ನನ್ನೆದೆ ಸೀಳಿದ್ರೆ ಶ್ರೀರಾಮ, ಸಿದ್ದರಾಮ ಇಬ್ಬರೂ ಇದ್ದಾರೆ: ಪ್ರದೀಪ್ ಈಶ್ವರ್

ಶಿವಮೊಗ್ಗ: ನಾವೂ ಹಿಂದೂಗಳೇ. ನಾವೂ ಶ್ರೀರಾಮ ಭಕ್ತರೇ. ನನ್ನ ಎದೆ ಸೀಳಿದರೆ ಶ್ರೀರಾಮ ಹಾಗೂ ಸಿದ್ದರಾಮ ಇಬ್ಬರೂ ಇದ್ದಾರೆ ಎಂದು ಕಾಂಗ್ರೆಸ್ ಶಾಸಕ ಪ್ರದೀಪ್ ಈಶ್ವರ್ ತಿಳಿಸಿದರು.

ಮಾಧ್ಯಮದವರೊಂದಿಗೆ ಮಾತನಾಡಿದ ಶಾಸಕ, ನಮ್ಮಲ್ಲಿ ರಾಮಮಂದಿರ ವಿಷಯದಲ್ಲಿ ಗೊಂದಲ ಇಲ್ಲ. ನಾವು ಹಿಂದುಗಳೇ, ನಾವು ಶ್ರೀರಾಮನ ಆರಾಧಕರು. ನನ್ನೆದೆ ಸೀಳಿದರೆ ಶ್ರೀರಾಮ, ಸಿದ್ದರಾಮ ಎಲ್ಲರೂ ಇದ್ದಾರೆ. ಆದರೆ ಬಿಜೆಪಿಯವರು ನಮ್ಮನ್ನು ಹಿಂದೂ ವಿರೋಧಿಗಳು ಎಂಬ ರೀತಿ ಬಿಂಬಿಸುತ್ತಿದ್ದಾರೆ. ಯುವಕರು ರಾಜಕಾರಣಿಗಳ ಹಿಂದೆ ದಯವಿಟ್ಟು ಬರಬೇಡಿ. ನಿಮಗೆ ರಾಜಕಾರಣಿ ಇಷ್ಟ ಆದ್ನಾ, ಚುನಾವಣೆ ಸಮಯದಲ್ಲಿ ಮತ ಹಾಕಿ ಎಂದರು. ಆದರೆ, ಯುವಕರು ಯಾವುದೇ ಕಾರಣಕ್ಕೂ ಕೋಮು ಗಲಭೆಗೆ ಒಳಗಾಗಬೇಡಿ. ದಯವಿಟ್ಟು ಜೀವನ ಕಟ್ಟಿಕೊಳ್ಳಿ, ಸಂಪಾದನೆ ಮಾಡಿ ಎಂದು ಸಲಹೆ ನೀಡಿದರು.