ತಿರುಪತಿ: ತಿರುಪತಿ ತಿಮ್ಮಪ್ಪನ ದರ್ಶನಕ್ಕೆ ಬಂದಿದ್ದ ಉತ್ತರ ಭಾರತದ ವ್ಯಕ್ತಿಯೊಬ್ಬರು ಸಿಂಹಕ್ಕೆ ಬಲಿಯಾಗಿದ್ದಾರೆ. ಎಲ್ಲರೂ ನೋಡನೋಡುತ್ತಿದ್ದಂತೆ ಸಿಂಹ ಆತನನ್ನು ಕೊಂದು ಹಾಕಿದೆ. ತಿರುಪತಿಯಲ್ಲಿರುವ ಝೂ ಪಾರ್ಕ್‌ನಲ್ಲಿ ಈ ಘಟನೆ ನಡೆದಿದೆ. ರಾಜಸ್ಥಾನದ ಪ್ರಹ್ಲಾದ್‌ ಗುರ್ಜರ್‌ ಸಿಂಹಕ್ಕೆ ಜೀವತೆತ್ತ ವ್ಯಕ್ತಿ.
ತಿರುಪತಿಯಲ್ಲಿರುವ ಏಷ್ಯಾದ ಅತಿದೊಡ್ಡ ಮೃಗಾಲಯಕ್ಕೆ ಭೇಟಿ ನೀಡಿದ್ದ ಪ್ರಹ್ಲಾದ್‌ ಸಿಂಹ ಇರುವ ಪ್ರದೇಶದ ಬೇಲಿ ಹಾರಿ ಒಳಹೋಗಿದ್ದಾರೆ. ಈ ವೇಳೆ ಸಿಂಹ ದಾಳಿ ಮಾಡಿ ಆತನನ್ನು ಕೊಂದುಹಾಕಿದೆ. ಝೂ ಸಿಬ್ಬಂದಿ, ಪ್ರಹ್ಲಾದ್‌ರನ್ನು ಉಳಿಸಲು ಯತ್ನಿಸಿದರಾದರೂ ಅಷ್ಟರಲ್ಲಿ ಸಿಂಹ, ಆತನನ್ನು ಕೊಂದು ಮುಗಿಸಿದೆ. ಪ್ರಹ್ಲಾದ್‌ ಅವರ ಮುಖದ ಕೆಲ ಭಾಗನ ಕಚ್ಚಿ ತಿಂದಿದೆ ಎಂದು ತಿಳಿದುಬಂದಿದೆ.
ತಿರುಪತಿಗೆ ಬರುವ ಭಕ್ತರು ಈ ಝೂ ಪಾರ್ಕ್‌ಗೆ ಭೇಟಿ ನೀಡುತ್ತಾರೆ. ವಿಶಾಲವಾದ ಈ ಝೂ ಪಾರ್ಕ್‌ನಲ್ಲಿ ಅನೇಕ ಕಾಡುಮೃಗಗಳಿವೆ… ಹಾಗೆಯೇ ರಾಜಸ್ಥಾನದಿಂದ ಬಂದಿದ್ದ ಪ್ರಹ್ಲಾದ್‌ ಕೂಡಾ ಝೂಪಾರ್ಕ್‌ಗೆ ಭೇಟಿ ನೀಡಿದ್ದಾರೆ. ಈ ವೇಳೆ ಅವರು ಸಿಂಹವಿರುವ ಸ್ಥಳಕ್ಕೆ ನುಗ್ಗಿದ್ದಾರೆ. ಅವರೇ ಅಲ್ಲಿಗೆ ಹಾರಿಹೋಗಿದ್ದರಿಂದ ಸಿಂಹ ಅವರನ್ನು ಸಾಯಿಸಿದೆ.
ಡಿಎಸ್‌ಪಿ ಶರತ್‌ ರಾಜ್‌ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ. ಸತ್ತಿರುವ ವ್ಯಕ್ತಿಯ ತಪ್ಪಿನಿಂದಲೇ ಹೀಗೆ ಆಗಿದೆಯೇ ಅಥವಾ ಝೂ ಸಿಬ್ಬಂದಿಯ ಅಚಾತುರ್ಯದಿಂದ ಹೀಗೆ ಆಗಿದೆಯೇ ಎಂಬುದರ ಬಗ್ಗೆ ತನಿಖೆ ನಡೆಯುತ್ತಿದೆ. ಇಲ್ಲವೇ ಆ ವ್ಯಕ್ತಿ ಆತ್ಮಹತ್ಯೆ ಮಾಡಿಕೊಳ್ಳಲೆಂದೇ ಇಲ್ಲಿಗೆ ಬಂದಿದ್ದರೇ ಎಂಬುದರ ಕುರಿತೂ ತನಿಖೆ ನಡೆಯುತ್ತಿದೆ.
