ಬೆಂಗಳೂರು: ಖ್ಯಾತ ರಂಗಭೂಮಿ ಕಲಾವಿದೆ ಕಮಲಾದೇವಿ (51)ಅವರ ಮೇಲೆ ಆ್ಯಸಿಡ್ ದಾಳಿ ನಡೆದಿದ್ದು, ಮುಖ ಹಾಗೂ ಬೆನ್ನಿಗೆ ಸುಟ್ಟ ಗಾಯಗಳಾಗಿದ್ದರಿಂದ ಕೆ.ಸಿ. ಜನರಲ್‌ ಆಸ್ಪತ್ರೆಗೆ ಕರೆದೊಯ್ಯಲಾಗಿತ್ತು. ಇದೀಗ ಹೆಚ್ಚಿನ ಚಿಕಿತ್ಸೆಗಾಗಿ ಅವರನ್ನು ವಿಕ್ಟೋರಿಯಾ ಆಸ್ಪತ್ರೆಗೆ ದಾಖಲಿಸಲಾಗಿದೆ.
‘ಬಿಎಂಟಿಸಿ ನಿರ್ವಾಹಕರಾಗಿದ್ದ ಕಮಲಾ ದೇವಿ, ಅನಾರೋಗ್ಯದಿಂದಾಗಿ ಕೆಲಸಕ್ಕೆ ರಾಜೀನಾಮೆ ನೀಡಿದ್ದರು. ಕಲಾವಿದೆಯಾಗಿ ರಂಗಭೂಮಿಯಲ್ಲಿ ತೊಡಗಿಸಿಕೊಂಡಿದ್ದ ಅವರು ಇಬ್ಬರು ಮಕ್ಕಳ ಜೊತೆ ನಂದಿನಿ ಲೇಔಟ್ ನ ಗಣೇಶ್ ಬ್ಲಾಕ್‌ನಲ್ಲಿ ವಾಸವಿದ್ದರು.
ದೇವಿ ಹಾಗೂ ಮಕ್ಕಳು ರಾತ್ರಿ ಮನೆಯಲ್ಲಿ ಮಲಗಿದ್ದಾಗ ಸೆಕೆ ಹೆಚ್ಚಿದ್ದರಿಂದ ಗಾಳಿಯಾಡಲು ಬಾಗಿಲು ತೆರೆದಿದ್ದರು. ಮರುದಿನ ನಸುಕಿನಲ್ಲಿ ಮನೆಯೊಳಗೆ ನುಗ್ಗಿದ್ದ ಆರೋಪಿಗಳು ದೇವಿ ಮೈ ಮೇಲೆ ಆ್ಯಸಿಡ್ ಎರಚಿ ಓಡಿ ಹೋಗಿದ್ದಾರೆ.
ಕಮಲಾದೇವಿಯವರ ಹೇಳಿಕೆ ಪಡೆದು ಪ್ರಕರಣ ದಾಖಲಿಸಿಕೊಂಡ ನಂದಿನಿ ಲೇಔಟ್ ಪೊಲೀಸರು ಮೂವರು ದುಷ್ಕರ್ಮಿಗಳನ್ನು ಬಂಧಿಸಿದ್ದಾರೆ.
ರಮೇಶ್, ಸ್ವಾತಿ ಹಾಗೂ ಯೋಗೇಶ್ ಪ್ರಕರಣದ ಬಂಧಿತ ಆರೋಪಿಗಳಾಗಿದ್ದು, ಸ್ವಾತಿ ರಮೇಶ್ ಗೆ ಆ್ಯಸಿಡ್ ತಂದುಕೊಟ್ಟು ಕೃತ್ಯ ನಡೆಸಲು ಸಹಕರಿಸಿದ್ದರು ಎಂದು ವಿಚಾರಣೆ ವೇಳೆ ತಿಳಿದುಬಂದಿದೆ .
