ಮುಝಫ್ಫರ್‌ನಗರ: ನಾಮಫಲಕ ಪ್ರದರ್ಶನ ವಿವಾದದ ಸ್ವರೂಪಕ್ಕೆ ಪಡೆದ ಹಿನ್ನೆಲೆಯಲ್ಲಿ ಕನ್ವರಿಯಾ ಯಾತ್ರಿಗಳಿಗೆ ಏರ್ಪಡಿಸುತ್ತಿದ್ದ ಪರಿಹಾರ ಶಿಬಿರಗಳ ನಿರ್ಮಾಣದಿಂದ ಹಲವಾರು ಮುಸ್ಲಿಂ ಸಂಸ್ಥೆಗಳು ಹಿಂದೆ ಸರಿದಿವೆ ಎಂದು ವರದಿಯಾಗಿದೆ.
ಕನ್ವರ್ ಯಾತ್ರೆಯ ಮಾರ್ಗದಲ್ಲಿನ ಮಳಿಗೆಗಳ ಮಾಲಕರು ತಮ್ಮ ನಾಮಫಲಕಗಳನ್ನು ಪ್ರದರ್ಶಿಸಬೇಕು ಎಂದು ಉತ್ತರ ಪ್ರದೇಶ ಹಾಗೂ ಉತ್ತರಾಖಂಡ ಆದೇಶವು ವಿವಾದದ ಸ್ವರೂಪ ಪಡೆದುಕೊಂಡಿದೆ.
ಅತ್ಯಂತ ಬೃಹತ್ ಪರಿಹಾರ ಶಿಬಿರವಾಗಿದ್ದ ಪೈಘಮ್-ಇ-ಇನ್ಸಾಯಿತ್ ಸಂಘಟನೆಯ ಅಧ್ಯಕ್ಷ ಆಸಿಫ್ ರಹಿ ಈ ಬಗ್ಗೆ ಪ್ರತಿಕ್ರಿಯಿಸಿದ್ದು, ಪರಿಹಾರ ಶಿಬಿರಗಳನ್ನು ಭಾರವಾದ ಹೃದಯದಿಂದ ರದ್ದುಗೊಳಿಸುತ್ತಿರುವುದಾಗಿ ತಿಳಿಸಿದ್ದಾರೆ. ನಾವೇನು ಮಾಡಲು ಸಾಧ್ಯ? ನಮಗೆ ಕೋಮು ಸೌಹಾರ್ದತೆ ಬೇಕಿದೆ. ಆದರೆ, ಅವರಿಗೆ (ಸ್ಥಳೀಯ ಸಂಸ್ಥೆಗಳು) ರಾಜಕಾರಣ ಮಾಡುವುದು ಮಾತ್ರ ಬೇಕಿದೆ” ಎಂದು ಬೇಸರ ವ್ಯಕ್ತಪಡಿಸಿದ್ದಾರೆ.
ಕನ್ವರಿಯಾಗಳಿಗಾಗಿ ಸೇವೆಗಳನ್ನು ನಿರ್ವಹಿಸುತ್ತಾ ಬರುತ್ತಿರುವ ಸೆಕ್ಯುಲರ್ ಫ್ರಂಟ್ ಎಂಬ ಸಂಸ್ಥೆಯ ಸಂಸ್ಥಾಪಕ ಗೋಹರ್ ಸಿದ್ದಿಕಿ, ಕೇವಲ ಮುಸ್ಲಿಮರು ಮಾತ್ರವಲ್ಲ, ಹಿಂದೂಗಳೂ ಸೆಕ್ಯುಲರ್ ಫ್ರಂಟ್ ಸದಸ್ಯರಾಗಿದ್ದಾರೆ. ಕಳೆದ 16 ವರ್ಷಗಳಿಂದ ಕನ್ವರಿಯಾಗಳಿಗೆ ಪುಷ್ಪನಮನ ಹಾಗೂ ಹಣ್ಣುಗಳನ್ನು ನೀಡಿ ನಾವು ಸ್ವಾಗತಿಸುತ್ತಾ ಬರುತ್ತಿದ್ದೇವೆ. ಆದರೆ, ಈ ವರ್ಷ ಸಾಕಷ್ಟು ಅನಗತ್ಯ ವಿವಾದ ಸೃಷ್ಟಿಸಲಾಗಿದೆ. ಕನ್ವರಿಯಾಗಳಿಗೆ ಸೇವೆ ಸಲ್ಲಿಸಲು ಈ ಬಾರಿ ಜಿಲ್ಲಾಡಳಿತದ ಅನುಮತಿ ಪಡೆಯಬೇಕಿದೆ. ಇದು ನಿಜಕ್ಕೂ ವಿಚಿತ್ರವಾಗಿದೆ ಎಂದು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
