ಮುಂಬೈ: ಮಹಾರಾಷ್ಟ್ರದಲ್ಲಿ ಹನುಮಾನ್ ಚಾಲೀಸಾ ಕುರಿತು ನಡೆಯುತ್ತಿರುವ ಗಲಾಟೆಯ ನಡುವೆಯೇ ಹನುಮಾನ್ ಜನ್ಮಸ್ಥಳ ವಿವಾದ ತೀವ್ರಗೊಳ್ಳುತ್ತಿದೆ. ಮಹಂತ ಗೋವಿಂದಾನಂದ ರಥಯಾತ್ರೆ ನಿಲ್ಲಿಸುವಂತೆ ಕೋರಿ ಆಂಜನೇರಿ ಗ್ರಾಮದ ಜನತೆ ಪೊಲೀಸರಲ್ಲಿ ಮನವಿ ಪತ್ರ ಸಲ್ಲಿಸಿದ್ದಾರೆ.
ಕರ್ನಾಟಕದ ಕಿಷ್ಕಿಂಧೆಯ ಮಹಂತ್ ಗೋವಿಂದಾನಂದ ಅವರು ಹನುಮಂತ ನಾಸಿಕ್ ನ ಆಂಜನೇರಿಯಲ್ಲಿ ಇಲ್ಲ, ಆತ ಕರ್ನಾಟಕದ ಕಿಷ್ಕಿಂದೆಯಲ್ಲಿ ಜನಿಸಿದನು ಎಂದು ಪ್ರತಿಪಾದಿಸುತ್ತಿದ್ದು, ಈ ಬಗ್ಗೆ ತಮ್ಮ ಬಳಿ ಸಾಕಷ್ಟು ಸಾಕ್ಷ್ಯಾಧಾರಗಳೂ ಇವೆ ಎಂದು ಹೇಳಿದ್ದಾರೆ. ಅಲ್ಲದೆ ಅವರು ಇಂದು ನಾಸಿಕ್ ನ ಬಿಟ್ಕೊ ಚೌಕ್ ನಿಂದ ಮಹರ್ಷಿ ಪಂಚಾಯತ್ ಸಿದ್ಧಪೀಠದವರೆಗೆ ರಥಯಾತ್ರೆಯನ್ನು ಆಯೋಜಿಸಿದ್ದಾರೆ.
ಮತ್ತೊಂದೆಡೆ, ಮಹಂತ್ ರ ಹೇಳಿಕೆಯಿಂದ ಆಕ್ರೋಶಗೊಂಡ ಆಂಜನೇರಿ ಗ್ರಾಮದ ಜನರು, ಪೊಲೀಸ್ ಠಾಣೆಗೆ ಆಗಮಿಸಿ ಅವರ ವಿರುದ್ಧ ದೂರು ನೀಡಿದ್ದು, ಇದನ್ನು ನಿಷೇಧಿಸಿ ಇಂದಿನ ರಥಯಾತ್ರೆಯನ್ನು ನಿಲ್ಲಿಸುವಂತೆ ಆಗ್ರಹಿಸಿದ್ದಾರೆ. ಹನುಮನ ಜನ್ಮಸ್ಥಳ ಅಂಜನೇರಿ ಗುಹೆಯ ಹಿಂಭಾಗದಲ್ಲಿರುವ ಕಿಷ್ಕಿಂಧಾ ಬೆಟ್ಟದಲ್ಲಿದೆ ಎಂದು ಗ್ರಾಮದ ಜನರು ಹೇಳಿದ್ದಾರೆ.
ಬುಧವಾರ ನಾಸಿಕ್ ನಲ್ಲಿ ಕಿಷ್ಕಿಂಧೆಯ ಮಹಂತ್ ರಿಂದ ಚರ್ಚೆಯನ್ನು ಆಯೋಜಿಸಲಾಗಿದ್ದು, ಇದರಲ್ಲಿ ಋಷಿಗಳು, ಮಹಂತರು, ಇತಿಹಾಸಕಾರರು ಭಾಗವಹಿಸಿದ್ದಾರೆ. ಹನುಮನ ಜನ್ಮಸ್ಥಳದ ಬಗ್ಗೆಯೂ ಚರ್ಚೆ ನಡೆಯಲಿದ್ದು, ಸಂಜೆಯೊಳಗೆ ಈ ಬಗ್ಗೆ ನಿರ್ಧಾರ ಕೈಗೊಳ್ಳುವ ನಿರೀಕ್ಷೆಯಿದೆ.
