ಹಾಸನ: ನಿನ್ನೆಯಷ್ಟೇ ಶಾಲೆಗೆ ಮಗುವನ್ನು ಬಿಡಲು ಹೋಗುತ್ತಿದ್ದ ಬೈಕ್ ಗೆ ಲಾರಿಯೊಂದು ಹಿಂದಿನಿಂದ ಡಿಕ್ಕಿ ಹೊಡೆದು ತಾಯಿ-ಮಗು ಇಬ್ಬರೂ ಮೃತಪಟ್ಟ ಘಟನೆ ಇನ್ನೂ ಜನರ ಮನಸಿನಲ್ಲಿ ಹಸಿರಾಗಿರುವಾಗಲೇ ಶಾಲೆಗ ಕರೆದೊಯ್ಯುತ್ತಿದ್ದ ಶಾಲಾ ಬಸ್ ರಸ್ತೆ ಬದಿಗೆ ಉರುಳಿಬಿದ್ದ ಘಟನೆ ಹಾಸನ ಸಮೀಪದ ಉಗನೆ ಬಳಿ ನಡೆದಿದೆ.
- Advertisement -
ಎದುರಿನಿಂದ ಬರುತ್ತಿದ್ದ ವಾಹನಕ್ಕೆ ದಾರಿ ನೀಡಲು ರಸ್ತೆಯ ಬದಿ ಮಣ್ಣಿನ ರಸ್ತೆಗೆ ಶಾಲಾ ಬಸ್ ಇಳಿದಾಗ ಮಣ್ಣು ಕುಸಿದು ಈ ಘಟನೆ ಸಂಭವಿಸಿದೆ. ಬಸ್ ನಲ್ಲಿ 25 ಮಕ್ಕಳಿದ್ದು, ದೇವಗೌಡನಹಳ್ಳಿಯ ಶ್ರೀ ಬಸವೇಶ್ವರ ಗ್ರಾಮಾಂತರ ಪ್ರೌಢ ಶಾಲೆಗೆ ಮಕ್ಕಳನ್ನು ಕರೆದೊಯ್ಯುವಾಗ ಬಸ್ ಉರುಳಿಬಿದ್ದು ಅವಘಡ ಸಂಭವಿಸಿದೆ.ಅದೃಷ್ಟವಶಾತ್‍ ಯಾರಿಗೂ ಏನೂ ಆಗಿಲ್ಲ.
ರಸ್ತೆಯನ್ನು ಹೊಸದಾಗಿ ನಿರ್ಮಿಸುತ್ತಿದ್ದು, ರಸ್ತೆಯ ಎರಡೂ ಬದಿಗೆ ಮಣ್ಣು ಹಾಕಿ ಸಮತಟ್ಟುಗೊಳಿಸಬೇಕಿತ್ತು. ಆದರೆ ಕಳಪೆ ಕಾಮಗಾರಿಯಿಂದಾಗಿ ಬಸ್ ನ ಭಾರಕ್ಕೆ ಮಣ್ಣು ಕುಸಿದಿದೆ. ಕೊಂಚ ಎಡವಟ್ಟಾಗಿದ್ದರೂ ಸಮೀಪದ ಕೆರೆಗೆ ಬಸ್ ಉರುಳಿಬಿದ್ದು, ಭಾರಿ ಅನಾಹುತವಾಗುತ್ತಿತ್ತು.
