ವಾಷಿಂಗ್ಟನ್ : ವಿಜ್ಞಾನಿಗಳು ಅಪೊಲೊ ಕಾರ್ಯಾಚರಣೆಗಳಲ್ಲಿ ಗಗನಯಾತ್ರಿಗಳು ಭೂಮಿಗೆ ಮರಳಿ ತಂದ ಚಂದ್ರನ ಮಣ್ಣಿನಲ್ಲಿ ಮೊದಲ ಬಾರಿಗೆ ಸಸ್ಯಗಳನ್ನು ಬೆಳೆಸಿದ್ದಾರೆ. ಇದು ಚಂದ್ರನ ಮೇಲೆ ಅಥವಾ ಭವಿಷ್ಯದಲ್ಲಿ ಬಾಹ್ಯಾಕಾಶ ಕಾರ್ಯಾಚರಣೆಗಳ ಸಮಯದಲ್ಲಿ ಆಹಾರ ಮತ್ತು ಆಮ್ಲಜನಕವನ್ನು ಉತ್ಪಾದಿಸುವತ್ತ ಒಂದು ಮಹತ್ತರ ಹೆಜ್ಜೆಯಾಗಿದೆ.
ಯುಎಸ್ ನ ಫ್ಲೋರಿಡಾ ವಿಶ್ವವಿದ್ಯಾಲಯದ (ಯುಎಫ್) ಸಂಶೋಧಕರು ಚಂದ್ರನ ಮಣ್ಣಿನಲ್ಲಿ ಸಸ್ಯಗಳು ಯಶಸ್ವಿಯಾಗಿ ಮೊಳಕೆಯೊಡೆಯುತ್ತವೆ ಮತ್ತು ಬೆಳೆಯುತ್ತವೆ ಎಂದು ತೋರಿಸಿಕೊಟ್ಟಿದ್ದಾರೆ. ಕಮ್ಯುನಿಕೇಷನ್ಸ್ ಬಯಾಲಜಿ ಜರ್ನಲ್ ನಲ್ಲಿ ಪ್ರಕಟವಾದ ಅವರ ಅಧ್ಯಯನವು ಚಂದ್ರನ ಮಣ್ಣಿಗೆ ಸಸ್ಯಗಳು ಜೈವಿಕವಾಗಿ ಹೇಗೆ ಪ್ರತಿಕ್ರಿಯಿಸುತ್ತವೆ ಎಂಬುದನ್ನು ಸಹ ತಿಳಿಸಿದೆ.
ಮೊದಲ ಬಾರಿಗೆ ಸಂಶೋಧಕರು ಅರಬಿಡೋಪ್ಸಿಸ್ ಥಾಲಿಯಾನ ಬೀಜವನ್ನು ಲೂನರ್ ರೆಗೊಲಿತ್ ನಲ್ಲಿ ಬೆಳೆಸಿದ್ದಾರೆ ಎಂದು ನಾಸಾ ಹೇಳಿದೆ. ಅರಬಿಡೋಪ್ಸಿಸ್ ಥಾಲಿಯಾನಾ, ಯುರೇಷಿಯಾ ಮತ್ತು ಆಫ್ರಿಕಾದ ತಳಿಯಾಗಿದೆ. ಇದು ಸಾಸಿವೆ, ಬ್ರೊಕೊಲಿ, ಹೂಕೋಸು ಮತ್ತು ಬ್ರಸೆಲ್ಸ್ ಮೊಗ್ಗುಗಳಂತಹ ಇತರ ಕ್ರೂಸಿಫೆರಸ್ ತರಕಾರಿಗಳ ಸಂಬಂಧಿಯಾಗಿದೆ.
