯಶಸ್ವಿಯಾದರು. ಆ ಮೂಲಕ 92 ವರ್ಷಗಳ ಇತಿಹಾಸದಲ್ಲಿ ಇದೇ ಮೊದಲ ಬಾರಿಗೆ ಮೊರಾಕ್ಕೊ, ಫಿಫಾ ವಿಶ್ವಕಪ್‌ ಟೂರ್ನಿಯ ಅಂತಿಮ 8ರ ಘಟ್ಟಕ್ಕೆ ಲಗ್ಗೆ ಇಟ್ಟಿದೆ.
ಕಳೆದ ಬಾರಿಯ ವಿಶ್ವಕಪ್‌ ಟೂರ್ನಿಯಲ್ಲೂ ಸ್ಪೇನ್‌ ಅಂತಿಮ 16ರ ಘಟ್ಟದಲ್ಲಿ ಆತಿಥೇಯ ರಷ್ಯಾ ತಂಡಕ್ಕೆ ಪೆನಾಲ್ಟಿ ಶೂಟೌಟ್‌ನಲ್ಲಿ ಶರಣಾಗಿತ್ತು. ಈ ಬಾರಿಯೂ ಸ್ಪೇನ್‌ ಪಯಣ 16 ಘಟ್ಟದಲ್ಲಿ ಪೆನಾಲ್ಟಿ ಶೂಟೌಟ್‌ನಲ್ಲೇ ಅಂತ್ಯಕಂಡಿದೆ.
ಮೊದಲ ಬಾರಿಗೆ ಕ್ವಾರ್ಟರ್‌ ಫೈನಲ್‌ ಪ್ರವೇಶಿಸಿದ ಖುಷಿಯಲ್ಲಿ ಮೊರಾಕ್ಕೊ, ಮೈದಾನದಲ್ಲೇ ಸಾಷ್ಟಾಂಗ ಎರಗಿ, ಸಂಭ್ರಮಿಸಿದರು.
