ಗುವಾಹಟಿ: ಮೇಘಾಲಯದಲ್ಲಿ ಭಾರೀ ಮಳೆ, ಪ್ರವಾಹಕ್ಕೆ ಬುಗಿ ನದಿಯ ಮೇಲಿನ ಸೇತುವೆವೊಂದು ಕೊಚ್ಚಿ ಹೋಗಿದೆ ಎಂದು ತಿಳಿದು ಬಂದಿದೆ. ಬುಗಿ ನದಿಯ ಮೇಲಿನ ಸೇತುವೆ ರೂಗಾವನ್ನು ಜೆಜಿಕಾ ಗ್ರಾಮಕ್ಕೆ ಸಂಪರ್ಕಿಸಿತ್ತು. ಬುಗಿ ಗರೋ ಹಿಲ್ಸ್’ನಲ್ಲಿ ಮೂರನೇ ಅತಿ ದೊಡ್ಡ ನದಿ ಎಂದು ಹೇಳಲಾಗುತ್ತಿದೆ.

ಪ್ರಸಕ್ತ ಸಾಲಿನಲ್ಲಿ ಮೇಘಾಲಯದಲ್ಲಿ ತೀವ್ರ ಮಳೆ, ಪ್ರವಾಹ ಮತ್ತು ಭೂಕುಸಿತ ನಡೆದಿದ್ದು, ನೂರಾರು ಮಂದಿ ಸಾವನ್ನಪ್ಪಿದ್ದಾರೆ ಮತ್ತು ಹಲವರನ್ನು ಸ್ಥಳಾಂತರಿಸಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಈ ಮಧ್ಯೆ ಗುರುವಾರ ಮುಂಜಾನೆ ಗಾರೋ ಹಿಲ್ಸ್ ನಲ್ಲಿ ಎರಡು ಕಡೆ ನಡೆದ ಭೂಕುಸಿತದಲ್ಲಿ ಒಂದೇ ಕುಟುಂಬದ ಮೂವರು ಮತ್ತು 2 ವರ್ಷದ ಮಗುವೊಂದು ಜೀವಂತ ಸಮಾಧಿಯಾಗಿದ್ದಾರೆ.

ಜೂನ್ 10 ರಿಂದ 11 ರವರೆಗೆ ಅರುಣಾಚಲ ಪ್ರದೇಶ, ಅಸ್ಸಾಮ್ ಮತ್ತು ಮೇಘಾಲಯದಲ್ಲಿ ಅತೀ ಹೆಚ್ಚು ( 204.5 ಮಿಮೀ ಗಿಂತಲೂ ಅಧಿಕ) ಮಳೆಯಾಗುವ ಸಾಧ್ಯತೆಯಿದೆ ಎಂದು ಭಾರತೀಯ ಹವಾಮಾನ ಇಲಾಖೆ ಎಚ್ಚರಿಸಿದೆ.