ಚಿಕ್ಕಮಗಳೂರು: ಕಾಂಗ್ರೆಸ್ ಜಿಲ್ಲಾ ಘಟಕದ ವತಿಯಿಂದ ಸ್ವಾತಂತ್ರ್ಯದ ಅಮೃತ ಮಹೋತ್ಸವ ಪ್ರಯುಕ್ತ ‘ದೇಶದ ಉಳಿವಿಗಾಗಿ ಸ್ವಾತಂತ್ರ್ಯದ ನಡಿಗೆ’ ಎಂಬ ಪ್ರಮೇಯದಲ್ಲಿ ಹಿರೇಗೌಜದಿಂದ ಚಿಕ್ಕಮಗಳೂರುವರೆಗೆ ಪಾದಯಾತ್ರೆ ನಡೆಯಿತು.
ಆಜಾದ್‌ ಪಾರ್ಕ್‌ ವೃತ್ತದಲ್ಲಿ ಏರ್ಪಡಿಸಿದ್ದ ಸಮಾರೋಪ ಕಾರ್ಯಕ್ರಮದಲ್ಲಿ ಕಾರ್ಯಕರ್ತರನ್ನುದ್ದೇಶಿಸಿ ಮಾತನಾಡಿದ ಎಐಸಿಸಿ ಕಾರ್ಯದರ್ಶಿ ಬಿ.ಎಂ.ಸಂದೀಪ್‌, ದೇಶದ ಸ್ವಾತಂತ್ರ್ಯ ಹೋರಾಟದಲ್ಲಿ ಕಾಂಗ್ರೆಸ್ ನಾಯಕರ ಅಪಾರ ಕೊಡುಗೆ ಇದೆ. ಡೋಂಗಿ ದೇಶ ಭಕ್ತರು ಇತಿಹಾಸ ತಿರುಚುವ ಕೆಲಸದಲ್ಲಿ ತೊಡಗಿದ್ದಾರೆ’ ಎಂದು ಆರೋಪಿಸಿದರು.
ನೆಹರೂ, ಟಿಪ್ಪು ಮೊದಲಾದ ನಾಯಕರನ್ನು ಮೂದಲಿಸಿರುವ ‘ಶಾಸಕ ಸಿ.ಟಿ.ರವಿಗೆ ಇತಿಹಾಸದ ಬಗ್ಗೆಅರಿವಿಲ್ಲ. ಅಂಡಮಾನ್‌ ಜೈಲಿನಿಂದ ಸಾವರ್ಕರ್‌ ಹೇಗೆ ಹೊರಬಂದರು ಎಂಬುದನ್ನು ಸಿ.ಟಿ. ರವಿ ಜನರಿಗೆ ತಿಳಿಸಲಿ. ಸಾವರ್ಕರ್‌ ಬ್ರಿಟಿಷರ ಜೊತೆ ಒಳಒಪ್ಪಂದ ಮಾಡಿಕೊಂಡು ಬಿಟ್ರಿಷರ ಜತೆಗೆ ಇದ್ದು ತನ್ನನ್ನು ತಾನೇ ವೀರ ಸಾವರ್ಕರ್‌ ಎಂದು ಹೇಳಿಕೊಂಡ ವ್ಯಕ್ತಿ ಎಂದು ಟೀಕಿಸಿದರು.
ಕಾಂಗ್ರೆಸ್ ಜಿಲ್ಲಾ ಘಟಕದ ಅಧ್ಯಕ್ಷ ಡಾ.ಕೆ.ಪಿ. ಅಂಶುಮಂತ್‌, ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಗಾಯತ್ರಿ ಶಾಂತೇಗೌಡ ಹಾಗೂ ಇನ್ನಿತರ ಕಾಂಗ್ರೆಸ್ ನಾಯಕರು ಭಾಗವಹಿಸಿದ್ದರು.
