ಪಾಟ್ನಾ : ಬಿಹಾರದ ಪಾಟ್ನಾ ಗ್ರಾಮಾಂತರದ ಮಹಿಳೆಯೊಬ್ಬರು ಕೇವಲ ಐದು ನಿಮಿಷದ ಅಂತರದಲ್ಲಿ ಕೋವಿಶೀಲ್ಡ್‌ ಮತ್ತು ಕೋವ್ಯಾಕ್ಸಿನ್‌ ಲಸಿಕೆ ಪಡೆದಿದ್ದಾರೆ. ಎರಡೂ ಲಸಿಕೆ ಪಡೆದ ಸುನೀಲಾ ದೇವಿ ಆರೋಗ್ಯ ಸ್ಥಿರವಾಗಿದ್ದು, ವೈದ್ಯಕೀಯ ತಂಡ ಅವರ ಮೇಲೆ ತೀವ್ರ ನಿಗಾವಿರಿಸಿದೆ.
ಪಾಟ್ನಾ ಗ್ರಾಮಾಂತರದ ಪುನ್ಪುನ್‌ ಬ್ಲಾಕ್‌ ನ ಮಹಿಳೆ ಜೂ. 16ರಂದು ಈ ಎರಡೂ ಲಸಿಕೆಗಳನ್ನು ಕೇವಲ ಐದು ನಿಮಿಷದ ಅಂತರದಲ್ಲಿ ಪಡೆದಿದ್ದಾರೆ. ಜೂ. 16ರಂದು ಸುನೀಲಾ ದೇವಿ ಶಾಲೆಯೊಂದರಲ್ಲಿ ನಡೆದಿದ್ದ ಲಸಿಕೆ ಶಿಬಿರಕ್ಕೆ ತೆರಳಿದ್ದರು. ನೋಂದಣಿ ಪೂರ್ಣಗೊಂಡ ಬಳಿಕ, ಲಸಿಕೆಗಾಗಿ ಆಕೆ ಸಾಲಿನಲ್ಲಿ ನಿಂತು ಕೋವಿಶೀಲ್ಡ್‌ ಲಸಿಕೆ ಪಡೆದಿದ್ದಾರೆ.
ಲಸಿಕೆ ಪಡೆದ ಬಳಿಕ ಐದು ನಿಮಿಷ ಕಾಯುವಂತೆ ವೈದ್ಯಕೀಯ ತಂಡ ತಿಳಿಸಿದೆ. ಕೋಣೆಯೊಂದರಲ್ಲಿ ಕಾಯುತ್ತಿರುವಾಗ ಇನ್ನೊಬ್ಬ ನರ್ಸ್‌ ಬಂದು ಅವರಿಗೆ ಕೋವ್ಯಾಕ್ಸಿನ್‌ ಲಸಿಕೆ ನೀಡಿದ್ದಾರೆ.
“ನಾನು ವೀಕ್ಷಣಾ ಕೋಣೆಯಲ್ಲಿ ಕೂತಿದ್ದೆ. ಇನ್ನೊಬ್ಬ ನರ್ಸ್‌ ಬಂದು ನನಗೆ ಲಸಿಕೆ ಕೊಡುತ್ತೇನೆ ಎಂದರು. ನನಗೆ ಈಗಾಗಲೇ ಲಸಿಕೆ ಕೊಟ್ಟಿದ್ದಾರೆ ಎಂದು ನಾನು ಹೇಳಿದೆ. ಆದರೆ, ಇನ್ನೊಂದು ಲಸಿಕೆ ಅದೇ ಕೈಗೆ ಕೊಡಬೇಕು ಎಂದು ನರ್ಸ್‌ ಹೇಳಿದರು” ಎಂದು ಸುನೀಲಾ ದೇವಿ ಹೇಳಿದ್ದಾರೆ.
