ಹಾಸನ । ಅಝಾನ್’ಗೆ ವಿರುದ್ಧವಾಗಿ ಹನುಮಾನ್ ಚಾಲಿಸ ಪಠಿಸಿದ ಕಾಳಿಸ್ವಾಮಿ

ಹಾಸನ: ಹಲಾಲ್ – ಜಟ್ಕಾ ಕಟ್ ವಿವಾದದ ಬೆನ್ನಲ್ಲೇ ಸಂಘಪರಿವಾರದ ಪರ ಕಾಳಿಸ್ವಾಮಿ ಅಝಾನ್’ಗೆ ವಿರುದ್ಧವಾಗಿ ಬೆಳಗ್ಗಿನ ಜಾವ ಧ್ವನಿವರ್ಧಕದ ಮೂಲಕ ಹನುಮಾನ್ ಚಾಲಿಸ ಪಠಿಸಿ ಮತ್ತೊಮ್ಮೆ ವಿವಾದಕ್ಕೀಡಾಗಿದ್ದಾರೆ.

ಇತ್ತೀಚಿನ ದಿನಗಳಲ್ಲಿ ಕರ್ನಾಟಕದಲ್ಲಿ ಸಂಘಪರಿವಾರ ಸಾಲುಸಾಲಾಗಿ ವಿವಾದವನ್ನು ಸೃಷ್ಟಿಸುತ್ತಿದ್ದು, ಹಲಾಲ್ – ಜಟ್ಕಾ ವಿವಾದದ ಬಳಿಕ ಮಸೀದಿಯಲ್ಲಿ ಧ್ವನಿವರ್ಧಕದ ಮೂಲಕ ಅಝಾನ್ ಕೊಡುವುದನ್ನು ನಿರ್ಬಂಧಿಸುವಂತೆ ಒತ್ತಾಯಿಸಿದ್ದವು.

ಇದರ ಮುಂದುವರಿದ ಭಾಗವಾಗಿ ಸದಾ ವಿವಾದದ ಕೇಂದ್ರ ಬಿಂದುವಾಗಿರುವ ಹಾಸನದ ಕಾಳಿಕಾ ಮಠದ ಋಷಿಕುಮಾರ ಸ್ವಾಮಿ, ಮುಂಜಾನೆ 5.30 ಕ್ಕೆ ಸರಿಯಾಗಿ 4 ನಿಮಿಷ ಕಾಲ ರಾಮನನ್ನು ಸ್ತುತಿಸಿ, ಹನುಮಾನ್ ಚಾಲಿಸ ಪಠಿಸಿ ವಿವಾದವನ್ನು ಸೃಷ್ಟಿಸಿದ್ದಾರೆ.

ಇದರ ಬಳಿಕ ಪ್ರತಿಕ್ರಿಯಿಸಿದ ಕಾಳಿಸ್ವಾಮಿ, ಮಸೀದಿ ಮತ್ತು ಮದ್ರಾಸದಲ್ಲಿರುವ ಮೈಕ್ ಅನ್ನು ತೆಗೆಸುವಂತೆ ಸರ್ಕಾರವನ್ನು ಒತ್ತಾಯಿಸಿದ್ದಾರೆ. ಇದು ಮುಂದುವರಿದರೆ ಅಝಾನ್ ಸಮಯದಲ್ಲಿ ಮಠದಲ್ಲಿ ನಿರಂತರವಾಗಿ ಹನುಮಾನ್ ಚಾಲಿಸ ಪಠಿಸುವುದನ್ನು ಮುಂದುವರಿಸುವುದಾಗಿ ತಿಳಿಸಿದ್ದಾರೆ.