ನೀವು ಬಾಬಾ ರಾಮ್ ದೇವ್ ರಲ್ಲಿ ಯೋಗ ಪಾಠ ಕಲಿತಿದ್ದರೆ ಪೆಟ್ರೋಲ್ ಬೆಲೆ 06 ರೂ. ಆಗಿ ಕಾಣುತ್ತೆ : ತರೂರ್ ವ್ಯಂಗ್ಯ

ನವದೆಹಲಿ : ಯೋಗಗುರು ಬಾಬಾ ರಾಮ್ ದೇವ್ ಅವರಿಂದ ಯೋಗ ಪಾಠ ತೆಗೆದುಕೊಂಡರೆ, ನಿಮಗೆ ಪೆಟ್ರೋಲ್ ಬೆಲೆ ಕೇವಲ 6 ರೂ.ಯಾಗಿ ಕಾಣಿಸುತ್ತದೆ ಎಂದು ಕಾಂಗ್ರೆಸ್ ನಾಯಕ ಶಶಿ ತರೂರ್ ವ್ಯಂಗ್ಯವಾಡಿದ್ದಾರೆ.

ಪೆಟ್ರೋಲ್ ದರ ದೇಶಾದ್ಯಂತ 90 ರೂ. ಗಡಿ ದಾಟಿರುವ ಹಿನ್ನೆಲೆಯಲ್ಲಿ ಟ್ವೀಟ್ ಮೂಲಕ ಅವರು ಈ ವ್ಯಂಗ್ಯದ ನುಡಿಗಳನ್ನಾಡಿದ್ದಾರೆ.

“ನೀವು ಬಾಬಾ ರಾಮ್ ದೇವ್ ಅವರಿಂದ ಯೋಗ ಪಾಠಗಳನ್ನು ತೆಗೆದುಕೊಂಡರೆ, ನೀವೂ ಸಹ ಪೆಟ್ರೋಲ್ ದರವನ್ನು ಲೀಟರ್ ಗೆ 06 ರೂ.ಗೆ ನೋಡಬಹುದು” ಎಂದು ಶಶಿ ತರೂರ್ ಟ್ವೀಟ್ ಮಾಡಿದ್ದಾರೆ.

ಟ್ವೀಟ್ ಜೊತೆಗೆ ಪೆಟ್ರೋಲ್ ಬಂಕ್ ವೊಂದರಲ್ಲಿ ತಲೆಕೆಳಗೆ ಕಾಲು ಮೇಲೆ ಮಾಡಿ ಮಾಡುವ ಯೋಗದ ಭಂಗಿಯ ಕಾರ್ಟೂನ್ ಒಂದನ್ನು ಅವರು ಶೇರ್ ಮಾಡಿದ್ದಾರೆ. ಅದರಲ್ಲಿ ಪೆಟ್ರೋಲ್ ಬೆಲೆ 90 ರೂ. ಇರುವುದನ್ನು ತಲೆ ಕೆಳಗೆ-ಕಾಲು ಮೇಲೆ ಮಾಡಿ ನೋಡಿದಾಗ 06 ರೂ.ಯಂತೆ ಕಾಣುವಂತಹ ಕಾರ್ಟೂನ್ ಇದಾಗಿದೆ.