ಜಾರ್ಖಂಡ್: ಇಬ್ಬರು ಮುಸ್ಲಿಮ್ ಯುವಕರನ್ನು ಬಂಧಿಸಿ ಚಿತ್ರಹಿಂಸೆಗೊಳಪಡಿಸಿದ ಪೊಲೀಸರು, ಅವರಿಬ್ಬರನ್ನೂ ಪರಸ್ಪರ ಲೈಂಗಿಕ ಸಂಪರ್ಕ ನಡೆಸುವಂತೆ ಒತ್ತಾಯಿಸಿ, ಪ್ರವಾದಿಯನ್ನು ನಿಂದಿಸಿರುವ ಆಘಾತಕಾರಿ ಘಟನೆ ಜಾರ್ಖಂಡ್ ನಲ್ಲಿ ನಡೆದಿದೆ.
ಮುಹಮ್ಮದ್ ಅರ್ಝು ಮತ್ತು ಮುಹಮ್ಮದ್ ಔರಂಗಜೇಬ್ ಎಂಬ ಇಬ್ಬರು ಮುಸ್ಲಿಮ್ ಯುವಕರನ್ನು ಅಗಸ್ಟ್ 26 ರಂದು ಜಾರ್ಖಂಡ್ ನ ಜಮ್ಶೇಡ್ ಪುರ ಜಿಲ್ಲೆಯ ಕದ್ಮಾ ಠಾಣೆಯಲ್ಲಿ ಏಳು ಮಂದಿ ಪೊಲೀಸರು ತಮ್ಮ ಮೇಲೆ ದೌರ್ಜನ್ಯವೆಸಗಿದ್ದಾರೆ ಎಂದು ಆರೋಪಿಸಿದ್ದಾರೆ.
ಪೊಲೀಸರು ಮುಸ್ಲಿಮ್ ವಿರೋಧಿ ಹೇಳಿಕೆಯನ್ನು ನೀಡಿ ಪ್ರವಾದಿ ಮುಹಮ್ಮದ್ ವಿರುದ್ಧ ಅವಹೇಳನಕಾರಿಯಾಗಿ ಮಾತನಾಡಿದ್ದಾರೆ ಎಂದು ಅವರು ದೂರಿದ್ದಾರೆ.
ಘಟನೆಗೆ ಸಂಬಂಧಿಸಿದಂತೆ ಈಸ್ಟ್ ಸಿಂಗ್ಭೂಮ್ ಪೊಲೀಸ್ ವರಿಷ್ಠಾಧಿಕಾರಿ ಎಮ್ ತಮಿಳ್ ವಾನನ್ ಎಂಬವರಿಗೆ ದೂರು ಸಲ್ಲಿಸಿದ್ದಾರೆ. ಆದರೆ ಪೊಲೀಸರು ಇದುವರೆಗೆ ಎಫ್ಐಆರ್ ದಾಖಲಿಸಿಲ್ಲ. ಆದ್ದರಿಂದ ಈ ಸಂಬಂಧ ಜಿಲ್ಲಾ ನ್ಯಾಯಾಲಯದಲ್ಲಿ ಪ್ರಕರಣ ದಾಖಲಿಸಲಾಗಿದೆ ಎಂದು ಜಾರ್ಖಂಡ್ ಏಕತಾ ಮೋರ್ಚಾದ ಕಾರ್ಯಕರ್ತ ಅಫ್ತಾಬ್ ಎಂ. ಗೆ ತಿಳಿಸಿದ್ದಾರೆ.
ಯುವ ಜೋಡಿಯೊಂದು ಪರಾರಿಯಾಗಿತ್ತು. ಪರಾರಿಯಾದ ಯುವಕನ ವಿರುದ್ಧ ಅಪಹರಣ ಪ್ರಕರಣ ದಾಖಲಿಸಲಾಗಿತ್ತು. ಪರಾರಿಯಾದ ಯುವಕ ಔರಂಗಜೇಬ್ ನ ಗೆಳೆಯ ಎನ್ನಲಾಗಿದೆ. ಈ ಹಿನ್ನೆಲೆಯಲ್ಲಿ ಈ ಇಬ್ಬರನ್ನು ಪೊಲೀಸರು ವಿಚಾರಣೆಗಾಗಿ ಠಾಣೆಗೆ ಕರೆಯಿಸಿದ್ದರು.
MGM ಆಸ್ಪತ್ರೆಯಲ್ಲಿ ಅವರ ವೈದ್ಯಕೀಯ ವರದಿಯಲ್ಲಿ ಹಲ್ಲೆ ನಡೆಸಲಾಗಿದೆ ಎಂದು ಹೇಳಿದೆ. ಅವರಿಗೆ ಔಷಧಿಗಳನ್ನು ಸೂಚಿಸಲಾಯಿತು. ಮೆದುಳಿನ CT ಸ್ಕ್ಯಾನ್ ಮಾಡುವಂತೆ ಔರಂಗಜೇಬ್ಗೆ ಶಿಫಾರಸು ಮಾಡಲಾಗಿದೆ.
